ەلىمىزدەگى جاعدايدى تۇراقتاندىرۋ ماقساتىندا پرەزيدەنت قاسىم جومارت توقاەۆ ۇقشۇ ۇيىمىنا جۇگىنىپ، كومەك بەرۋىن سۇراعان بولاتىن. پرەزيدەنت ءوتىنىشىن بيىل ۇقشۇ توراعالىق ەتەتىن ارمەنيا پرەمەرى نيكول پاشينيان قاراستىرىپ، اسكەر جىبەرۋ تۋرالى ءوتىنىشتى ۇيىمعا مۇشە ەل باسشىلارىمەن تالقىلادى. ۇيىم مۇشەلەرى قازاقستانعا شەكتى ۋاقىتقا بىتىمگەرلىك كۇشتەرىن كىرگىزۋ تۋرالى شەشىم قابىلدادى.

ۇقشۇ ۇيىمىنا قازاقستان، قىرعىزستان، رەسەي، بەلارۋس، ارمەنيا جانە تاجىكستان ەلدەرى مۇشە. ۇيىمنىڭ باستى ماقساتى اتالمىش ەلدەرگە سىرتقى اگرەسسيا بولعان جاعدايدا بىرلەسە تويتارىس بەرۋ. سوندىقتان، پرەزيدەنت قاسىم-جومارت توقاەۆ اسكەر كىرگىزۋ وتىنىشىندە قازاقستانعا باندالىق قۇرىلىمدار مەن تەررورلىق توپتار تاراپىنان اگرەسسيا بولعانىن باسا اتاپ ءوتتى.

ۇقشۇ ۇيىمىنىڭ قازاقستانعا كىرگىزىلۋىنە باتىس تاراپى الاڭداۋشىلىق بىلدىرۋدە. اسىرەسە اقش. اقش-تىڭ مەمحاتشىسى ەنتوني بلينكەن: «قازاقستانعا ۇقشۇ ۇيىمىن كىرگىزۋگە قانداي قاجەتتىلىك بولدى»، - دەپ سۇراق قويىپ، قازاقستان تاراپىنان جاۋاپ كۇتەتىنىن اتاپ ءوتتى. بۇعان دەيىن بلينكەن: «رەسەي كسرو-نى قالپىنا كەلتىرۋ ارەكەتتەرىن جاساۋى مۇمكىن»، - دەگەن بولاتىن. ول سونىمەن قاتار: «ورىستاردىڭ ءبىر كىرگەن جەرىنەن شىقپايتىن جامان ادەتى بار»، - دەپ تە مالىمدەمە جاسادى.

قازاقستان باتىستىڭ بۇل سۇراقتارىنا ناقتى جاۋاپ بەردى. «ۇقشۇ شەكتەۋلى ۋاقىتقا عانا كەلدى جانە جاعداي تۇراقتالعان سوڭ كەرى شىعارىلادى. ول بويىنشا بۇۇ-عا ارنايى اقپارات بەرىلگەن»، - دەدى قازاقستان تاراپى.

10 قاڭتاردا قازاقستاننىڭ ۇسىنىسى بويىنشا ۇقشۇ-نىڭ جەدەل وتىرىسى ءوتتى. وعان ۇيىمعا مۇشە ەل باسشىلارى قاتىسىپ، قازاقستانداعى جاعدايدى تالقىلادى. قازاقستان باسشىسى قاسىم-جومارت توقاەۆ قازاقستانعا تەررورلىق اگرەسسيا بولعانىن، سودىرلاردىڭ ساقالدارىن قىرىپ، كيىمدەرىن اۋىستىرىپ، جاسىرىنۋ ارەكەتتەرىن جاساپ جاتقانىن، ولاردىڭ باستى ماقساتى الماتىنى باسىپ الىپ، ارتىنشا ەل استاناسىنا شابۋىل جاساۋعا تىرىسقانىن، لاڭكەستەر مايىتتەردى جاسىرۋ ءۇشىن ءتۇرلى ارەكەتتەرگە بارىپ، ءىزىن سۋىتپاق بولعانىن باسا ايتتى. حالىقارالىق قاۋىمداستىققا قاجەت بولسا تەررورلىق ارەكەت بولعانىن ناقتى دالەلدەيتىن دالەلدەردى كورسەتۋگە دايىن ەكەنىن مالىمدەدى.

قازاقستانڭا 2030 ۇقشۇ ساربازى مەن 250 اسكەري تەحنيكاسى كىرگىزىلدى. ولار ەلدەگى ءتۇرلى نىسانداردى كۇزەتۋ ۇستىندە. ۇقشۇ اسكەرى الداعى بىرنەشە اپتا ىشىندە شىعارىلۋى مۇمكىن.

Abai.kz