ءاليحان سمايىلوۆقا پرەزيدەنتىمىز دە، حالىق تا بارلىق مۇمكىندىكتى بەرىپ، زور سەنىممەن قاراپ وتىر. سول سەنىمدى اقتاسا ەكەن. «اكەلەر وداعى» رەسپۋبليكالىق قوعامدىق بىرلەستىگىنىڭ توراعاسى ماقسۇتبەك ايتماعانبەت جاڭا ۇكىمەت باسشىسىنىڭ تاعايىندالۋىنا قاتىستى شەشىمىن قولدايدى.

ء"اليحان سمايىلوۆ مىرزا جايلى ايتۋ ءالى ەرتەرەك. ۇكىمەت تولىعىمەن جاساقتالعاندا عانا پىكىر بىلدىرگەن دۇرىس سياقتى. ول ءوزى جالعىز ەمەس، كابينەت بولىپ جۇمىس اتقاراتىن بولعاندىقتان مينيسترلىكتەرگە حالىققا جانى اشيتىن، قارا حالىقتىڭ قالاي كۇن كورىپ جاتقانىن ىشتەن بىلەتىن ادامداردىڭ كەلگەنى دۇرىس. كولىكتەرىنەن تۇسپەي، حالىققا ماشيناسىنىڭ تەرەزەسىنەن قارايتىن باستىقتاردىڭ ۋاقىتى وتكەنىن اركىم تۇسىنگەن شىعار. سوندىقتان، ۇكىمەتكە ۇلتجاندى ادامدار كەلۋ كەرەك. ءبارى سوعان بايلانىستى بولادى. ال ءاليحان سمايىلوۆقا پرەزيدەنتىمىز دە، حالىق تا بارلىق مۇمكىندىكتى بەرىپ، زور سەنىممەن قاراپ وتىر. سول سەنىمدى اقتاسا ەكەن", - دەدى ول.

ماقسۇتبەك ايتماعانبەت "ەستۋشى مەملەكەت” اتتى كونتسەپتسياسىنا قاتىستى ويىن دا ءبىلدىردى. "ەڭ باستىسى، ەل اۋىزىندا تالاي ۋاقىت ايتىلىپ جۇرگەن نارسەلەردى پرەزيدەنت توقاەۆتىڭ ۋىسىنان ەستىگەنىمە ريزامىن. بارلىق ماسەلەلەر بۇدان بىلاي تەك قانا اشىق ايتىلىپ، اشىق تالقىلانۋى كەرەك. قازاقتا "حالىق ايتسا، قالت ايتپايدى" دەگەن ءسوز بار، سونى ۇمىتپايىق. "ەستۋشى مەملەكەت” اتتى كونتسەپتسيا دۇرىس. بىراق، ەستىگەندى تەز ارادا زەردەلەپ، ماسەلەنى ءتۇسىنىپ، ناقتى شەشىمدەر قابىلدانۋى قاجەت. ايتپەسە، تەك قانا لوزۋنگ رەتىندە قالىپ قويادى", - دەدى قازاقستان رەسپۋبليكاسى پرەزيدەنتىنىڭ جانىنداعى وتباسى جانە ايەلدەر ىستەرى جونىندەگى ۇلتتىق كوميسسياسىنىڭ مۇشەسى.

ونىڭ ايتۋىنشا، حالىققا قازىرگى تاڭدا ەڭ كەرەگى – قاۋىپسىزدىكتى سەزىنۋ.
"قازىرگە كەزدەگى ەڭ باستى ماسەلە - مەملەكەتىمىزدىڭ قاۋىپسىزدىگى. كورىپ وتىرعانداي، وزگە ەلدىڭ قارۋلى كۇشتەرىنە جۇگىنىپ وتىرمىز. بۇعان ءماجبۇر بولدىق، وندى ەندى ءتۇسىنىپ، كوزىمىز جەتىپ وتىر. سوندىقتان، ايتىلعان زاتتاردىڭ ەڭ اۋقىمدىسى - ەلىمىزدىڭ قاۋىپسىزدىك ورگاندارىنىڭ رەفورماسى. ۇقك، ۇلتتىق گۆارديا، اسكەر، پوليتسيا تولىعىمەن مەملەكەتىمىزدىڭ تاۋەلسىزدىگىن قورعاۋعا ءاردايىم دايىن بولۋلارى كەرەك. تەرروريستەرگە توتەپ بەرە الماي قالدىق. ارالارىندا ساتقىندار شىعىپ جاتىر. ال، سوعىس باستالىپ كەتسە نە بولادى؟! سوندىقتان، بۇل ماسەلە - ەڭ وزەكتى ماسەلە. ءاربىر قازاقستاندىق ءوز قاۋىپسىزدىگىن، وتباسىنىڭ قاۋىپسىزدىگىن سەزبەسە، قاۋىپسىز ەلدەرگە كەتە باستايدى. وسى ماسەلە ماڭىزدى، قالعاندارى شەشىلىپ جاتار", - دەدى «اكەلەر وداعى» قوعامدىق بىرلەستىگىنىڭ توراعاسى.

Abai.kz