جامبىل وبلىسىنىڭ بايزاق اۋدانىنداعى اسكەري قويمادا بولعان جارىلىستان كەيىن الەۋمەتتىك جەلى بەلسەندىلەرى ءھام قوعام وكىلدەرى قر قورعانىس ءمينيسترى نۇرلان ەرمەكباەۆتىڭ وتستاۆكاسىن تالاپ ەتكەنى بەلگىلى.

مينيستر نۇرلان ەرمەكباەۆتىڭ ءوزى دە باق-قا پىكىر ايتىپ: "مەنىڭ قازىرگى باستى مىندەتىم جارىلىس سالدارى مەن زاردابىن جويۋ، ال وتستاۆكاعا كەلەتىن بولساق، جارىلىس جايلى اقپارات العان ساتتە-اق, وتستاۆكاعا كەتۋ جايلى شەشىم قابىلدادىم. مەن وتستاۆكاعا بەرەمىن، شەشىمدى جوعارى جاق قابىلدايدى", - دەگەن ەدى پرەزيدەنتتى مەڭزەپ.

ارادا ءبىر تاۋلىككە جۋىق ۋاقىت وتكەندە مينيستر ەرمەكباەۆ باق-قا تاعى دا سۇحبات بەرىپ، ءوز وتستاۆكاسى جايلى پىكىر ءبىلدىرىپتى. بۇل جولى مينيستر مىرزا اسكەري قويماداعى جارىلىسقا تىكەلەي ءمينيستردى كىنالاۋدى "ناداندىققا" تەڭەپ سويلەپتى. قاراڭىز:

"ءبىر جاعىنان "مينيستر كىنالى" دەپ ايتۋ - ناداندىق. ويتكەنى ساۋاتتى ادامدار بىلەدى، قارۋلى كۇشتەر ول - كىشى مەملەكەت دەپ ايتۋعا بولادى. بارلىق جۇيەلەر بار، قارۋلى كۇشتەردىڭ ىشىندە. ءبىلىم بەرۋ جۇيەسى، دەنساۋلىق ساقتاۋ جۇيەسى، جاۋىنگەرلىك دايارلاۋ، سولداتتاردى ۇيرەتۋ... بۇل وتە كۇردەلى مەحانيزم. 

ارينە، ءبىر ادام بارىنە قاراپ، قاداعالاۋ وتە قيىن. بىراق، بىزدە سونداي ءبىر قاعيدا بار. ءبىرىنشى جەتەكشى بارىنە جاۋاپ بەرەدى. سول سياقتى مەن كىناسىز بولسام دا، جەكە ءوزىم جازىقسىز بولسام دا، مەن بارىنە جاۋاپ بەرەمىن.

ونىڭ ۇستىنە وفيتسەرلىك، گەنەرالدىق ار-نامىس دەگەن ۇعىم بار. سوعان سايكەس، مەن ارينە، وتستاۆكاعا بەرەمىن. وتستاۆكا سۇرايمىن. بىراق، جوعارعى باس قولباسشى جانە مەملەكەت باسشىلارى قانداي شەشىم قابىلدايدى، ونى مەن ايتا المايمىن. 

قازىر مەنىڭ مىندەتىم - اپاتتىڭ سالدارىن جويۋ", - دەپتى مينيستر ەرمەكباەۆ.

وسىدان ەكى جىل بۇرىن ارىس قالاسىندا قارۋ-جاراق، وق-ءدارى ساقتالعان تاعى ءبىر اسكەري قويما جارىلعان. جارىلىس بولعان كۇنى مىڭداعىن ءۇي زاقىمدانىپ، ارىستىڭ 40 مىڭنان استام تۇرعىنى شىمكەنت قالاسى مەن توڭىرەگىندەگى ەلدى-مەكەندەرگە ەۆاكۋاتسيالانعان بولاتىن. ولار كەيىنىرەك ارىسقا قايتا ورالعان. رەسمي مالىمەت بويىنشا، قالاداعى 7527 ءۇي مەن كوپقاباتتى 103 تۇرعىن ءۇي زاقىمدانعان. پايدالانۋعا جارامسىز بولىپ قالعان 420 ءۇي مەن 3 كوپقاباتتى تۇرعىن ءۇي قۇلاتىلعان. جارىلىستان 4 ادام قازا تاۋىپ، 80-نەن استام جان جارالانعان ەدى. سول جارىلىستىڭ شىعىنىن اقوردا بيلىگى 173 ملرد تەڭگە دەپ ەسەپتەگەن.

ول كەزدە دە قورعانىس ءمينيسترى - نۇرلان ەرمەكباەۆ مىرزا ەدى. ول كەزدە دە جۇرت قورعانىس سالاسىنىڭ تىكەلەي جاۋاپكەر ءمينيسترى - ەرمەكباەۆتىڭ وتستاۆكاسىن تالاپ ەتكەن. الايدا ارىستاعى جارىلىسقا قاتىستى مينيستر ەرمەكباەۆ كەشىرىم سۇراۋدان باس تارتىپ، وتستاۆكا جايلى جاق اشپاعان ەدى. جارىلىستى "تابيعي اپاتقا" تەڭەگەن.

"بۇل ءبىزدىڭ كىنامىز دەۋگە بولمايدى. بۇل تابيعي اپات. ءاربىر ارسەنالدىڭ قاۋىپى بار. ازىرگە حالىقتان كەشىرىم سۇراۋدىڭ ەش سەبەبىن كورىپ تۇرعان جوقپىن", - دەگەن ەدى.

ارينە، زاڭى سويلەيتىن زايىرلى قوعامدا مينيستر ارىستاعى جارىلىستان كەيىن-اق، ورنىنان كەتەر ەدى. جاي كەتپەي، توم-توم ءىس ارقالاپ، سوت تابالدىرىعىن توزدىرار ما ەدى. بىراق، ەرمەكباەۆ مىرزا وتىرعان ورنىنان قوزعالعان جوق.

ارادا ەكى جىل وتكەندە وقيعا تاعى قايتالاندى. تاعى دا اسكەري قويمادان ءورت شىقتى، ارتى الاپات جارىلىسقا ۇلاستى. قازا تاپقاندار سانى از ەمەس. 13 ادام. جۇزگە جۋىعى ءتۇرلى دەنە جاراقاتىن الدى. تاعى دا ارنايى كوميسسيا قۇرىلدى. ونى ۆيتسە-پرەمەر رومان سكليار باسقاراتىن بولدى. پرەزيدەنت توقاەۆ شۇعىل جيىن وتكىزىپ، ۇكىمەتكە تاپسىرما بەردى. 29 تامىزدى جالپىۇلتتىق ازا تۇتۋ كۇنى ەتىپ جاريالادى...

اۋەلدە، "جارىلىس تۋرالى ەستىگەن العاشقى ساتتە-اق، وتستاۆكاعا كەتۋ تۋرالى شەشىمگە كەلدىم", - دەگەن ەرمەكباەۆ مىرزاعا قاراپ، "ارىستان كەيىن ارىنا جۇگىنگەن بە", - دەگەن ەدى جۇرت. سويتسەك، بۇگىن: "مەنىڭ كىنام جوق بولسا دا، وتستاۆكاعا كەتەمىن", - دەپ رەنجىگەندەي بولىپتى. ول از دەسەڭىز: ء"مينيستردى كىنالاۋ - ناداندىق", - دەپ سويلەپتى.

ال ءمينيستردىڭ مۇنىسىنا ءسىز نە دەيسىز، وقىرمان؟..

Abai.kz