بۇگىنگى قازاقستان ۇلتتىق قاۋىپسىزدىك كوميتەتىنىڭ كۇنى. كاسىبي مەرەكە قارساڭىندا ۇقك باسشىسى كارىم ءماسىموۆ «كازاحستانسكايا پراۆدا» گازەتىنە ارنايى سۇحبات بەرگەن ەدى. سۇحبات بارىسىندا ءماسىموۆ ءتۇرلى ساياسي ماسەلەلەردى ءسوز ەتەدى. 

ءماسىموۆ قازىرگى قالىپتاسقان جاعدايعا بايلانىستى ۇلتتىق قاۋىپسىزدىككە ءتۇرلى قاتەردىڭ ارتقانىن مويىندايدى. ول ماقالادا:

«وزگە ەلدەردەن كەلۋى مۇمكىن تەرروريزم مەن ەكسترەميزم قاۋپى كۇن تارتىبىنەن تۇسكەن ەمەس. ەڭ الدىمەن اقش اسكەرىنىڭ اۋعان جەرىنەن شىعارىلۋى ايماقتىق قاۋىپسىزدىككە تىكەلەي اسەر ەتىپ، شيەلەنىستىڭ ارتۋىنا اكەلەدى. وقيعانىڭ وسى باعىتتا ءوربۋى تۇراقسىزدىقتىڭ باسقا وڭىرگە الماسىپ، ءدىني ەكسترەميستىك ۇيىمداردىڭ ايماققا ۇمتىلۋىمەن، ەسىرتكى تاسىمالىنىڭ ارتۋىمەن جانە بوسقىنداردىڭ كوبەيۋىمەن سيپاتتالۋى مۇمكىن»،- دەيدى ۇقك باسشىسى.

كارىم ءماسىموۆ پاندەميانىڭ دا ەل قاۋىپسىزدىگىنە كەرى اسەر ەتىپ جاتقانىن جوققا شىعارمايدى.

«كوز الدىمىزدا جاھاندىق ساياسات پەن ەكونوميكانىڭ كۇن ءتارتىبى وزگەرىپ جاتىر. COVID-19 پاندەمياسى جانە ونىڭ سالدارى جاڭا قاۋىپتەر مەن قاتەرلەردى تۋىنداتۋدا. ساياسات، ەكونوميكا، الەۋمەتتىك ءومىر مەن تەحنولوگيادا ترانسفورماتسيا ءجۇرىپ جاتىر. سوڭعى ەكى جىلدا الەمدە قوعامدىق ماسەلەلەر ۋشىعىپ، ەكونوميكالىق ديسبالانس تۋىندادى. حالىقارالىق قاتىناستىڭ قۇرىلىمى دا وزگەرىپ شىعا كەلدى»، - دەيدى ول. وسىلايشا پاندەميا الەمدى جاڭا كەزەڭگە باستاپ جاتقانىن مويىندايدى.

ۇقك باسشىسى ەلىمىزدە تەرروريزممەن كۇرەستىڭ قالاي ءجۇرىپ جاتقانىن دا ايتىپتى.

«سوڭعى ۋاقىتتا قازاقستاندىقتاردىڭ حالىقارالىق تەررورلىق ۇيىمدارعا قاتىسۋى ازايدى. بۇعان جاعىمدى اسەر ەتكەن «جۋسان» وپەراتسياسى بولدى. بەسىنشى ەتاپ بارىسىندا سيريادان 600 ادام اكەلىندى. ولارمەن قىزۋ جۇمىس جۇرگىزىلىپ، دەراديكاليزاتسيا، اداپتاتسيا جانە رەابيليتاتسيا پروتسەستەرى ىسكە اسۋدا. قۇقىقتىق تۇرعىدان ولاردى وقشاۋلاۋ، زاڭ اياسىندا جازا كەسۋ دە قاراستىرىلىپ جاتىر. 

اعىمداعى جىلدىڭ وزىندە 5 مىڭ ءىس-شارا ءوتىپ، وعان 500 مىڭ ادام قاتىستى. ينتەرنەتتە 53 مىڭ تەررورلىق جانە ەكسترەميستىك سيپاتتاعى اقپاراتتار ءوشىرىلدى. پروفيلاكتيكالىق جۇمىستار بارىسىندا 888 ادام ەكستەميستىك كوزقاراستان ءداستۇرلى يسلامعا وتسە، 1067 راديكالدىق اعىم وكىلدەرى قازاقستاندىق قۇندىلىقتاردى قابىلدادى»، - دەدى ول.

ءماسىموۆتىڭ اقپاراتىنشا 6 اي ىشىندە شەكاراشىلار زاڭسىز شەكارانى كەسىپ وتپەك بولعا 5 مىڭ ادامدى ۇستاعان. شەكارادان وتكىزىلمەك بولعان 100 مىڭ وق-ءدارى، 2 مىڭ ەلەكتروشوكەر، 12 مىڭ سۋىق قارۋ تاركىلەنگەن.

«ورتالىق ازيا رەسپۋبليكالارىنىڭ ءبىرىنىڭ ارنايى قىزمەتتەرىمەن بىرگە ءبىز ترانسۇلتتىق قىلمىستىق توپتىڭ (ورتالىق ازيا ەلدەرىنىڭ ازاماتتارى اراسىنان) يادرولىق ماتەريالداردىڭ زاڭسىز اينالىمى سالاسىنداعى قىزمەتىن توقتاتتى. تۇتاستاي العاندا، تەك 2020 جىلى مەملەكەتتىك ەكونوميكالىق دامۋ باعدارلامالارىن قارسى بارلاۋ قىزمەتى، سونداي-اق شەتەلدىك ينۆەستورلاردىڭ، قارجىلىق-ونەركاسىپتىك توپتار مەن ترانسۇلتتىق كومپانيالاردىڭ قىزمەتىن باقىلاۋ اياسىندا 925,3 ملرد.تەڭگە كولەمىندە ەكونوميكالىق زالالدىڭ الدىن الىندى، 147,23 ميلليارد تەڭگە بولدى»، -دەيدى ول.

Abai.kz