«نۇر جولى» كەدەن بەكەتىندە قازاقستاننان قىتايعا وتە الماعان اۆتوكولىكتەر ۇزىن-سونار كەزەكتە تۇر. 50 كولىك جولدا تۇرسا، 10346 كولىك ەلەكتروندى كەزەك العان. وعان قوسا، وزبەكستانعا وتۋگە كەزەككە تۇرعان كولىكتەر قاراسى كوپ. «اتامەكەن»  ءوتۋ بەكەتىندە 15, «قاپلانبەكتە» 25, «قازىعۇرتتا» 13 كولىك كەزەككە جينالعان.

قازان ايىنان باستاپ، قىتاي قازاقستان جۇك كولىكتەرىن وتكىزبەۋىن جيىلەتتى. قىتاي شەكاراسىنا وتپەكشى بولعان جۇك كولىكتەرىن «قورعاس جۇمىس ىستەپ تۇرعان جوق» دەگەن جەلەۋمەن توقتاتتى. «دوستىق-الاشانكوۋ» شەكارا بەكەتىنەن قازاقستاننان قىتايعا جول تارتقان تاۋلىگىنە 16 ۆاگونى وتەتىن پوەزدار 5-6 ۆاگونعا دەيىن شەكتەلدى. وسى سەبەپتى شەكارا ايماعىنا جەتى مىڭ ۆاگون جينالىپ قالدى.

قازاننىڭ باس كەزىندە قىتاي قازاقستاننان كەلەتىن استىقتى دا قابىلداماي قويدى. وتاندىق تاسىمالداۋشىلار ەكى ەل شەكاراسىندا  ەكىۇداي جاعدايدا قالدى. 21 قازان كۇنى قىتاي قايتادان «قالجات» ءوتۋ بەكەتىنەن قازاقستاندىق جۇك كولىكتەرىنىڭ ءوتۋىن ۇلعايتامىز دەپ ۋادە بەردى.

الايدا، مىنا ءبىر جاعداي وعاش كورىنەدى. قىتايدىڭ قازاقستانمەن تەمىر جول قاتىناسى توقتاپ تۇرسا دا، ەۋروپاعا قاراي  تەمىر جول جۇك تاسىمالى ەداۋىر ارتقان.

Abai.kz