كەيدە وسىلار ايتقىڭ كەلمەگەن نارسەنى جازۋعا ءماجبۇر ەتەدى. شالاقازاق ۇعىمى اۋەلدە ارالاس نەكەدەن تۋعان ۇرپاقتىڭ اتاۋى ەدى، بۇگىندە قازاق ءتىلى مەن داستۇرىنە شورقاق توپتىڭ لاقابىنا اينالىپ ءجۇر.

كەيىنگى كەزدە سىرت اسىپ كەلگەن قازاق اتا ءداستۇرىن ساقتاعان، ال اتاجۇرتتا قالىپ ورىسپەن قويان قولتىق بولعان ءبىزدى ءوزىنىڭ بارىنان ايرىلعان «شالاقازاق» ساناۋ ءۇردىسى بەلەڭ الىپ بارا جاتقان سياقتى. بۇل ارانداتۋدىڭ كەزەكتى ءتۇرى ما، الدە بىزدە شىنىمەن دە وسىنداي ماسەلە بار ما؟ جالپى، مۇنداي ويدى مالدانىپ جۇرگەن توپ بولسا، ولار ءدىني ەكسترەميزمنەن دە قاۋىپتى. جەل تۇرماسا، ءشوپتىڭ باسى قوزعالمايدى. ءبارى وزىڭنەن، قازاقيا. وتىز ەكى ءتىستىڭ اراسىنان شىققان ءسوز قانشا جەردى قامتيتىنىن ايتىپ نە قىلايىن؟ بۇل كۇڭكىلىڭدى توقتاتپاساڭ ءتۇبى ەل بولىپ جارىتپايسىڭ. مىنا داليعان دالادان ىرگەسىن اجىراتپاي، تالاي ناۋبەتتى باستان كەشۋگە ءماجبۇر بولعان قازاق شوشقا تاعالاپ جۇرگەن جوق. وسىنى مىقتاپ قاپەرگە تۇتايىق. ايتپەسە، بايقايمىن، اڭگىمە ءبىراز جەردى ۇڭگىپ كەتكەن ءتارىزدى. مۇنداي گۇج-گۇجدىڭ اقىرى ەكى جاقتى سىيدان ايىرىپ تىنادى.

بەرىك ءجۇسىپوۆ

Abai.kz