سوڭعى كۇندەرى الەمدىك اقپاراتتىڭ اۋزىنداعى ءسوز - اۋعانداعى احۋال. دۇنيەجۇزىنىڭ 50-گە تارتا مەملەكەتى مەن ەۋرووداق اۋعان بيلىگى تاليباننىڭ قولىنا وتكەن سوڭ، بىرلەسكەن مالىمدەمە جاسادى. اۋعانستاننان كەتكىسى كەلەتىن شەتەلدىكتەر مەن جەرگىلىكتى تۇرعىندارعا ەلدەن قاۋىپسىز شىعىپ كەتۋگە جاعداي جاساۋدى سۇرادى.

قازاقستان بيلىگى رەسمي مالىمدەمە جاساپ، بوسقىن قابىلدامايتىنىن ايتتى. دەسە دە الەۋمەتتىك جەلىدە ءارتۇرلى اڭگىمە كوپ.

«شىمكەنتتە جاتاقحانا دايىنداپ جاتىر ەكەن»، «اۋعان بوسقىندارى الماتىعا كەلەدى ەكەن»، «قازاقستان 70 مىڭ بوسقىن قابىلدايدى ەكەن»، «اۋعان ستۋدەنتتەرى قازاقستاننان باسپانا سۇراپتى» ت.ب. گۋ-گۋ ءسوز. ءبىرى راس بولسا، ءبىرى وتىرىك.

وسىعان دەيىن پرەزيدەنت توقاەۆتىڭ ءباسپاسوز حاتشىسى بەرىك ءۋالي Facebook-تە بوسقىندار ماسەلەسىنە قاتىستى:

«پرەزيدەنت اۋعانستان بوسقىندارى تۋرالى شەشىم قابىلداعان جوق. بۇعان قاتىستى تاراعان اقپارات نەگىزسىز. دۇنيەجۇزىلىك ۇيىم باسشىلىعى رەسمي ءوتىنىش بىلدىرگەن جاعدايدا بۇۇ قىزمەتكەرلەرىنە عانا كومەك كورسەتىلەتىن بولادى»، - دەپ جازعان ەدى.

وسىعان دەيىن WhatsApp مەسسەندجەرىندە «قازاقستانعا اۋعانستاننىڭ 70 000 ازاماتى كەلەدى» دەگەن قاۋەسەت تارادى. ول اقپارات بويىنشا، العاشقى 500 ادام ۇشاقپەن شىمكەنت اۋەجايىنا قونعان، الداعى كۇندەرى تاعى 1500 ادام كەلەدى-مىس.

كەشە اۋعانستاننان بوسقىنداردىڭ كەلەتىنى جانە ولاردىڭ شىمكەنت پەن تۇركىستان وبلىسىنا ورنالاستىرىلاتىنى تۋرالى اقپاراتتى قر سىرتقى ىستەر مينيسترلىگى جوققا شىعاردى.

«بۇگىنگى كۇنى تاراعان اقپارات شىندىققا جاناسپايدى. بارشاڭىزدى تەك رەسمي اقپاراتقا عانا سەنۋگە شاقىرامىز!»، – دەپ حابارلادى ۆەدومستۆونىڭ ءباسپاسوز قىزمەتىنەن.

وتكەن جەكسەنبىدە تاليبان جاساقتارى (قازاقستان مەن وزگە بىرقاتار ەلدە راديكالدى ۇيىم دەپ تانىلعان) اۋعان بيلىگىن سوعىسسىز الدى. پرەزيدەنت اشراف عاني ەلدەن كەتتى. عانيدىڭ قازىر قايدا ەكەنى بەلگىسىز. اۋەلدە اشراف عاني تاجىكستانعا ۇشىپ كەتتى دەلىنگەن. كەيىن تاجىكستان سىرتقى ىستەر مينيسترلىگى اۋعان ساياساتكەرى مىنگەن ۇشاق تاجىكستانعا قونباعانىن حابارلادى. قازاقستان دا ارانيى مالىمدەمە جاساپ، اشراف عانيدىڭ قازاقستاندە ەمەس ەكەنىن ايتتى. كەيبىر باق اۋعانستاننىڭ ەندىگى ەكس-پرەزيدەنتى اشراف عاني وزبەكستاندى بارىپ پانالاۋى مۇمكىن ەكەنىن جازادى.

تاليبان جاساقتارى قابۋلدى العان سوڭ، ەلدە ءوز ءتارتىبىن ورناتا باستادى. ال ونداعى شەتەلدىك تۇلعالار مەن جەرگىلىكتى تۇرعىنداردىڭ كەي بولىگى ەلدەن كەتۋگە اسىعۋدا.

قازاقستان بيلىگى دە اۋعانستانداعى ديپلوماتتار مەن قازاقستان ازاماتتارىنا الاڭداۋلى. مەملەكەت باسشىسى قاسىم-جومارت توقاەۆ اۋعانستانداعى قازاقستان ازاماتتارى مەن ديپلوماتتارىنىڭ قاۋىپسىزدىگىن قامتاماسىز ەتۋ جونىندە كۇشتىك قۇرىلىم باسشىلارىمەن شۇعىل جيىن وتكىزگەن بولاتىن.

Abai.kz