بەرىك يماشەۆ ورتالىق سايلاۋ كوميسسياسىنىڭ توراعاسى لاۋازىمىنان بوساتىلدى. بۇل تۋرالى اقوردا مالىمدەدى.

«مەملەكەت باسشىسىنىڭ جارلىعىمەن بەرىك ءماجيتۇلى يماشەۆ قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى لاۋازىمىنان بوساتىلدى»، - دەلىنگەن حابارلامادا.

بەرىك يماشەۆ قازاقستاننىڭ ورتالىق سايلاۋ كوميسسياسىن 2016 جىلدىڭ قىركۇيەگىنەن بەرى باسقارىپ كەلگەن.

وعان دەيىن قر ادىلەت ءمينيسترى بولدى. سەناتتا دەپۋتات بولدى. پرەزيدەنت اكىمشىلىگى مەن قاۋىپسىزدىك كەڭەسىندە دە قىزمەت ەتىپ كوردى. ءبىر جىلدارى پرەزيدەنتكە كومەكشىلىك جاساعانى تاعى بار. بىلتىر، 2021 جىلدىڭ قاڭتارىندا ءماجىلىس زالىنىڭ پرەزيديۋمىنان دەپۋتاتتاردىڭ انتىن ءدال وسى بەرىك يماشەۆ قابىلداپ العان ەدى. سالىق پوليتسياسىنىڭ پولكوۆنيگى دەگەن اتاعى مەن قر بەسسايىس فكەدەراتسياسىنىڭ پرەزيدەنتى، قر ات سپورتى فەدەراتسياسىنىڭ پرەزيدەنتى دەگەن اتاقتارى تاعى بار.

وسىعان دەيىن ونىڭ ۇلى ءالجان يماشەۆ تا «قتج – جۇك تاسىمالى» جشس باس ديرەكتورىنىڭ ورىنباسارلىعى قىزمەتىنەن الىنعان ەدى. ەندى اكەسى – بەرىك يماشەۆ تا قىزمەتىمەن قوش ايتىسىپتى. ەندى قر ورتالىق سايلاۋ كوميسسياسىن نۇرلان ءابدىروۆ دەگەن ەكس-دەپۋتات باسقاراتىن بولادى.

ايتا كەتەيىك، بەرىك يماشەۆ نازارباەۆ اۋلەتىنىڭ قۇداسى. داريعا نازارباەۆانىڭ ۇلى ءنۇرالى اليەۆتىڭ قايىن اتاسى.

ەلدە بولعان سوڭعى وقيعالاردان كەيىن ەكس-پرەزيدەنتتىڭ بىرقاتار تۋىسقانى وزدەرىنىڭ لاۋازىمدى قىزمەتتەرىنەن الىندى. مىسالى، 15 قاڭتار كۇنى نۇرسۇلتان نازارباەۆتىڭ ەكى بىردەي كۇيەۋ بالاسى - «قازترانسويل» اق توراعاسى ديماش دوسانوۆ پەن «قازترانسگاز» اق توراعاسى قايرات شارىپباەۆتار قىزمەتىنەن الىنسا، 17 قاڭتار كۇنى كىشى قىز ديرانا نازارباەۆانىڭ كۇيەۋى تيمۋر قۇلىباەۆ «اتامەكەن» ۇكپ توراعالىعىن تاپسىرىپ بەردى. سول كۇنى نازارباەۆتىڭ باۋىرىنىڭ بالاسى سامات ءابىش تە ۇقك توراعاسىنىڭ ورىنباسارلىعىنان الىندى.

قازىرگى ۋاقىتتا نازارباەۆتىڭ جاقىن تۋىستارىنان بيلىكتەگى قىزمەتىندە قالعان داريعا نازارباەۆا. رەسمي مالىمەتتەرگە سۇيەنسەك، داريعا نازارباەۆا قازىر كوروناۆيرۋسپەن اۋىرىپ جاتىر ەكەن.

Abai.kz