"قازاقستاننىڭ ءۇشىنشى پرەزيدەنتى كىم بولماق" دەگەن سۇراق ەل ىشىندە ءجيى ايتىلاتىن بولدى. وعان نەگىز دە جوق ەمەس. 2024 جىلى پرەزيدەنتتىك سايلاۋ وتەدى، ال ەلدەگى پاندەميالىق جانە ەكونوميكالىق جاعدايعا قاراپ، سايلاۋدىڭ مەرزىمىنەن بۇرىن ءوتۋى مۇمكىن دەگەن نۇسقانى دا ەستەن شىعارۋعا بولماس.  ويتكەنى بۇعان دەيىنگى كوپتەگەن پرەزيدەنت جانە پارلامەنت سايلاۋى مەرزىمىنەن بۇرىن وتكەنى بەلگىلى. 

بيىل پرەزيدەنت قاسىم-جومارت توقاەۆتىڭ بيلىكتە وتىرعانىنا ەكى جىلدان استى. توقاەۆ كەزەڭى ءبىرشاما قيىندىقتارمەن تاپ كەلۋدە. اتاپ ايتقاندا كوروناۆيرۋس ەپيدەمياسى، كوروناداعدارىستىڭ ەكونوميكا، ساۋدا قاتىناسىنا كەرى اسەرى، ايماقتاعى گەوساياسي شيەلەنىستەردىڭ ارتۋى جانە باسقالار. ەكى جىلدىڭ ىشىندە الەمدىك دەرجاۆالاردىڭ دا قاقتىعىسى ارتىپ، قىرعي-قاباقتىق كۇشەيدى. قىتاي، رەسەي، اقش اراسىنداعى تەكەتىرەس جاڭا قارقىنعا كوشتى. ال سىرتقى ساياساتتا كوپۆەكتورلىق ۇستانامىز دەگەن قازاقستان بيلىگى ءۇشىن بالانس ۇستاۋ قيىنعا سوعۋدا.

پرەزيدەنت توقاەۆ 68 جاسقا تولعاندا قوعام بەلسەندىسى گۇلجان ەرعاليەۆا ەلدەگى سايلاۋ مەرزىمىنەن بۇرىن وتەدى جانە وندا پرەزيدەنت توقاەۆ ەكىنشى مەرزىمگە تۇسپەۋى مۇمكىن دەگەن وي بىلدىرگەن ەدى.

ال پرەزيدەنتكە ۇمىتكەر بولعان تولەۋتاي راقىمبەكوۆ بولسا پرەزيدەنت سايلاۋى 2023 جىلى ءوتۋى مۇمكىن دەگەن جازبا قالدىرعانى ەسىمىزدە. بۇل تاقىرىپ ساياساتتانۋشىلار مەن تەلەگرام ارنالاردا ءجيى تالقىلانىپ كەلەدى.

مىسالى 19-تامىزدا 52 مىڭ وقىرمانى بار "Yedilov Online" تەلەگرام ارناسى ء"سىز قالاي ويلايسىز، قازاقستاننىڭ كەلەسى پرەزيدەنتى كىم بولادى؟" دەگەن ساۋالناما جاريالادى. 10900 ادام كەلەسى جاۋاپتاردى بەلگىلەپتى: 13% سامات ءابىش، 3% ماۋلەن اشىمباەۆ، 5% باۋىرجان بايبەك، 7% اسەت يسەكەشەۆ، 5% داريعا نازارباەۆا، 8% نۇرلان نيگماتۋلين، 2% ءاليحان سمايلوۆ ،18 يمانعالي تاسماعامبەتوۆ، 29% قاسىم-جومارت توقاەۆ، 10% "وزگە ادام" نۇسقالارىن تاڭداعان ەكەن.

قۇرمەتتى وقىرمان، پرەزيدەنت سايلاۋى قاشان بولىد جانە كىم سايلانۋى مۇمكىن دەپ ويلايسىز؟ پىكىر ءبىلدىرىڭىز.

Abai.kz