بۇگىن بەلگىلى قالامگەر اياگۇل مانتاي ومىردەن ءوتتى. ءبىز جازۋشىنىڭ الەۋمەتتىك جەلىدەگى سوڭعى جازباسىن (21 شىلدە) وقىرمان نازارىنا ۇسىنعاندى ءجون كوردىك...

جانىڭدى كىرلەتكىڭ كەلمەيدى... جاندۇنيەڭدى بارىنشا تازا ۇستاعىڭ كەلەدى... بىراق بار بولعانى پەندەسىڭ... جانىڭ تىم نازىك بولسا، ءتىپتى قيىن... سىيلاپ جۇرگەن ادامىڭنىڭ ارامدىعىن سەزسەڭ، كۇيرەپ، سىنىپ كەتەسىڭ... تۇيسىگىڭ مىقتى بولسا، ويىن سەزىپ قويساڭ، ءتىپتى قيىن...

جاعىمپاز ادامداردان قاشام... قارايمىن، ولاردىڭ جاندۇنيەسىندە ءبىر تىنىشتىق بار. ولار جاعىمپازدىعىنا ءتىپتى دە ارلانبايدى. جاعىمپازدىق قاسيەتىمەن اقشا جاسايدى.

جارىماي ءجۇرىپ، پونت جاسايتىن ادامداردان قاشام. جاساندىلىق كوپ... جاساندىلىعى كوپ ادامعا پاسىقتىق پەن ارامدىق ءتان...

ءپرينتسيپى جوق ادامداردان قاشام... ولار كەز كەلگەن كەزدە ساتىپ كەتەدى.

ۋادە بەرىپ، ورىندامايتىن ادامداردان قاشام. ءپرينتسيپى جوق ادام عانا ۋادە بەرىپ، ورىندامايدى.

مۇگەدەك بولسا دا، قۇدايعا شاعىنبايتىن ادامداردى بىلەم. جاندۇنيەسى تاپ-تازا. بيىك. پاراساتتى. سولاردىڭ قاسىندا رۋحاني مۇگەدەكتىگىڭە ۇيالاسىڭ...

وكىنىشتىسى، ادامدار وزىنە ۇقساماعان ادامدى ولتىرۋگە، جەرلەۋگە اسىعادى...

مەن ىلعي دا جۇرەككە ورالۋدى، قۇدايعا ورالۋدى ارمانداپپىن. بىراق ورالماپپىن...

ءوزىمنىڭ تاپ-تازا جۇرەگىمدى، قۇدايدى تاپقىم كەلەدى.

(بار بولعانى ناماز وقىسام دەپ جۇرگەن قىزدىڭ كوڭىل-كۇيى. ەسكەرتەم: مورال تىڭداعاندى، وقىعاندى ۇناتپايمىن).

اياگۇل مانتاي

Abai.kz