قازاقستان بيلىگى مەن Facebook اراسىندا ارنايى كەلىسىم جاسالدى دەگەن اقپارات، بۇگىنگى تاڭدا ەڭ باستى تاقىرىپتاردىڭ بىرىنە اينالدى. الايدا بۇل تۇرعىدان ەكى ءتۇرلى اقپارات قوعامدى ەكىگە جاردى.  

«Facebook قازاقستان ۇكىمەتىمەن، اسىرەسە بالالاردىڭ ينتەرنەتتەگى قاۋىپسىزدىگىن قامتاماسىز ەتۋ باعىتىندا بىرلەسكەن جۇمىسقا ۇمتىلادى. ءبىزدىڭ ۇزاق مەرزىمدى ىنتىماقتاستىعىمىزدىڭ العاشقى قادامى رەتىندە ءبىز قازاقستان ۇكىمەتىنە ۋاكىلەتتى ورگاندارعا زياندى كونتەنتپەن نەعۇرلىم ءتيىمدى جانە پارمەندى كۇرەسۋگە كومەكتەسەتىن «كونتەنتتى حابارلاۋ جۇيەسىنە» قول جەتكىزۋگە قۋانىشتىمىز. Facebook كومانداسى كيبەركەڭىستىكتىڭ قاۋىپسىزدىگىن قامتاماسىز ەتۋ ماقساتىندا قازاقستاندىق مامانداردى وقىتۋدى جالعاستىرادى», - دەپ Facebook كومپانياسىنىڭ جۇرتشىلىقپەن بايلانىس جونىندەگى وڭىرلىك ديرەكتورى دجوردج چەن مالىمدەگەن بولاتىن.

ارتىنشا: «كونتەنت حابارلاما جۇيەسىن» پايدالانۋ Facebook جانە Instagram پلاتفورمالارىندا قۇقىققا قارسى كونتەنتتىڭ تارالۋىنا قارسى ءىس-قيمىل بويىنشا جۇرگىزىلىپ جاتقان جۇمىستىڭ جەدەلدىگىن جانە جالپى تيىمدىلىگىن ارتتىرۋعا مۇمكىندىك بەرەدى. وسى مۇمكىندىكتى پايدالانا وتىرىپ، قاۋىپسىز اقپاراتتىق كەڭىستىكتى قۇرۋ باعىتىندا جۇرگىزىلىپ جاتقان باعىتتى ۇستاناتىنىن جانە قازاقستان حالقىنا ءوز قىزمەتتەرىن ۇسىناتىن ينتەرنەت-كومپانيالارمەن سىندارلى ديالوگ قۇرۋعا جانە ىنتىماقتاستىق ورناتۋعا دايىن», - دەپ مينيسترلىك مالىمدەگەن بولاتىن.

28 قازاندا Facebook كومانداسى مينيسترلىكتىڭ ماماندارىنا «كونتەنتتى حابارلاۋ جۇيەسىن»، سونداي-اق Facebook كونتەنتتىك ساياساتى جانە قوعامداستىق ستاندارتتارى بويىنشا جۇمىس بويىنشا ترەنينگ وتكىزدى. قاراشا ايىنىڭ باسىنان باستاپ مينيسترلىك جۇيەدە جۇمىس ىستەي باستايتىنى دا ايتىلدى. ەكى تاراپ ءوزارا ءىس-قيمىلدىڭ تۇراقتى تەتىگىن بەلگىلەۋگە، ونىڭ ىشىندە مينيسترلىكپەن ءتۇرلى اسپەكتىلەر بويىنشا تىعىز جۇمىس ىستەيتىن Facebook وڭىرلىك وفيسىنەن ۋاكىلەتتى وكىلدى انىقتاۋ تۋرالى كەلىسىمگە كەلدى دەگەن دە اقپارات ايتىلدى. دەگەنمەن كەشەگى اقپاراتتى بۇگىن Facebook تاراپى جوققا شىعاردى.

Meta Platforms كومپانياسىنىڭ ازيا-تىنىق مۇحيتى ايماعى بويىنشا كوممۋنيكاتسيا ءبولىمىنىڭ ديرەكتورى بەن ماككوناحي قازاق ۇكىمەتىمەن ورتاق مالىمدەمە جاساعانىن تەرىستەدى.

«بىرىنشىدەن، ءبىز قازاق ۇكىمەتىمەن ورتاق مالىمدەمە شىعارعان جوقپىز. قازاق ۇكىمەتى بيلىكتىڭ جەرگىلىكتى زاڭدى بۇزاتىن كونتەنتتەرگە تىيىم سالۋ تۋرالى وتىنىشتەرى بويىنشا وتكەن عالامدىق تالقىلاۋ نەگىزىندە ءوزى مالىمدەمە جاسادى»، - دەپ جازدى.

كومپانيا وكىلىنىڭ ايتۋىنشا، مۇنداي نارسە تەك قازاقستان عانا ەمەس، الەم ۇكىمەتتەرىمەن تالقىلانىپ جاتىر.

بۇل تەرىستەۋگە مينيسترلىك تە لەزدە ءوز جاۋابىن ايتىپ ۇلگەردى. اقپارات ءمينيسترى ايدا بالاەۆا ءوزىنىڭ Facebook پاراقشاسىنا بىلاي دەپ جازدى:

«Facebook كومپانياسىنىڭ بىرىككەن مالىمدەمەنى تەرىسكە شىعارۋىنا قاتىستى. بۇقارالىق اقپارات قۇرالدارىندا «Meta» («Facebook») كومپانياسىنىڭ ازيا-تىنىق مۇحيتى ايماعى بويىنشا وڭىرلىك كەڭسەسىنىڭ كوممۋنيكاتسيالار جونىندەگى ديرەكتورى بەن ماككونەحي مىرزانىڭ (Ben McConaghy) تەرىسكە شىعارعان مالىمدەمەسىنە بايلانىستى قازاقستان رەسپۋبليكاسى اقپارات جانە قوعامدىق دامۋ مينيسترلىگى كەلەسىنى حابارلايدى. اقپارات جانە قوعامدىق دامۋ مينيسترلىگى نەگىزگى كەلىسسوزدەردى گونكونگ قالاسىندا ورنالاسقان قىتاي، موڭعوليا جانە ورتالىق ازيا ءوڭىرى بويىنشا «Meta» («Facebook») كومپانياسىنىڭ وڭىرلىك وفيسىمەن جۇرگىزدى. 1 قاراشادا جاريالانعان بىرىككەن مالىمدەمەنىڭ ءماتىنى مەن ونىڭ باق-دا جارنيالانۋى اتالعان ايماقتىق كەڭسەنىڭ باسشىلىعىمەن تولىقتاي كەلىسىلگەن بولاتىن»، - دەدى.

Facebook كومپانياسىمەن كەلىسىمدى بيلىك بالالار قۇقىعىن قورعاۋعا قاتىستى دەپ مالىمدەسە دە، قوعام ونى الەۋمەتتىك جەلىدەگى ەركىندىكتى شەكتەۋ ماقساتىندا جاسالىنۋدا دەپ كۇدىكتەنۋدە.

Abai.kz