Cاناۋلى ساعاتتاردان كەيىن الەم جۇرتشىلىعى اسىعا كۇتكەن توكيو وليمپياداسى باستالادى. تورتكۇل دۇنيە جانارىن تەلەديدارعا بۇرىپ، ءوز ەلدەرىنە جانكۇيەر بولماق. پاندەميا كەسىرىنەن كورەرمەنسىز وتەتىن وليمپيادانىڭ بار قىزىعىن تەك قانا تىكەلەي ەفير ارقىلى تەلەديدار بەرمەك. الايدا قازاقستاندا توكيو تورىنەن ترانسلياتسيا بولا ما، جوق پا دەگەن ساۋالعا ءالى ناقتى جاۋاپ جوق. 

سپورت سايىستارىن كورسەتەتىن Qazsport ارناسى دا ناقتى جاۋاپتان قاشقاقتاۋدا. ارنانىڭ ديرەكتورى ناعي باقىتبەكوۆ ازىرگە ناقتى شەشىم جوق ەكەنىن، كەلىسسوزدەر ءجۇرىپ جاتقانىن، شەشىم بەلگىلى بولعاندا الەۋمەتتىك جەلى ارقىلى حابارلايتىنىن ايتتى.

پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ بۇل ماسەلەگە قاتىستى: ء"دال قازىر جاپونيامەن كەلىسسوز جۇرگىزىلىپ جاتىر. تىكەلەي كورسەتىلىم جاساۋ قۇقىعىن ساتىپ الۋعا مۇمكىندىگىمىز بار دەپ ويلايمىن. ءبىز ازاماتتارىمىز ءوز سپورتشىلارىنا قولداۋ كورسەتۋى ءۇشىن بار جاعدايدى جاساۋعا تىرىسىپ جاتىرمىز. ماسەلە تەك باعادا. كەشەگى كۇنگە دەيىن بىزگە جوعارى باعا ايتىپ كەلدى. كورشى مەملەكەتتەر تولەيتىن باعاعا قاراعاندا، قازاقستان 10 ەسە جوعارى باعا تولەپ كەلدى. بۇل ءبىزدىڭ ەكونوميكالىق دامۋىمىزبەن بايلانىستى بولدى. ازاماتتارىمىز ۇكىمەتتى سپورتتىق مەرەكەدەن ايىرىپ جاتىر دەپ كىنالاۋى مۇمكىن. بىراق ءبىز سالىق تولەۋشىلەردىڭ قارجىسىن ۇنەمدەگىمىز كەلەدى. مەنىڭ ويىمشا بۇل ماسەلە جاقىن ارادا شەشىلەدى", – دەدى داۋرەن اباەۆ.

بەلگىلى قوعام قايراتكەرى مۇحتار تايجان بولسا "وليمپيادا ويىندارىنىڭ ترانسلياتسياسى 8 ساعاتتان كەيىن باستالادى. ءبىزدىڭ ەلىمىزدە كورسەتۋ ماسەلەسى ءالى شەشىلگەن جوق. ءبىزدىڭ ەلىمىزدىڭ 96 سپورتشىسى ەل نامىسىن ميلليونداعان جانكۇيەرلەرىنسىز قورعاۋعا جول بەرمەۋ كەرەك. ەگەر سولاي بولسا، وندا بۇل تاۋەلسىزدىكتىڭ 30 جىلدىق تاريحىنداعى العاشقى جاعداي بولماق جانە ول ماسقارا" دەدى.

بۇعان دەيىن "قازاقستان" ۇلتتىق تەلەارناسى ءباسپاسوز قىزمەتكەرى كەلەسىدەي حابارلاما تاراتتى: "XXXII جازعى وليمپيادا ويىندارىنىڭ ترانسلياتسياسىنا قاتىستى كورەرمەندەر مەن ارىپتەستەرىمىزدەن كەلىپ ءتۇسىپ جاتقان ساۋالدارعا بايلانىستى كەلەسىنى حابارلايمىز.

توكيو وليمپياداسىنىڭ تىكەلەي ترانسلياتسيالار قۇقىعى "Dentsu Inc." كومپانياسىنا تيەسىلى. "قازاقستان" تەلەراديوكورپوراتسياسى مەن "حابار" اگەنتتىگى" اق "Qazaqstan", "Qazsport", "حابار" تەلەارنالارى ارقىلى جازعى وليمپيادانى ەل اۋماعىندا كورسەتۋ بويىنشا كەلىسسوزدەردى 2019 جىلى باستاعان بولاتىن. تاراپتار ازىرگە ورتاق كەلىسىمگە كەلە العان جوق. ەكىجاقتى كەلىسىمنىڭ ۇزاققا سوزىلۋ سەبەبى، قۇقىق يەسىنىڭ ليتسەنزيا باعاسىن 2016 جانە 2018 جىلدارداعى وليمپيادا ويىندارىمەن سالىستىرعاندا 123 پايىزعا قىمباتقا ۇسىنۋى.

قازىرگى كەزدە "Qazaqstan", "Qazsport", "حابار" تەلەارنالارى قازاقستاندىق سپورتشىلاردى قولداۋ جانە وتاندىق كورەرمەندەرگە وليمپيادادان جەدەل اقپارات ۇسىنۋ بويىنشا جان-جاقتى ازىرلىك جۇمىستارىن جۇرگىزۋدە. تەلەارنالاردىڭ ۇلتتىق وليمپيادا كوميتەتى مەن شەتەلدىك ءىرى اقپارات اگەنتتىكتەرىنەن فوتو،-ۆيدەوماتەريالدار الۋ مۇمكىندىگى قاراستىرىلعان.

XXXII جازعى وليمپيادا ويىندارى توكيودا 23 شىلدە مەن 8 تامىز ارالىعىندا وتەدى. قازاقستان قۇراماسىنىڭ قورجىنىندا سپورتتىڭ 27 تۇرىنەن 97 ليتسەنزيا بار" دەگەن اقپارات تاراتقان ەدى.

"Qazaqstan", "Qazsport", "حابار" تەلەارنالارى توكيودا وتەتىن ءحححىى جازعى وليمپيادا ويىندارىن كورسەتۋ قۇقىعىن يەلەنگەن "Dentsu Inc" كومپانياسىمەن كەلىسىمگە كەلە الماۋدا.

Abai.kz