اقش قاراشا ايىنان باستاپ ۆاكتسينا قابىلداعانداردى ەلگە كىرگىزۋ ءتارتىبىن وزگەرتەتىنىن مالىمدەدى. اقش جەرىنە ددسۇ مويىنداعان ۆاكتسينالاردى العان جاندار ەركىن كىرسە، باسقا ۆاكتسينا العاندار كىرگىزىلمەۋى مۇمكىن.

قىركۇيەك ايىندا اقش بارلىق ۆاكتسينا قابىلداعان تۋريستەردى ەلگە كىرگىزەتىنىن مالىمدەدى. قازىر اقش-قا 14 كۇننىڭ ىشىندە يران، ۇلىبريتانيا، يرلانديا، برازيليا، ءۇندىستان مەن وار جانە شەنگەن ايماعىندا بولعان ازاماتتار كىرە المايدى. سەبەبى اتالمىش ەلدەردە ۆيرۋس ءورشىپ تۇر. بۇل تىزىمدە قازاقستان جوق، سوندىقتان قازاقستاندىقتار ەركىن تۇردە ۆيزا جانە پتر تەست ارقىلى اقش-قا ساياحاتتاي الادى. ازىرگە.

قىركۇيەكتىڭ باسىنداعى ەرەجە بويىنشا اقش-قا كەز كەلگەن ەلدەن ۇشىپ كەلۋگە بولاتىن. ول ءۇشىن بار بولعانى ۆاكتسينا سەرتيفيكاتى، ءۇش كۇن ىشىندە جاسالعان پتر تەست كورسەتسەڭىز بولعانى، ءتىپتى اقش-تا كارانتينگە دە جابىلمايتىن ەدىڭىز.تەك قانا كانادا مەن مەكسيكانىڭ قۇرلىقتىڭ شەكاراسىنان ءوتۋ مۇمكىن ەمەس ەدى. الايدا اتالمىش ەرەجەلەر 27-قىركۇيەكتە وزگەردى.

27 قىركۇيەك كۇنى اقشتا پاندەميالىق ساياساتتى رەتتەۋ بويىنشا باسشى دجەفف زايەنتس ەندى تەك قانا ددسۇ مويىنداعان ۆاكتسينالاردى قابىلداعاندار عانا ەلگە كىرۋى مۇمكىن ەكەنىن، ول بويىنشا ءالى ناقتى شەشىم شىقپاعانىن ايتتى. شەشىمدى كوروناۆيرۋستى باقىلاۋ ورتالىعىمەن بىرىگە وتىرىپ قابىلداماق.

ال 28 قىركۇيەك كۇنى ددسۇ وكىلى مارگارەت حارريس ۆاكتسينالاردى مويىنداۋ بىرنەشە كەزەڭنەن تۇراتىنىن جانە تەكسەرۋ بارىسىندا ۆاكتسينانىڭ كەرى اسەرى، قاۋىپسىزدىگى، جاسالۋ پروتسەسى مەن ناقتى اۋرۋدى تەجەۋ اسەرى زەرتتەلەتىنىن ايتتى.

قازىرگى تاڭدا ددسۇ مويىنداعان ۆاكتسينالار قاتارىندا جەتى ۆاكتسينا بار. ولار Moderna (اقش), Pfizer/BioNTech (گەرمانيا/اقش), Johnson&Johnson (اقش), AstraZeneca (شۆەتسيا/ۇلىبريتانيا), Covishield (AstraZenecaنىڭ ۇندىلىك ءتۇرى), Sinopharm جانە Sinovac (قىتاي).

ال قازاقستاندا قولدانۋعا رۇقسات ەتىلىپ، رەسمي تىركەلگەن بەس ۆاكتسينا بار. ولار QazVac (قازاقستان), Sinopharm (Hayat Vax), Sinovac, "سپۋتنيك V" جانە  "سپۋتنيك لايت" (رەسەي). حالىقتىڭ باسىم بولىگى "سپۋتنيك V" ۆاكتسيناسىن العان. ونىڭ باستى سەبەبى ۇكىمەت 10 ملن دوزا اتالمىش ۆاكتسينانى ساتىپ الىپ، ۇزاق ۋاقىت بويى حالىققا تاڭداۋ مۇمكىندىگى بەرىلمەدى. قىتايلىق جانە وتاندىق ۆاكتسينالار سانى تىم از بولدى جانە تەز تاۋسىلىپ قالدى. ەگەر اقش-تا اتالمىش وزگەرىستەر جاقىن ارادا بەكىتىلەتىن بولسا، وندا قازاقستاننان تەك قانا Sinopharm مەن Sinovac ونىمدەرىن العان جاندار عانا اقش-قا بارا الماق. ەستەرىڭىزدە بولسا سوڭعى ەكى ايدا Sinopharm كومپانياسىنىڭ VeroCell اتتى 4 ملن دوزا ۆاكتسيناسى جەتكىزىلدى. مينيستر تسوي بولسا ءالى بەرگەن ۋادەسىن ورىنداماي، Pfizer/BioNTech ونىمدەرىن ەلگە اكەلۋ جولىن تاپپادى.

اقش-تاعى وزگەرىسكە رەسەي حالقى نارازىلىق ءبىلدىرىپ جاتىر. رەسەي بيلىگى "سپۋتنيك V" الەمدەگى كوروناۆيرۋسقا قارسى العاشقى ۆاكتسينا بولسا دا، ونى ددسۇ تىركەمەي وتىرعانىنا نارازى. سپۋتنيكتى تىركەۋ جۇمىستارى 2021 جىلدىڭ كوكتەمىندە باستالسا دا، تىركەۋ جۇمىستارى تىم باياۋ جۇرۋدە. ال 2021 جىلدىڭ 15 قىركۇيەگىندە ددسۇ سپۋتنيكتى تىركەۋ جۇمىستارىن توقتاتقانىن مالىمدەدى، سەبەبى ۆاكتسينانى شىعارۋشى فابليكا ددسۇ ينسپەكتسياسىنان وتە الماعان. قاتەلىكتەردى جوندەۋگە رەسەيگە كەمى التى اي ۋاقىت قاجەت.

قازاقستان دا ءوز ۆاكتسيناسىن ددسۇعا تىركەتۋ جۇمىستارىن جۇرگىزىپ جاتىر. الداعى التى اي ىشىندە وتاندىق ۆاكتسينانى تىركەۋ جۇمىستارى ءوز ناتيجەسىن بەرۋى مۇمكىن. ءۇش كەزەڭدىك تەكسەرۋدىڭ العاشقى ەكى كەزەڭىندە قازاقستاندىق ۆاكتسينا ءوز تيىمدىلىگى مەن قاۋىپسىزدىگىن كورسەتكەن.

Abai.kz