جۋىردا «egov.press» سايتىندا قازاقستان حالقى اسسامبلەياسىن تاراتۋدى تالاپ ەتكەن پەتيتسيا جاريالاندى. پەتتسيا اۆتورى – رىسباەۆ گابيت نۋرحانوۆيچ دەپ كورسەتىلگەن. قازىردىڭ وزىندە اتالعان ەپتيتسياعا 2,4 مفىڭعا جۋىق ادام داۋىس بەرىپتى.

پىكىرشىلەردىڭ ورتاق ويلارى: «اسسامبلەيا تاراتىلسىن! ەش كەرەگى جوق ۇيىم. جىل سايىنعى قارجىنى يگەرۋ مەن اتقارعان جۇمىستارى تۋرالى ەسەپ-قيساپتارىن دا جاريالامايدى. ولارعا ءوز ىشىندە دەپۋتات سايلاۋعا نەگە ارتىقشىلىق بەرىلەدى؟ بارلىق قازاقستاندىقتار بىردەي سايلانۋ قۇقىنا يە بولۋى كەرەك»، - دەگەنگە تۇيىسەدى.

ال پەتيتسيانىڭ وزىندە سوزبە-ءسوز: «نازارباەۆتىڭ سايلاۋدا باسقا ۇلتتار اراسىندا كوبىرەك داۋىس الۋىن قامتاماسىز ەتۋ ءۇشىن عانا قۇرىلعان قازاقستان حالىقتارى اسسامبلەياسىن تاراتۋ ماسەلەسىن تاعى كوتەرەمىز. ەندى بۇل قۇرىلىمنىڭ كەرەك ەمەس ەكەندىگى ايدان انىق. نۇرسۇلتان نازارباەۆ 2007 جىلعى مامىر ايىندا قازاقستان رەسپۋبليكاسى كونستيتۋتسياسىنا بىرقاتار وزگەرىستەر ەنگىزدى.

قازاقستان حالقى اسسامبلەياسىنا كونستيتۋتسيالىق مارتەبە بەرىلدى، ول قر پارلامەنتى ماجىلىسىنە توعىز دەپۋتات سايلاۋ قۇقىعىنا يە بولدى. ول جەردەگى باستى تالاپ دەپۋتاتتار قازاق ۇلتىنان بولماۋى ءتيىس. ءبىز قازاقستان رەسپۋبليكاسىنىڭ ازاماتتارى، قازاق ۇلتىنىڭ كونستيتۋتسيالىق قۇقىعىن شەكتەيتىن، جانە ەلىمىزگە ەشقانداي پايداسى جوق ۇلتارالىق ارازدىقتى قوزدىراتىن قازاقستان حالىقتارىنىڭ اسسامبلەياسىن تاراتۋىن تالاپ ەتەمىز»، - دەپ جازىلعان.

ايتا كەتەيىك، 1995 جىلعى 1 ناۋرىزدا قازاقستان حالقى اسسامبلەياسىن مەملەكەت باسشىسى جانىنداعى كونسۋلتاتيۆتى-كەڭەسشى ورگان مارتەبەسىمەن قۇرۋ تۋرالى سول كەزدەگى پرەزيدەنت نۇرسۇلتان نازارباەۆتىڭ جارلىعى شىقتى.

2007 جىلعى مامىر ايىندا قازاقستان رەسپۋبليكاسى كونستيتۋتسياسىنا بىرقاتار وزگەرىستەر ەنگىزىلدى. قازاقستان حالقى اسسامبلەياسىنا كونستيتۋتسيالىق مارتەبە بەرىلدى، ول قر پارلامەنتى ماجىلىسىنە توعىز دەپۋتات سايلاۋ قۇقىعىنا يە بولدى.

قحا-نىڭ رەسمي سايتىنداعى مالىمەتتە: «قازاقستان حالقى اسسامبلەياسىنان سايلانعان پارلامەنت ءماجىلىسىنىڭ 9 دەپۋتاتى ەلدەگى بارلىق ەتنوستاردىڭ مۇددەسىنە قورعايدى. سونىمەن قاتار قازاقستاندىق ەتنيكالىق قوعامداستىقتاردىڭ پارلامەنتتە وكىلدىك ەتۋى ولاردىڭ ساياسي پارتيالار ارقىلى وكىلدى ورگاندارعا تىكەلەي قاتىسۋى نەگىزىندە دە جۇزەگە اسىرىلادى»، - دەپ جازىلعان ەكەن.

قازىر قازاقستان پارلامەنتى ماجىلىسىندە اسسامبلەيا اتىنان سايلانعان دەپۋتاتتار مىنا كىسىلەر:

ساۋىتبەك ءابدىراحمانوۆ – حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى،

ءابىلفاس حامەدوۆ – ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى،

اۆەتيك اميرحانيان – اگرارلىق ماسەلەلەر كوميتەتىنىڭ مۇشەسى،

ءىلياس بۇلاروۆ – ەكولوگيا ماسەلەلەرى جانە تابيعات پايدالانۋ كوميتەتىنىڭ مۇشەسى،

ناتاليا دەمەنتەۆا – حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى،

ۆاكيل نابيەۆ – زاڭناما جانە سوت-قۇقىقتىق رەفورما كوميتەتىنىڭ مۇشەسى،

يۋري لي – قارجى جانە بيۋدجەت كوميتەتىنىڭ مۇشەسى،

شاميل وسين – اگرارلىق ماسەلەلەر كوميتەتىنىڭ مۇشەسى،

ۆلاديمير توحتاسۋنوۆ – ەكولوگيا ماسەلەلەرى جانە تابيعات پايدالانۋ كوميتەتىنىڭ مۇشەسى.

Abai.kz