اۋعانستانداعى جاعداي ۋشىقتى. تالىبتەر بارلىق ستراتەگيالىق ماڭىزى بار پروۆينتسيالارعا شابۋىل جاساپ جاتىر. قازىردىڭ وزىندە تالىبتەر اۋعانستاننىڭ توعىز پروۆينتسياسىنىڭ ورتالىعىن باسىپ الدى. ەكى كۇن بۇرىن قۇندىز سودىرلاردىڭ قولىنا ءوتتى. ورتالىق ازيامەن اۋعانستاندى بايلانىستىراتىن ەڭ ءىرى قالانىڭ لاڭكەستەر قولىنا ءوتۋى ەل ۇكىمەتىنە ۇلكەن سوققى بولدى. 

تالىبتەردىڭ شابۋىلىنان سەسكەنگەن حالىق يرانعا قاراي اعىلىپ، بوسىپ جاتىر. ويتكەنى ءسۇننيت اعىمىن ۇستاناتىن تالىبتەر حازار شيتتەرگە 90-جىلدارداعى "قاندى تاجىريبەنى قايتالاۋى مۇمكىن" دەگەن دە كۇدىك بار. تالىبتەر وزدەرى باسىپ العان اۋدانداردا بىلگەنىن ىستەۋدە. حالىقارالىق ۇيىمداردىڭ حابارلاۋىنشا ولار بارلىق زاڭداردى جوققا شىعارىپ، ءوز كوزقاراستارىن زاڭ نەگىزىند بەكىتىپ وتىر. مىسالى ايەلدەردىڭ كوشەگە ەر ازاماتسىز شىقپاۋى، قىزداردىڭ بارلىعى جاپپاي تۇرمىسقا بەرىلۋى مەن ازاماتتاردىڭ ساقال ءوسىرۋى، ەلەكتروندى قۇرالداردىڭ (تەلەديدار، ۇيالى بايلانىس قۇرالى، پلانشەت) تالقاندالۋى ىسكە اسۋدا. مۇنداي جاعداي تۋرا 1996-2001 جىلدارى اۋعانستاندا بولعان ەدى.

تالىبتەر شيۆارگان قالاسىنداعى ايگىلى دۋستۋم رەزيدەنتسياسىن ورتەپ جىبەرگەننەن كەيىن، گەنەرال دۋستۋم قولىنا قارۋ الىپ، جاقتاستارىن تالىبتەردى تالقانداۋعا شاقىردى. كەشە دۋستۋم جۇزدەگەن ساربازدارىمەن مازاري شاريفكە اتتاندى. ال بۇگىن اۋعانستان پرەزيدەنتى دە مازاري شاريفكە كەلىپ، دۋستۋممەن كەلىسسوز وتكىزىپ جاتىر. اۋعان بيلىگىنىڭ ىشكى كۇشتەرگە عانا سەنىمى بار. ويتكەنى اقش ساربازدارىنىڭ رەجيم ءۇشىن سوعىسپايتىنىن، تەك اۋەدەن سوققى بەرۋ ارقىلى كومەكتەسەتىنىن مالىمدەپ ۇلگەردى. "اۋعانستان ءۇشىن اۋعان بيلىگى سوعىسۋى كەرەك" دەدى بايدەن.

اۋعانستان بيلىگىنە سىرتتان كومەك كەلمەيتىنى انىق. ونى باتىس تا، رەسەي مەن قىتاي دا ايتۋدا. كابۋل كومەكتى ءۇندىستاننان سۇراۋدا، الايدا دەليدىڭ ونداي قادامعا بارۋى ەكىتالاي. كابۋل ەسكى دالا گەنەرالدارىنا ارقا سۇيەيتىن سىڭايلى. الايدا ولاردىڭ دا اسكەري كۇشى سارقىلعان. سوندىقتان پروۆينتسيالاردىڭ تالىبتەردىڭ قولىنا ءوتىپ، اقىرى كابۋل ءۇشىن شايقاس بولۋ مۇمكىندىگىن دە جوققا شىعارۋعا بولماس.

اۋعانستاندا اسكەري قاقتىعىس سالدارىنان ازىق-تۇلىك كولەمى دە كۇرت ازايىپ كەتتى. شەكارالاس مەملەكەتتەر دە ساۋدا قاتىناسىن توقتاتۋدا. دەمەك الداعى تاڭدا تاپشىلىق ارتىپ، حالىقتىڭ بوسىپ كەتۋى دە ارتا تۇسپەك.

Abai.kz