اقش مەملەكەتتىك حاتشىسىنىڭ وڭتۇستىك جانە ورتالىق ازيا ىستەرى جونىندەگى كومەكشىسى دونالد لۋ «باتىستىڭ مىندەتى – قازاقستانعا اقىل ايتۋ ەمەس، قولداۋ» دەدى.

«باتىستىڭ مىندەتى – اقىل ايتۋ ەمەس، قازاقستاندى قولداۋ جانە ەلدىڭ وزىنە قاڭتار ايىندا تۋىنداعان ادام قۇقىعى ماسەلەسىن شەشۋگە مۇمكىندىك بەرۋ جانە مۇنداي جاعدايدى بولدىرماۋى ءۇشىن قاجەتتى الەۋمەتتىك، ساياسي جانە ەكونوميكالىق رەفورمالاردى ءارى قاراي جۇزەگە اسىرۋ»، – دەدى د.لۋ.

مۇنداي پىكىرىن ول «اقش پەن كاسپي ءوڭىرى ەلدەرى اراسىنداعى ديپلوماتيالىق قارىم-قاتىناستاردىڭ 30 جىلدىعى» اتتى ۆەبيناردا ايتتى.

ۆەبينارعا قازاقستان تاراپىنان پرەزيدەنتتىڭ ارناۋلى وكىلى ەرجان قازىحان قاتىستى.

بۇعان دەيىن ەۋروپارلامەنت قاڭتار وقيعاسىنا قاتىستى قارار قابىلداپ، وقيعاعا حالىقارالىق اشىق تەرگەۋ جاساۋعا شاقىرعان.

ەۋروپارلامەنتتىڭ بۇل ارەكەتىنە قاتىستى پرەزيدەنت توقاەۆ «قاڭتار وقيعاسىنا قاتىستى ماسەلەنى قازاقستان ەشكىمنىڭ ارالاسۋىنسىز ءوزى شەشەدى» دەپ مالىمدەگەن.

Abai.kz