بۇل تۋرالى قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ الاڭىندا وتكەن ءباسپاسوز كونفەرەنتسياسى بارىسىندا اقپارات جانە قوعامدىق دامۋ ءمينيسترى ايدا بالاەۆا حابارلادى. ونىڭ ايتۋىنشا، «ۇلتتىق رۋحاني جاڭعىرۋ» جوباسى ءۇش نەگىزگى باعىت بويىنشا جۇزەگە اسىرىلادى.

- ءبىرىنشى باعىت بويىنشا ەلباسى مەن مەملەكەت باسشىسىنىڭ يدەيالىق باستامالارى نەگىزىندە ىسكە اسىرىلىپ جاتقان «رۋحاني جاڭعىرۋ» باعدارلاماسىنا جاڭا لەپ بەرۋ. سول ارقىلى ۇلتتىق قۇندىلىقتارىمىزدى ىلگەرىلەتۋ جانە مەملەكەتتىك ءتىلدى دامىتۋ كوزدەلىپ وتىر. اتاپ ايتقاندا، حالىق اراسىندا ۇتىمدى سالت-ءداستۇر مەن ادەت-عۇرىپتاردى، ەلدىك ءتالىم-تاربيە مەن رۋحاني ۇستەمدىكتى دارىپتەۋ جانە قوعامدىق سانانىڭ مادەنيەتىن، دەڭگەيى مەن تالعامىن كوتەرۋ ارقىلى وركەنيەت كوشىنە ىلەسەتىن باسەكەگە قابىلەتتى جاڭا ۇلت كەلبەتىن جاساۋ، - دەپ اتاپ ءوتتى ۆەدومستۆو باسشىسى.

ال باعىتتىڭ ەكىنشى ماڭىزدى مىندەتى – مەملەكەتتىك ءتىلدىڭ قولدانىلۋ اياسىن كەڭەيتۋ.

- ويتكەنى ۇلتتى ساقتاۋ دەگەنىمىزدىڭ ءوزى – ءتىلدى ساقتاپ، دامىتۋ ەكەندىگى بەلگىلى. مەملەكەت باسشىسى قازاق ءتىلىنىڭ بولاشاقتا ۇلتارالىق تىلگە اينالاتىنىنا سەنىم بىلدىرگەنىن بىلەسىزدەر. وعان بۇگىندە بارلىق نەگىز بار. مەملەكەتتىك تىلگە دەگەن قوعامنىڭ سۇرانىسى ارتىپ كەلەدى. بۇل ۋاقىت تالابى، - دەدى مينيستر.

سوندىقتان بۇل ماسەلەلەردە بىرقاتار اۋقىمدى جوبالار قاراستىرىلىپ وتىر.

- اتاپ ايتقاندا، مەملەكەتتىك ءتىلدى وقىتۋ بويىنشا يننوۆاتسيالىق ءىت-ونىمدەر ازىرلەۋ، تانىمال انيماتسيالىق جانە تانىمدىق ارنالاردى قازاقشالاۋ. ورتا ءبىلىم بەرۋدىڭ تىلگە قاتىستى باعدارلامالارىنا وزگەرىستەر ەنگىزۋ، تەحنيكالىق جانە كاسىپتىك ءبىلىم بەرۋ ۇيىمدارى ءۇشىن قازاق تىلىندەگى وقۋلىقتار ازىرلەۋ سياقتى جۇيەلى ءىس-شارالار بار، - دەيدى اقپارات جانە قوعامدىق دامۋ ءمينيسترى.

Abai.kz