اتا-بابالارى اۋعانستاننان پاكىستانعا بوسىپ كەلگەن ەتنيكالىق قازاقتاردىڭ ۇرپاقتارى ەلىمىزدەگى جاپپاي تارتىپسىزدىكتەن قازا تاپقان وتانداستارىمىزدىڭ جاقىندارىنا قايعىرىپ كوڭىل ايتتى. مەملەكەت باسشىسى مەن ەل حالقىنا كاراچي قالاسىنداعى 40 وتباسى ۇندەۋ جاريالادى.

ۇندەۋدە ءوز تاعدىرلارىن ايتىپ، ەلدەگى بەيبەرەكەتسىزدىككە بەيجاي قاراي المايتىندارىن، قازاقستاندىقتاردىڭ الەمدەگى ەڭ باقىتتى حالىقتاردىڭ ءبىرى ەكەندىكتەرىن دە اتاپ وتكەن. بۇدان بولەك، تاريحي وتاندارىنىڭ دامۋى ءۇشىن حالىقتى ەل پرەزيدەنتىمەن بىرگە بولۋعا شاقىرادى.

كاراچي قازاقتارىنىڭ جولداعان ۇندەۋىن قاز قالپىندا نازارلارىڭىزعا ۇسىنامىز:

ارمىسىزدار اتاجۇرتىم!

اسا مارتەبەلى پرەزيدەنت قاسىم-جومارت كەمەلۇلى!

پاكىستاننىڭ كاراچي قالاسىنىڭ ايماعىندا تۇراتىن 40 وتباسىنىڭ اتىنان سىزگە ۇندەۋ جولدايمىز.

ءبىزدىڭ كوپشىلىگىمىز كاراچيدە جارىق دۇنيەنىڭ ەسىگىن اشتىق. اتا-بابالارىمىز اۋعانستانعا سوۆەت اسكەرى كىرگەن كەزدە، تاعدىردىڭ تالكەگىنە ءتۇسىپ وسىندا بوسىپ كەلگەن. سىزگە بۇل ۇندەۋدى جازۋداعى باستى ماقسات – سۇيىكتى قازاقستانىمىز دا ورىن العان جاپپا تارتىپسىزدىكتەرگە بەيجاي قاراي المادىق. جۇرەگىمىز دە، كوزىمىز دە اسەم الماتى مەن بىرقاتار وڭىرلەردىڭ ويراندالعانىنا قاتتى قىنجىلدى. ءبىز پاكىستاندا ءومىر ءسۇرىپ، اتامەكەنىمىز قازاقستاننىڭ تابيعاتى مەن كورىكتى جەرلەرى ءۇشىن ماقتانامىز! قازاقستاندىقتار الەمدەگى ەڭ باقىتتى حالىقتاردىڭ ءبىرى ەكەنىن ۇمىتپاسا ەكەن. ويتكەنى اللا تاعالا اتاجۇرتىمىزعا كوپتەگەن قازبا بايلىقتاردى ءناسىپ ەتكەن.

ءاربىر ءسات سايىن تاريحي وتانىمىزداعى جاعدايلارعا الاڭداۋمەن بولدىق. اتامەكەنىمىز دە ەندى مۇنداي قان توگىستەر بولماسىن! وسى ۇندەۋمەن باسقا ەلدە بوسىپ جۇرگەن، بىزدەي پاناسىز قازاقتار ەلىمىزدەگى بەيبەرەكەتسىزدىكتەن قازا تاپقان اعايىندارىمىزدىڭ جاقىندارىنا، ولاردىڭ ارتىندا قالعان جەتىم-جەسىر وتباسىلارىنا قابىرعامىز قايىسىپ كوڭىل ايتامىز! ەل حالقىن سابىرعا شاقىرىپ، بىرلىك پەن ىنتىماق تا بولۋلارىن سۇرايمىز. باقىتتى ەلدە ءومىر ءسۇرىپ جاتقاندارىنىزدىڭ قادىرىن بىلىڭىزدەر. سىزدەر بوسقىندار ءومىرىنىڭ قانشالىقتى اۋىر ءارى تاعدىرلارىنىڭ قيىن ەكەنىن بىلمەۋلەرىڭىز مۇمكىن. بوسقىن بولىپ ءجۇرۋدىڭ قانشالىقتى قيىن ەكەنىن بىلگىلەرىڭىز كەلسە، بىزدەردىڭ جاعدايلارىمىزدى سۇراساڭىزدار بولادى. پاكىستانداعى بارشا اعايىندار بولىپ، اتاجۇرتىمىزدىڭ ءالى دە دامىپ، باسقا ەلدەردەن وزىق بولۋى ءۇشىن اللادان جاردەم تىلەيمىز!

قازاقستاننىڭ گۇلدەنۋى ءۇشىن قازاق حالقىن ەل پرەزيدەنتىمەن بىرگە بولۋعا شاقىرامىز.

قادىرالى سارىپبەك

Abai.kz