قازاقستان پرەزيدەنتى قاسىم-جومارت توقاەۆ  ءولىم جازاسىن الىپ تاستاۋ تۋرالى زاڭنامالىق وزگەرىستەرگە قول قويدى. بۇل تۋرالى كەشە، 29 جەلتوقساندا مەملەكەت باسشىسىنىڭ ءباسپاسوز قىزمەتى حابارلادى.

«مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءولىم جازاسىن جويۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى», - دەلىنگەن حابارلامادا.

قاڭتار ايىندا توقاەۆ «ازاماتتىق جانە ساياسي قۇقىقتار تۋرالى حالىقارالىق پاكتىگە ءولىم جازاسىن جويۋعا باعىتتالعان ەكىنشى فاكۋلتاتيۆتىك حاتتامانى راتيفيكاتسيالاۋ تۋرالى» زاڭعا قول قويدى. حاتتاما 1989 جىلى 15 جەلتوقساندا نيۋ-يوركتىڭ بۇۇ باس اسسامبلەياسىندا قابىلداندى. قازاقستان سوعىس ۋاقىتىندا ءولىم جازاسىن قولدانۋدى كوزدەيتىن ءبىر ەسكەرتۋمەن حاتتاماعا بيىل قوسىلدى.

2004 جىلدان بەرى ەلدە ءولىم جازاسىنا موراتوري جاريالانعان. بالاما جازا رەتىندە ءومىر بويىنا باس بوستاندىعىنان ايىرۋ ەنگىزىلدى.

Abai.kz