ءماجىلىس دەپۋتاتى ايدوس سارىم ءوزىنىڭ ارىپتەسى، ءماجىلىس دەپۋتاتى ءھام ەكس-پرەزيدەنت نۇرسۇلتان نازارباەۆتىڭ ۇلكەن قىزى داريعا نازارباەۆانىڭ ورنىن بوساتىپ، وتستاۆكاعا كەتۋىن تالاپ ەتءىپتى.

«قالىپتاسقان احۋالدى ەسكەرە وتىرىپ، ەڭ الدىمەن وسى ەلدىڭ ازاماتى رەتىندە ول ءوز ەركىمەن وتستاۆكاعا كەتۋى ءتيىس. نازارباەۆا «جاڭا قازاقستان» توبىنىڭ قۇرامىنا كىرگەن جوق.

قازاقستاندا قالىپتاسقان اۆتوريتارلى جۇيەنى نازارباەۆانىڭ اتى-جونىمەن بايلانىستىرادى. كۇنى كەشەگى وقيعالار دا وسى جۇيەگە دەگەن قارسىلىقتان تۋىندادى»، – دەيدى سارىم.

ماجىلىسمەننىڭ پىكىرىنشە ەكس-پرەزيدەنتتىڭ قىزى ەل الدىندا سەنىم ۆوتۋمىن جوعالتقان.

ايتا كەتەلىك، داريعا نازارباەۆا قاڭتار وقيعاسى باستالعالى بەرى ماجىلىسكە كەلگەن جوق. رەسمي اقپارات بويىنشا ول كوروناۆيرۋس جۇقتىرىپ، توسەك تارتىپ جاتىر. بەيرەسمي مالىمەت بويىنشا نازارباەۆ قاڭتار دۇربەلەڭى باستالعان تۇستا دۋبايعا ۇشىپ كەتكەن.

داريعا نۇرسۇلتانقىزىنىڭ جاسى قازىر 58-دە. قىزمەتتىك كارەراسىندا ءارتۇرلى باسشىلىق لاۋازىمداردا بولعان. ال پارلامەنتتە:

2004-2007 جىلدارى ءماجىلىستىڭ ءۇشىنشى شاقىرىلىمىندا دەپۋتات بولدى. 2005-2007 ارالىعىندا ماجىلىستەگى «ايماق» دەيتىن دەپۋتاتتىق توپتى باسقاردى.

ونان سوڭ 2012-2015 جىلدار ارالىعىندا ماجىلىسكە قايتا دەپۋتات بولىپ سايلاندى. «نۇر وتان» پارتياسىنىڭ تىزىمىنە ەنىپ، 2015 جىلدان باستاپ «نۇر وتان»فراكتسياسىنا جەتەكشىلىك ەتتى. ءماجىلىس توراعاسىنىڭ ورىنباسارى بولدى.

پارلامەنتكە ءۇشىنشى مارتە 2016 جىلى باردى. 2016-2020 جىلدار اراسىندا سەنات دەپۋتاتى بولىپ ءجۇردى. ءتىپتى، 2016-2019 جىلدارى سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىن تىزگىندەدى.

ال 2019-2020 جىلدار اراسىندا سەناتتىڭ توراعاسى اتاندى. ءسويتىپ، قازاقستاننىڭ ساياسي جۇيەسىندەگى «زاپاستاعى پرەزيدەنت» اتاندى.

داريعا نازارباەۆانىڭ پارلامەنتەگى ءتورتىنشى جورىعى – 2021 جىلى باستالعان. ءماجىلىستىڭ جەتىنشى شاقىرىلىمىنا «نۇر وتان» ءتىزىمى ارقىلى وتكەن. سودان بەرى ماجىلىستە ماندات يەلەنىپ ءجۇردى. ال قاڭتار وقيعاسى باستالعان ساتتەن باستاپ ول ماجىلىسكە مۇلدە كەلگەن جوق. ءوزى «ءلام-ميم» دەپ ەشبىر مالىمدەمە جاساعان جوق. بار بولعانى كومەكشىسى ونىڭ كوروناۆيرۋس جۇقتىرىپ، الماتىدا ەمدەلىپ جاتقانىن حابارلاۋمەن بولدى.

Abai.kz