قىرعىزستاننىڭ بۇرىنعى پرەزيدەنتى المازبەك اتامباەۆ «قاسىرەتتى قاڭتار» وقيعاسىنا قاتىستى پىكىر ءبىلدىردى. بۇگىندە ءىستى بولىپ، اباقتىدا جاتقان المازبەك بىلاي دەيدى: 

«قازاق وپپوزيتسيونەرى دەپ اتالىپ جۇرگەن مۇحتار ابىليازوۆپەن بايلانىسى بار دەگەنگە قاتىستى ايتاتىن بولسام، مەن مۇحتارمەن ەشقاشان كەزدەسكەن دە، سويلەسكەن دە ەمەسپىن. ونىمەن ەشقانداي كەلىسىم دە بولعان ەمەس. مەنىڭ 2016 جىلدىڭ قىركۇيەگىندەگى وقيعالاردان كەيىن نۇرسۇلتان نازارباەۆپەن قارىم-قاتىناسىم بۇزىلعانى جاسىرىن ەمەس. مەنىڭ ويىمشا قازاقستانداعى وقيعالاردى سىرتتان ەشكىم ۇيىمداستىرعان جوق.

بارلىق توڭكەرىستەر مەن كوتەرىلىستەر كەز-كەلگەن ەلدە بىلىكسىز، حالىققا قارسى بيلىكتىڭ ارەكەتىنەن كەيىن بولادى. قازاقستاندا دا ماسەلە سىرتتان ۇيىمداستىرعان كۇشتەردە، وپپوزيتسيونەرلەر مەن سودىرلاردا ەمەس. حالىقتىق تولقۋلاردىڭ سەبەپتەرى انىق. بىراق, توقاەۆ مىرزا تىم ديپلومات رەتىندە ايتىپ وتىر. ول بۇل سەبەپتەر مەن كەلەڭسىزدىكتەردى جويۋ ءۇشىن بارىن سالادى دەپ ۇمىتتەنەمىن.

ارينە، تولقۋعا قاتىسقان حالىقتى ەمەس، حالىقتى تولقۋعا جەتكىزگەن جانداردى جازالاۋ كەرەك. ءوز حالقىن توناعان، ءوز حالقىنىڭ تىنىسىن تارىلتىپ، رەپرەسسيا جاساعانداردى ايتامىن. ءوز تاجىريبەمدە ايتاتىن بولسام, ىشكى پيعىلى بەلگىسىز كۇشتىك قۇرىلىمدارعا ەمەس، قاراپايىم حالىق پەن تاۋەلسىز باق-تارعا كوبىرەك سەنىم ارتقان دۇرىس. سوندا عانا ۇلتتىق قاۋىپسىزدىك كوميتەتى «ۇلتقا قاۋىپتى كوميتەتكە» اينالمايدى. ازىرگە پرەزيدەنت اۋىسسا دا، ناتيجە جوق سياقتى...

مەنىڭ تامىرىمدا مەنىڭ قازاق اجەلەرىمنىڭ قانى اعىپ جاتىر. مەنىڭ ۇلكەن ۇلىمنىڭ بالالارى، مەنىڭ نەمەرەلەرىم جارتىلاي قازاق. ءدال وسىنداي جاقىندىق كوپتەگەن قىرعىزدا بار. قازاق دالاسىندا بىرەۋ قينالسا، قىرعىز تاۋىندا كوزىمىزدەن جاس اعادى. ءبىز قازاق باۋىرلارىمىز بەن قارىنداستارىمىزدى جاقسى كورەمىز! الاڭدايمىز! سىزدەردىڭ قايعىلارىڭىز - ءبىزدىڭ قايعىمىز! وسى ءبىر قايعىلى وقيعادا قازا تاپقان جانە زارداپ شەككەن ءار وتباسىعا كوڭىل ايتامىن. بەكەم بولىڭىزدار! سىزدەرگە جاراتۋشى جار بولسىن!»،- دەدى المازبەك اتامباەۆ.

المازبەك اتامباەۆ پەن قازاقستان بيلىگىنىڭ اراسى 2016 جىلعى قىرعىزستانداعى پرەزيدەنتتىك سايلاۋدا ۋشىققان بولاتىن. قىرعىزدىڭ بۇرىنعى باسشىسى «قازاقستان ىشكى ساياساتىمىزعا ارالاستى»، دەپ مالىمدەپ، ەكى ەل اراسىندا ساياسي سالقىندىق بولدى.

«قاسىرەتتى قاڭتار» وقيعاسىندا قازاقستاندا بىرنەشە قىرعىزستاندىق ازامات تۇتقىندالعان بولاتىن. ونىڭ ىشىندە تانىمال دجازمەن رۋزاحۋنوۆ تا بار. قىرعىزستان قارسى نوتا جىبەرىپ، مۋزىكانت بوساتىلدى. ارتىنشا وعان شۇعىل تۇردە وتا جاسالعانى بەلگىلى بولدى.

Abai.kz