ەلىمىزدە ۆاكتسينا الۋعا قاتىستى ەكى ءتۇرلى پىكىر بار. حالىقتىڭ ءبىر توبى ۆاكتسينانى قولداپ، ۆيرۋستى جەڭۋدىڭ جالعىز جولى وسى دەسە، ەكىنشى ءبىر توبى ۆاكتسيناعا قارسى. ولار ۆاكتسينا تەكسەرىستەن وتپەگەن، ادام ومىرىنە اسا قاۋىپتى دەپ سانايدى. مىنە، ءدال وسىنداي پىكىردى ۇستاناتىن ءبىر توپ ادام 19 شىلدە كۇنى، نۇر-سۇلتان قالاسىنداعى دەنساۋلىق ساقتاۋ مينيسترلىگىنە بارىپ، ءوز نارازىلىقتارىن بىلدىرگەن. نارازىلىق بىلدىرۋشىلەردىڭ بارلىعى دەرلىك ايەلدەر قاۋىمى. نارازى توپقا مينيسترلىك تاراپىنان دەنساۋلىق ساقتاۋ ءمينيسترىنىڭ ورىنباسارلارى جاندوس بۇركىتباەۆ، اجار عانيات جانە مەملەكەتتىك باس سانيتارلىق دارىگەردىڭ وكىلى ەرجان بايتاناەۆ شىققان.

نارازىلىق ءبىلدىرۋشى ايەلدەر قاۋىمى بالالارعا ۆاكتسينا سالۋعا قارسىلىق ءبىلدىرىپ، مينيسترلىك وكىلدەرىن تومپەشتەي كەتكەن. جەلىدە تاراعان ۆيدەودا ايەلدەردىڭ بايتاناەۆقا قول كوتەرىپ، ۇرىپ جاتقانى، بالاعات ءسوز ايتقانى انىق بايقالادى. بايتاناەۆ باسىن جاۋىپ، قاشىپ كەتكەنى دە ۆيدەوعا ءتۇسىپ قالىپتى. بولعان وقيعاعا قاتىستى مينيستر تسوي دا تۇسىنىكتەمە بەردى.

ء"بىز حالىققا ءتۇسىندىرۋ جۇمىستارىن وتكىزىپ جاتىرمىز. كوپ جاعدايدا ول دۇرىس فورماتتا وتەدى، بىراق كوپ رەتتە ەموتسيا مەن اگرەسسياعا سالىنعان ادامدار كەلەدى. بۇل جۇمىستىڭ پسيحولوگيالىق تاۋەكەلدەرى بار. ىشتە جۇمىس ىستەپ جاتقان ارىپتەستەرىمىز زارداپ شەكتى. ءبىز كۇش كورسەتۋ قۇرالدارىن قولدانا المايمىز. الدىنا اشىق شىعىپ، سويلەسەيىك دەدىك. كەي ازاماتتار بىزگە قۇلاق اسسا، ەندى ءبىرى ءوز پىكىرىنەن اينىمادى. مەنىڭشە، ولار ءاۋ باستان ىزالى بولدى. الەۋمەتتىك، وتباسىلىق، تۇرمىستىق ماسەلەلەرى بار سياقتى. ازاماتتاردى ءتۇسىنىپ، ولارمەن سويلەسۋگە تىرىسامىز، بىراق كەيدە رەاكتسيا شەكتەن شىعىپ كەتەدى", - دەدى الەكسەي تسوي بولعان وقيعاعا قاتىستى تۇسىنىكتەمە بەرە وتىرىپ.

قوعامدا ۆاكتسينا الۋعا قاتىستى پىكىرتالاس سوڭعى ۋاقىتتا جيىلەپ كەتتى. قوعامنىڭ ءبىر بولىگى ۆاكتسينا الۋدى تولىق قولداسا، ەكىنشى ءبىر بولىگى ەلىمىزدە ۆاكتسينا تاڭداۋ مۇمكىندىگىنىڭ جوقتىعىن ايتىپ، شاعىم بىلدىرۋدە، ال ءۇشىنشى توپ مۇلدە ۆاكتسيناعا قارسى. ۆاكتسيناتسيا پاcپورتىنا قاتىستى دا تاۋ تولاستار ەمەس. ءتىپتى پرەزيدەنتتىڭ ءوزى ۆاكتسيناتسيا پاسپورتىن جاساۋشىلاردى قاتاڭ جازالاۋدى تاپسىرىپ، ونى ۇلتتىق قاۋىپسىزدىككە تونگەن قاتەر دەپ اتادى.

Abai.kz