ءبىزدىڭ ۇكىمەت نەگە وزدەرىنە تىكەلەي قاتىستى پروبلەمالارعا كوز جۇما قارايدى؟

يندۋستريا مينيسترلىگى بىزدەگى اۆتوونەركاسىپتىڭ كوزبوياۋشىلىق ەكەنىن كورمەگەنسيدى. 18 جىل بويى «دامىپ كەلگەن» سالامىز شەتەلدىك دايىن كولىككە ءبىر ەكى تەتىك بۇراپ، وتاندىق ءونىم دەپ ۇسىنىپ، ونى كەرەمەت جەتىستىك قىلىپ كورسەتەدى.

اۋىلشارۋاشىلىعى مينيسترلىگى وسى ۋتيلالىم كەسىرىنەن فەرمەرلەر اۋىل شارۋاشىلىعى تەحنيكاسىنا 20% ارتىق شىعىندالاتىنىن بايقاماعانسيدى. وعان ءماۋ دەمەك تۇگىلى، بۇل سالاداعى قوعامدىق جيىندارعا مۇلدە قاتىسپايدى. قۇددى ءبىر قۇمعا باسىن تىققان تۇيەقۇس دەرسىڭ.

ەكونوميكا مينيسترلىگى ۋتيلالىم كەسىرىنەن، ميكرو، شاعىن، ورتا بيزنەستەردىڭ كۇيرەپ، ەكونوميكاعا وراسان زور شىعىن كەلىپ جاتقانىن كورمەگەن سىڭاي تانىتادى.

ادىلەت مينيسترلىگى سىرتتان دوڭگەلەكسىز كەلىپ جاتقان كولىكتەر مەن تەحنيكانى اكەلىپ، وتاندىق ءونىم دەپ ساتىپ جاتقان الدار كوسەلەردىڭ قىرۋار وتىرىكتەرىن، زاڭبۇزۋشىلىقتارىن كورمەگەنسيدى.

ەڭبەك جانە الەۋمەتتىك قورعاۋ مينيسترلىگى – حالىقتىڭ ارىز-شاعىمىنا كەلگەندە تاسكەرەڭ، الەۋمەتتىك احۋالدىڭ كۇن ساناپ ناشارلاپ بارا جاتقانىن كورمەيتىن كورسوقىر.

ساۋدا مينيسترلىگى ەلدەگى قىمباتشىلىقتىڭ، ءتۇرلى تاۋارلار باعالارىنىڭ ءوسۋ سەبەبى – ۋتيلالىم سەبەبىنەن ەكەنىن بىلمەگەن كەيىپ كورسەتەدى.
باسەكەلەستىكتى قورعاۋ جانە دامىتۋ اگەنتتىگى ءاۆتووندىرىس سالاسىنداعى وليگوپولياعا، باسەكەلەستىكتى شەكتەۋ مەن ولتىرۋگە باعىتتالعان ۋتيلالىم سەكىلدى الىمدارعا كوز جۇما قارايدى.

اتامەكەن كاسىپكەرلەر پالاتاسى ۋتيلسبوردى كاسىپكەرلەر ءۇشىن قولايلى جاعداي دەپ تانيدى.

قارجى مينيسترلىگى 700 ملرد ۋتيلالىمنىڭ قۇمعا ءسىڭىپ كەتكەنىن كورمەيدى. ودان بولەك اۆتوونەركاسىپتى قولدايمىز دەگەن جەلەۋمەن ولارعا سالىق پەن كەدەندىك ءتۇرلى جەڭىلدىكتەر جاسالىپ، بيۋدجەتكە اقشا تۇسپەي قالعانىن بايقاماي قالادى.

قوعامداعى نارازىلىققا قاراماستان، سكليار مىرزا جاقىندا عانا اۋىلشارۋاشىلىعى تەحنيكاسىنىڭ ۋتيلالىمى بۇرىنعىشا قالادى، ال اۆتوترانسپورت ۋتيلالىمى رەسەيمەن سايكەستەندىرىلەدى دەگەندى ايتتى. ءتىپتى جاعدايدى ساراپتاپ كورىپ، اۆتوونەركاسىپتى تەكسەرىپ، تيىمدىلىگىن ەسەپتەۋدى دە قاجەت سانامادى.

وسىعان وراي، قر ۇكىمەتىنە، اسىرەسە، ءبىرىنشى ۆيتسە-پرەمەر سكليار مىرزاعا قوياتىن ءۇش ساۋالىمىز بار:
1. ۋتيلالىمعا قاتىستى افەرانى سونشا قورعاۋىڭىزعا نە سەبەپ؟
2. ەگەر بۇل افەرا بولماسا، ۋتيلالىم جۇيەسىنە، اۆتوونەركاسىپتىڭ دەڭگەيىن انىقتاۋعا قوعامدىق تەكسەرۋ جۇرگىزۋگە نەگە قارسى بولاسىز؟
3. ءسىز شارشاپ جۇرگەن سياقتىسىز، مۇمكىن مەمقىزمەتتەن دەمالارسىز؟

نۇراددين سادىقوۆ

Abai.kz