قر قورعانىس مينيسترلىگى تۇجىرىمداما جوباسىن مەملەكەت باسشىسىنىڭ 2019 جىلعى 2 قىركۇيەكتەگى قازاقستان حالقىنا جولداۋىن ىسكە اسىرۋ اياسىندا ازىرلەدى. بۇل قۇجاتتى دايىنداۋعا ۇزاقمەرزىمدى پەرسپەكتيۆاداعى دامۋعا قاتىستى بولجامداردى ەسكەرە وتىرىپ، قازىرگى اسكەري-ساياسي احۋال مەن شەت مەملەكەتتەردەگى اسكەري قۇرىلىستىڭ ۇردىستەرى نەگىز بولدى.

قر قاۋىپسىزدىك كەڭەسىنىڭ اپپاراتى تۇجىرىمداما جوباسىن جان-جاقتى پىسىقتاعاننان كەيىن، قۇجات بيىلعى جىلعى مامىردا قر قاۋىپسىزدىك كەڭەسىنىڭ وتىرىسىندا ماقۇلداندى. تۇجىرىمدامادا اسكەري قاۋىپسىزدىك ورگاندارىن 2030 جىلعا دەيىن قالىپتاستىرۋدىڭ جانە دامىتۋدىڭ نەگىزگى پرينتسيپتەرى مەن ۇستانىمدارى قامتىلعان. بۇل قۇجات اياسىندا اتقارىلاتىن ءىس-شارالار مەملەكەتتىڭ قورعانىس قابىلەتىن ارتتىرۋعا، قارۋلى كۇشتەردىڭ، باسقا دا اسكەرلەر مەن اسكەري قۇرىلىمداردىڭ جاۋىنگەرلىك ازىرلىگىن قامتاماسىز ەتۋگە، سونىڭ ىشىندە داعدارىس جاعدايىنداعى ارەكەت ەتۋ مۇمكىندىكتەرىن كەڭەيتۋگە باعىتتالعان.

قازاقستان تاريحىندا العاش رەت اۋە-عارىشتىق جانە زىمىران شابۋىلىنا قارسى قورعانىستىڭ ءتيىمدى جۇيەسىنىڭ ەلەمەنتتەرىن قالىپتاستىرۋ جوسپارلانىپ وتىر.

ەلدىڭ وراسان زور اۋماعىن جانە شەكارالاردىڭ ۇزاقتىعىن ەسكەرە وتىرىپ، اسكەري-كولىك اۆياتسياسىنىڭ كۇشتەرى مەن قۇرالدارىن جەتىلدىرۋ ارقىلى اسكەرلەردىڭ موبيلدىلىگىن ارتتىرۋ شارالارى قاراستىرىلعان.

سونداي-اق، ارنايى وپەراتسيالاردى ورىندايتىن كۇشتەردى دامىتۋعا باسا ءمان بەرىلگەن. قوعامنىڭ بارلىق سالاسىن تسيفرلاندىرۋ شەڭبەرىندە قارۋلى كۇشتەردىڭ كيبەر- جانە اقپاراتتىق كەڭىستىكتەگى ءىس-ارەكەتتەر جونىندەگى الەۋەتى كۇشەيتىلەدى.

«قوس ماقساتتاعى»، ياعني سوعىس جانە بەيبىت ۋاقىتتا، سونىڭ ىشىندە توتەنشە جاعدايلاردىڭ سالدارىن جويۋ ءۇشىن قولدانىلاتىن كومپونەنتتەردى دامىتۋ جوسپارلانعان. ەڭ الدىمەن، مۇنداي قۇرامدارعا اسكەري مەديتسينا، رادياتسيالىق، حيميالىق جانە بيولوگيالىق قورعانىس اسكەرلەرى، ينجەنەرلىك اسكەرلەر، اسكەري-كولىكتىك اۆياتسيا جاتقىزىلدى.

جاۋىنگەرلىك ازىرلىكتى ارتتىرۋ، اسكەري بولىمدەردىڭ وڭتايلى ورنالاسۋىن، اسكەري ينفراقۇرىلىمنىڭ قالىپتاسۋىن، سونىمەن قاتار تۇرعىنداردىڭ قاۋىپسىزدىگىن قامتاماسىز ەتۋ ماقساتىندا ءتيىستى ينفراقۇرىلىمى بار كەشەندى اسكەري بازالاردى قۇرۋعا بىرتىندەپ كوشۋ جوسپارلانۋدا.

سونداي-اق اسكەري ءبىلىم بەرۋ، مانساپتىق ءوسۋ، اسكەري قىزمەتشىلەردى مورالدىق جانە ماتەريالدىق تۇرعىدان ىنتالاندىرۋ، قۇقىقتىق ءتارتىپ پەن اسكەري ءتارتىپتى نىعايتۋ، جاستارعا اسكەري پاتريوتتىق تاربيە بەرۋ شارالارىن جۇزەگە اسىرۋ كوزدەلگەن.

قارۋلى كۇشتەردى جاراقتاندىرۋدىڭ نەگىزگى باعىتتارى بەلگىلەنگەن. بۇل وتاندىق قورعانىس ونەركاسىبى كەشەنى تاراپىنان قامتاماسىز ەتىلەتىن بولادى جانە كاسىپورىنداردىڭ ءوندىرىستى بارىنشا ءتيىمدى جوسپارلاۋىنا مۇمكىندىك بەرەدى.

جالپى بۇل تۇجىرىمدامانى ىسكە اسىرۋ مەملەكەتتىڭ قورعانىس قابىلەتىن جانە اسكەري قاۋىپسىزدىكتىڭ زاماناۋي قاتەرلەرىنە قارسى دايارلىعىن ارتتىرۋعا جانە بەيبىت ۋاقىتتاعى مىندەتتەردى ءتيىمدى ورىنداۋعا باعىتتالعان.

قازىرگى اسكەري قاقتىعىستاردى ەسكەرە وتىرىپ، جاڭا تۇجىرىمدامادا كوزدەلگەن تاسىلدەرگە سايكەس، بيىلعى 6-23 قىركۇيەك ارالىعىندا قازاقستان اۋماعىندا «وتپانتاۋ-2021» كەشەندى اسكەري وقۋ-جاتتىعۋ جيىنى وتكىزىلدى.

وقۋ-جاتتىعۋ جيىنى بارىسىندا اسكەري قاتەرلەر كەزىندەگى قارۋلى كۇشتەردىڭ كوماندالىق-باسقارۋ ورگاندارى مەن اسكەري بولىمدەرىنىڭ، شەكارا قىزمەتىنىڭ، ۇلتتىق ۇلاننىڭ، توتەنشە جاعدايلار مينيسترلىگىنىڭ، سونداي-اق جەرگىلىكتى اتقارۋشى، ارنايى مەملەكەتتىك جانە قۇقىق قورعاۋ ورگاندارىنىڭ ءوزارا ءىس-قيمىلى تەكسەرىلدى.

التى وبلىستا سوعىس جاعدايى ەنگىزىلگەن كەزدەردەگى وبلىستاردىڭ قورعانىس كەڭەستەرىنىڭ جۇمىستى ۇيىمداستىرۋى تەكسەرىلدى. جەتى وقۋ-جاتتىعۋ پوليگونىندا اسكەرلەر سوعىستىڭ جاڭا فورمالارى مەن ادىستەرىن، قۇرلىقتا جانە اۋەدەگى جاۋعا قارسى تۇرۋ ماسەلەلەرىن پىسىقتادى، سونىمەن قاتار كاسپي تەڭىزىنىڭ سۋ ايدىنىندا دەسانتقا قارسى جاتتىعۋ وپەراتسياسىن جۇرگىزدى.

جاڭادان الىنعان قارۋ-جاراق پەن اسكەري تەحنيكانىڭ، سونىڭ ىشىندە سۋ-30سم ۇشاقتارى، مي-35 تىكۇشاقتارى، جاڭا ۇشقىشسىز ۇشۋ اپپاراتتارى، اۋە شابۋىلىنا قارسى قورعانىس جۇيەلەرى مەن راديوەلەكتروندى كۇرەس جۇيەلەرىنىڭ جاۋىنگەرلىك دەڭگەيلەرى سىنالدى.

قازاقستان الەمدىك گەوساياسي شيەلەنىستەردىڭ ۋشىعۋىنا قاراپ، ايماقتاعى تەررورلىق (اۋعانستان) جانە سەپاراتيزمنىڭ ارتۋىنا (رەسەيدىڭ ۋكرايناداعى ارەكەتى) قاراي اسكەري سالانى قازىرگى زامان تالابىنا ساي جاساقتاۋ مەن جىلدام ارەكەت ەتۋ جاعىن پىسىقتاۋدا.

Abai.kz