"قاسىرەتتى قاڭتار" وقيعاسى قارساڭىندا قازاقستاندىق تاراپ ۇقشۇ-عا ءوتىنىش ايتىپ، ەلدەگى جاعدايدى تۇراقتاندىرۋ ءۇشىن اسكەر كىرگىزۋىن سۇراعان ەدى. سۇرانىس قاناعاتتاندىرىلىپ، قازاقستانعا 2600 ۇقشۇ ساربازى كىرگىزىلدى. ونىڭ ىشىندە رەسەي، بەلارۋس ساربازدارىنىڭ سانى باسىم بولسا، قىرعىزستان، تاجىكستان جانە ارمەنيا از عانا اسكەر جىبەرۋ تۋرالى شەشىم قابىلدادى. 

رەسەي تاراپىنان قازاقستانعا اسكەر كىرگىزۋدى مىندەتسىنە سويلەگەندەر كوپ بولدى. ساياساتتانۋشىلارىنان باستاپ، دەپۋتاتتارىنا دەيىن ءتۇرلى ويلار ايتتى. مىسالى رەسەيلىك دەپۋتات بيسۋلتان حامزاەۆ بىلاي دەدى: "ورتالىق ازيا دەگەنىمىز ورىستاردىڭ جەرى عوي. الەۋمەتتىك جەلىدە قازاقستاندى رەسەيگە قوسۋ تۋرالى ءتۇرلى سوزدەر ايتىلۋدا. مەنىڭ ساياسات پەن لاۋازىمعا نەگىزدەلمەگەن جەكە ويىم، رەسەي فەدەراتسياسىنىڭ ازاماتى رەتىندەگى پوزيتسيام بىلاي: قازاقستاندا رەفەرەندۋم وتكىزىپ، قازاقستاننىڭ تاريحي وتانى رەسەيمەن قوسىلۋىن قولدايمىن" دەپ جازدى. ونىڭ فەيسبۋك پاراقشاسىنداعى بۇل جازباسى ۇلكەن داۋ تۋعىزدى.

ۇقشۇ اسكەرى كىرگىزىلگەن كۇنى RT رەداكتورى مارگاريتا سيمونيان دا اۋزىنان كەلگەنىن ايتتى. "قازاقستان ورىس ءتىلىن مەملەكەتتىك ءتىل ەتىپ جاريالاپ، قىرىمدى رەسەيدىكى دەپ مويىنداپ، ۇلتشىلدارىن قىسپاققا السىن" دەدى.

قازاقستانداعى ۇقشۇ وپەراتسياسى جايلى ساياساتتانۋشى سەرگەي ميرونوۆ بىلاي دەيدى: "كەرەمەت وپەراتسيا! ۇقشۇ-نىڭ ۇجىمدىق كۇشتەرى العاش رەت رەسمي تۇردە شاقىرىلدى جانە ايتا كەتۋ كەرەك، ولار بىردەن ارەكەت ەتتى. اەروۇتقىر اسكەرلەر قاتارىندا قىزمەت ەتكەندىكتەن، ء"بارى قالاي ءوربيدى، دەسانتشىلار قالاي جۇمىس ىستەيدى؟" دەپ ۇنەمى ويلانىپ جۇرەتىنمىن، ويتكەنى ۇقشۇ بىتىمگەرشىلىك كۇشتەرىنىڭ تىرەگى – اەروۇتقىر اسكەرلەرى.

ولاردىڭ بۇل وقۋ-جاتتىعۋلاردىڭ بارلىعىن ۇزاق جىلدار بويى – ارمەنيادا دا، قازاقستاندا دا، بەلارۋستە دە وتكىزۋى بەكەر ەمەس ەدى. اۋدانمەن، قاجەت بولسا، مەملەكەتتىڭ ەرەكشەلىكتەرىمەن تانىستىق. ءتىپتى ءبىزدىڭ جاۋلارىمىز دا بارلىعىنىڭ قانشالىقتى انىق جانە تەز وتكەنىن اتاپ ءوتتى.

وسى وپەراتسيامەن ۇقشۇ ءوزىنىڭ ماڭىزدىلىعىن، تيىمدىلىگىن كورسەتتى جانە ءدال وسىنداي قاۋىپسىزدىك شەگىنىڭ بار ەكەنىن ۇقتىق. مۇنداي جاعدايلاردا بۇل داعدىلاردىڭ بارلىعى بار.

قازاقستانداعى جاعدايعا كەلەتىن بولساق، مەن توقاەۆتىڭ ۇقشۇ-عا جولداعان ۇندەۋىن قولدادىم، ويتكەنى بۇل جەردە ءبىر نيۋانس بار، ونى ءسال كەيىنىرەك ۇيرەنەمىز دەپ ويلايمىن. ونىڭ ۇندەۋىنەن قازىردىڭ وزىندە ۇلتتىق قاۋىپسىزدىك كوميتەتى باسشىسىنىڭ اۋىسۋىنىڭ بەكەر ەمەس ەكەنىن، ءتىپتى ونى مەملەكەتكە ساتقىندىق جاسادى دەپ ايىپتاۋىنىڭ تۇبىندە ءبىر نەگىز بار ەكەنى بايقالادى.

ەندى وپەراتسيا بىتكەن سوڭ، ولار دا بەلسەندىلىك تانىتىپ، حالىقتى ۇرەيلەندىرمەۋ ءۇشىن جانە ورىس وككۋپاتسياسى تۋرالى اڭگىمەلەردى توقتاتۋ ءۇشىن بارلىق اسكەرلەرىن شىعاردى. دەگەنمەن، ءوز باسىم، ءبىزدىڭ اسكەرلەر سوندا ءبىراز قالعانىن قالار ەدىم", - دەيدى ول.

وسىلايشا رەسەي ساياساتكەرلەرى مەن ساياساتتانۋشىلار ءوز ويلارىن اشىق ءبىلدىرىپ، ىشكى پيعىلدارىن كورسەتۋدە. ولاردىڭ ويى قازاقستاندى رەسەيگە قوسۋ جانە ءوز ساياسي ىقپالدارىن ارتتىرا بەرۋ.

Abai.kz