ەلدە بولعان سوڭعى تولقۋلار قازاقتىلدى حالىقتىڭ ءوز مەملەكەتىنىڭ تاعدىرىن قولىنا العانىن كورسەتىپ وتىر.

قازاقتىلدى حالىق ءتىپتى ءوز مەملەكەتىنىڭ تاريحىن تۇبەگەيلى وزگەرتىپ جىبەرۋ قۇدىرەتىنە يە حالىققا اينالىپتى.

وسى فاكتوردى ەسكەرە وتىرىپ كەلەشەك ۇكىمەت، پارلامەنت، باسقارۋشى ورگاندارعا قازاقتىلدى مەنەدجەرلەر كوپتەپ تارتىلۋى كەرەك دەپ ويلايمىن.
مەنىڭشە، توقاەۆتىڭ كەشەگى تاعايىنداعان ۇكىمەتى ەلدەگى ورىن العان كريزيستەن جەدەل شىعۋ ماقساتىمەن وتىرعان ۋاقىتشا ۇكىمەتكە ۇقسايدى.
كوپ ۇزاتپاي توقاەۆ ءوزىنىڭ كوماندا قۇرامىن جاڭادان جاساقتايدى دەپ جوبالايمىن.
پارلامەنت تە سولاي بولۋى مۇمكىن.

سول تۇستا جوعارىداعى مەن جازعان فاكتور ەسكەرىلۋى ءتيىس دەپ ۇمىتتەنەمىن.
كەلەشەكتە بيلىك باسىنا، زاڭ شىعارۋشى ورگاندارعا قازاقتىلدى مەنەدجەرلەر كوبىرەك تارتىلۋى كەرەك.

ءبىزدىڭ بۇرىڭعى شەنەۋنىكتەر ءوز انا تىلىنە شورقاق، قاتىپ قالعان نۇروتاننىڭ بيۋروكراتتارى بولاتىن.

ءسوزىن "ەلباسىنىڭ تاپسىرماسىمەن" دەپ باستاپ، ەلدى ابدەن مەزى ەتكەن، قۇنارى جوق ءسوزدى ساپىراتىن، بەدەلدەن جۇرداي كىلەڭ كارەريستەر ەدى.
قاراپ وتىرسام، سول ۋاقىتتا ولاردىڭ اراسىنان تاڭداپ تۇرىپ استانادان سوناۋ ماڭعىستاۋداعى شەرۋشىلەرگە باسۋ ايتۋ ءۇشىن جىبەرىلەتىن شەنەۋنىكتەر دە بولماپتى.

ولار حالىق الدىنا شىعىپ انا تىلدەرىندە شەشەن سويلەۋ بىلاي تۇرسىن، ءتىپتى ونى بىلمەيدى دە.

سوندىقتان بيلىك تە ەندى قازاقىلانۋى كەرەك.
سوڭعى ون جىلدا ەل قاتتى قازاقتانىپ كەتتى. بۇل جەردە سول قازاقتانعان ەلدى باسقارۋعا ءوز مەنەدجەرلەرىنىڭ قاجەتتىلىگى تۋرالى ماسەلە تۋىنداپ وتىر.

ولجاس ءابىل

Abai.kz