بىلتىر قىركۇيەكتە رەفورمالار جونىندەگى ارنايى كەڭەس قۇرىلدى. پرەزيدەنت توقاەۆ ارنايى قاۋلى شىعاردى. توراعا – قاسىم-جومارت توقاەۆتىڭ ءوزى بولدى. ورىنباسارلىققا سۋما چاكرابارتي دەگەن ءۇندى ازاماتىن تاعايىندادى. ۇكىمەت باسشىسى اسقار مامين باستاپ، قوشانوۆ، دوساەۆ، كەلىمبەتوۆ، ابىلقاسىموۆا، يسەكەشەۆ، سۇلەيمەنوۆ پەن قۇلىباەۆتار مۇشە بولدى.

ەكونوميكا، ونەركاسىپ، قارجى، الەۋمەتتىك جانە باسقا دا سالالاردا تۇبەگەيلى رەفورمالار جۇرگىزەدى دەپ قۇرىلعان رەفكەڭەس تىكەلەي پرەزيدەنتكە باعىناتىن.

الىستان اتتاي قالاپ الدىرعان چاكرابارتي باستاعان رەفكەڭەس وسى ءبىر جىل ىشىندە ءۇنسىز جاتتى. ءبىرلى-جارىم كەڭەس وتكىزىپتى دەگەندى عانا ەستىدىك. ايتپەسە، ناقتى ۇسىنىس، ناقتى جوبالارى جۇرت تالقىسىنا شىققان جوق. سويتكەن رەفكەڭەس 10 ۇلتتىق جوبانى ازىرلەپ، ۇكىمەتتە تالقىلاپ، پرەزيدەنتكە ماقۇلداتىپ قويىپتى. اقوردا الگى 10 جوبانى رەسمي جاريالاپ، تاراتتى. قاراڭىز:

اۋەلى 12 قازاندا (ەكى كۇن بۇرىن) اسقار مامين توراعالىق ەتكەن ۇكىمەت وتىرىسىندا 10 ۇلتتىق جوبانىڭ ماقۇلدانعانى تۋرالى اقپارات جاريا بولدى. ونان سوڭ اقوردانىڭ رەسمي سايتى پرەزيدەنت توقاەۆتىڭ ارنايى جارلىعىن جاريالادى.

سونىمەن، 10 ۇلتتىق جوبا. ول قانداي جوبا؟

ۇلتتىق جوبالار تىزبەسى

1. «دەنى ساۋ ۇلت» ءاربىر ازامات ءۇشىن ساپالى جانە قولجەتىمدى دەنساۋلىق ساقتاۋ» ۇلتتىق جوباسى.

2. «ءبىلىمدى ۇلت» ساپالى ءبىلىم بەرۋ» ۇلتتىق جوباسى.

3. «ۇلتتىق رۋحاني جاڭعىرۋ» ۇلتتىق جوباسى.

4. «تسيفرلاندىرۋ، عىلىم جانە يننوۆاتسيالار ەسەبىنەن تەحنولوگيالىق سەرپىلىس» ۇلتتىق جوباسى.

5. كاسىپكەرلىكتى دامىتۋ جونىندەگى ۇلتتىق جوبا.

6. «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى.

7. «قازاقستاندىقتاردىڭ ءال-اۋقاتىن ارتتىرۋعا باعىتتالعان ورنىقتى ەكونوميكالىق ءوسۋ» ۇلتتىق جوباسى.

8. «جاسىل قازاقستان» ۇلتتىق جوباسى.

9. اگروونەركاسىپتىك كەشەندى دامىتۋ جونىندەگى ۇلتتىق جوبا.

10. «قاۋىپسىز ەل» ۇلتتىق جوباسى.

بۇل جوبالار پرەزيدەنتتىڭ 2021 جىلدىڭ 7 قازانىنداعى №670-ءشى جارلىعىمەن بەكىتىلگەن ەكەن.

رەفكەڭەس ازىرلەپ، ۇكىمەت ماقۇلداپ، پرەزيدەنت قول قويعان 10 ۇلتتىق جوبانى تالقىلاۋعا قوعام مەن پارلامەنت وكىلدەرى قاتىسپاعان ەكەن.

ساياساتكەر ءامىرجان قوسان: «قوعام مەن پارلامەنت تالقىلاۋعا قاتىسپاعان 10 جاڭا جوباعا 36 تريلليون تەڭگە جۇمسالماق. پرەزيدەنت ۇكىمەت پەن ءوزىنىڭ رەفورما جونىندەگى جوعارعى كەڭەسى دايىنداعان 10 ۇلتتىق جوبانى بەكىتتى. ولاردىڭ قۇنى 36 تريلليوننان اسادى (ەكى جوبانىڭ قۇنى ءالى بەلگىسىز). سوندا قوعام مەن پارلامەنت قايدا؟ ول جوبالاردى تالقىلاۋعا نەگە وسى ەكى ينستيتۋت قاتىستىرىلمادى؟ شەندىلەر وسىنشاما قارجىنى جۇمساۋعا نەەگ اسىعىپ وتىر؟ وسىندايدا ءوزىن وپپوزيتسيا سانايتىن پارتيالار مەن حالقىم دەگەن دەپۋتاتتار نەگە ءۇنسىز قالادى ەكەن، ءا؟ الدە ءبارىنىڭ اۋزىن جاۋىپ قويدى ما»، - دەيدى.

تاعى ءبىر ساياساتكەر توعجان قوجالى ءوزىنىڭ Facebook-تەگى پاراقشاسىندا سالىستىرۋ ءۇشىن رەسەي فەدەراتسياسى ۇكىمەتى قابىلداعان 12 ۇلتتىق جوبانىڭ ءتىزىمىن جاريالاپ: «قر ۇكىمەتى ماقۇلداعان 10 ۇلتتىق جوبانىڭ تاقىرىپتارى جاقسى. ەندى سول جوبالاردىڭ تولىق قۇجاتتارىمەن تانىسساق، ولاردى جۇزەگە اسىرۋدىڭ جوسپارىنع باعىتىن بىلسەك جاقسى»، - دەيدى.

راس، كوپشىلىك ۇلكەن ءۇمىت كۇتپەسە دە، پرەزيدەنت رەفورما جاساۋ جونىندە كەڭەس قۇردى. وعان جەتەكشىلىك ەتۋگە سۋما چاكرابارتي دەگەن ماماندى شاقىردى. سەگىز جىل بويى ەۋرازيالىق دامۋ جانە قايتا قۇرۋ بانكىن باسقارعان ۇندىستاندىق ەندى توقاەۆپەن بىرگە رەفورما جاسايدى دەدىك.

اۋەل باستا، الەمدىك دەڭگەيدەگى ەكونوميستى كەڭەسشى ەتىپ العانىمەن، رەفورما جونىندەگى كەڭەستىڭ ءىرى وزگەرىستەر جاساي قويۋى ەكىتالاي ەكەنىن جۇرتتىڭ ءىشى سەزگەندەي بولدى. سەبەبى كەڭەستىڭ وزگە مۇشەلەرىنە قاراپ، «قوياندى كورىپ، قالجاسىنان تۇڭىلگەندەي» بولدىق. ءتىپتى، ولاردىڭ كەيبىرى بۇرىنعى جۇمىستارىندا ساتسىزدىككە ۇشىراپ، قىزمەتىنەن قۋىلعاندار ەدى. كەڭەس مۇشەلەرىنىڭ ءبارى ەسكى جۇيەنىڭ ادامدارى. تىڭ يدەيا، جاڭا كوزقاراسپەن ىسكە كىرىسەدى دەگەنگە سەنۋ قيىن. اتاۋى دارداي بولعان بۇل ۇلتتىق جوبالاردىڭ دا اياعى بورداي بولىپ، وسىعان دەيىن قابىلدانعان مەملەكەتتىك جوبالار سەكىلدى ىڭعاي كوزبوياۋشىلىققا ۇلاسپاي ما؟ ءسىز نە دەيسىز؟

نۇرگەلدى ابدىعانيۇلى

Abai.kz