بۇگىن، 26 قاڭتار كۇنى، ورتالىق كوممۋنيكاتسيالار قىزمەتىنىڭ الاڭىندا «حابار» اگەنتتىگى قاسىرەتتى قاڭتار وقيعاسى تۋرالى «تراگيچەسكي يانۆار. كاك ەتو بىلو» اتتى دەرەكتى ءفيلمنىڭ العاشقى كورسەتىلىمىن وتكىزدى. كينوكورسەتىلىم ءبىر مينۋت ۇنسىزدىكپەن باستالدى. ءىس-شارا قاتىسۋشىلارى تاۋەلسىز قازاقستان تاريحىنداعى قاندى وقيعا قۇرباندارىن ەسكە الدى. العاشقى كورسەتىلىم بارىسىندا ساراپشىلار فيلم تۋرالى ءوز پىكىرلەرىمەن ءبولىستى.

كينوتۋىندى 26 قاڭتار كۇنى ساعات 20:30-دا «حابار» تەلەارناسىنان كورەرمەنگە جول تارتادى.

«بۇل ءوزىم ءۇشىن وتە ماڭىزدى ءارى وتە قاجەت فيلم. ويتكەنى تۋىندى ارالىق ناتيجەلەردى كورسەتىپ بەردى. مەن الماتىدا بولعان وقيعالاردى ءوز كوزىممەن كوردىم، قاڭتاردىڭ 4-نەن 5-نە قاراعان ءتۇنى الاڭدا بولدىم. ءفيلمنىڭ وقيعانىڭ «قالاي بولعانىن» ەمەس، «نەگە بولعانىن» اشاتىن ەكىنشى ءبولىمىن كۇتەمىن. مەنىڭ ويىمشا، وقيعالار جەلىسىن حالىققا ەگجەي-تەگجەيلى بايانداعان «حابار» اگەنتتىگى قاڭتاردىڭ باسىندا ءبىزدىڭ ەلدە بولعان قايعىلى وقيعانىڭ شىنايى تاريحىن كورۋگە مۇمكىندىك بەرە الدى»، - دەدى جۋرناليست دەنيس كريۆوشەەۆ.

«فيلم بىزگە رەسمي جاڭالىقتاردىڭ نەگىزدى ەكەنىن اڭعارتادى. وقيعانىڭ شىن مانىندە قالاي بولعانىن كورسەتەدى. تۋىندى الماتى جانە باسقا قالالاردا ورىن العان جاعداي تۋرالى العاشقى كۇندەرى العان اقپاراتتىڭ راستىعىن دالەلدەيدى»، - دەدى قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ باس ساراپشىسى نيكيتا شاتالوۆ.

ايتۋلى تۋىندى وقيعانىڭ باستالۋى، شارىقتاۋ شەگى مەن اياقتالۋى تۋرالى باياندايتىن دەرەكتى كادرلاردىڭ ۇزىندىلەرىنەن تۇرادى. جاڭا جىلدان كەيىن ەلىمىزدە ورىن العان جاعدايدى سۋرەتتەيتىن دەرەكتى ءفيلمىنىڭ سيۋجەتتىك جەلىسى وقيعالارىنىڭ تولىق حرونولوگياسىنا نەگىزدەلگەن. فيلم قاڭتار وقيعاسىنىڭ ءبىر تىزبەك ارقىلى بايلانىسقان، ءبىر ورتالىقتان ۇيلەستىرىلگەن تەرروريستەردىڭ ارەكەتى ەكەنىن اڭعارتادى.

Abai.kz