16 اقپان ۋكراينادا سوعىس باستالۋى مۇمكىن دەپ بولجام جاسالعان كۇن. ءبىر كۇننەن كەيىن ۋكراينادا ۇرىس قيمىلدارى باستالۋى مۇمكىن، ول تۋرالى رەسەيدىڭ اسكەري ارەكەتىنە قاراپ، باتىستىق بارلاۋشىلار اتالمىش اقپاراتتى ۇسىنعان بولاتىن. 

ۋكرايناداعى شيەلەنىسكە بايلانىستى الەم ەلدەرى ءوز ديپلوماتيالىق ميسسيالارىن ەۆاكۋاتسيالاپ جاتىر. ءبىرى ۋكراينادان كەتسە، ەندى ءبىرى ەلدىڭ باتىسىنا قاراي اۋىسۋعا شەشىم قابىلداعان. ناقتىلاپ ايتقاندا باسىم بولىگى لۆوۆقا ءوز ەلشىلىكتەرىن اۋىستىرعان.

قازىردىڭ وزىندە ۋكراينا جەرىنەن ءوز ازاماتتارىن كەتۋگە 39 مەملەكەت ۇندەۋ تاراتتى. يزرايل مەملەكەتى ءوز وتانداستارىن ۋكراينا جەرىنەن ەۆاكۋاتسيالاۋدىڭ ەكى جوسپارىن جاريالادى: اۋە جانە قۇرلىق ارقىلى. ىڭعايى كەلگەنشە اۋەدەن ەۆاكۋاتسيالاپ، قالعان ازاماتتاردى اۆتوبۋستار ارقىلى پولشاعا شىعارىپ، پولشا ارقىلى اكەتۋ جوسپارىن بەكىتتى.

حالىقتىڭ الاڭداۋىنا بايلانىستى زەلەنسكي كۇنى كەشە ۇندەۋ جاريالادى.

«ءبىزدى ۇلكەن سوعىسپەن قورقىتىپ، كەزەكتى رەت باسىپ كىرۋى مۇمكىن دەيتىن داتانى بەلگىلەپ جاتىر. بۇل العاشقى رەت ەمەس. بىراق، ءبىزدىڭ مەملەكەتىمىز ءدال قازىر بۇرىنعىدان بەتەر كۇشتى ءارى مىعىم.

ءبىز بەيبىتشىلىككە جاقپىز جانە بارلىق ماسەلەنى تەك كەلىسسوزدەر ارقىلى شەشكىمىز كەلەدى. دونباس تا، قىرىم دا ۋكرايناعا قايتا قوسىلادى. بۇل ديپلوماتيالىق جولمەن جۇزەگە اسادى. ءبىز بىرەۋدىكىنە قول سۇقپايمىز جانە وزىمىزدىكىن دە ەشكىمگە بەرمەيمىز! ءبىزدىڭ قۋاتتى ارميامىز بار! ءبىزدىڭ جىگىتتەرىمىزدە جەتكىلىكتى سوعىس تاجىريبە ءھام زاماناۋي قارۋ-جاراق بار. بۇل ەندىگى وسىدان سەگىز جىل بۇرىنعى ارميادان الدەنەشە ەسە قۋاتتى ارميا!
16 اقپان شابۋىلدىڭ باستالار كۇنى دەيدى. ءبىز بۇل كۇندى بىرلىك كۇنى ەتىپ بەلگىلەيمىز. ءتيىستى جارلىققا قول قويىلدى. بۇل كۇنى ءبىز بارلىعىمىز ۇلتتىق بايراعىمىزدى كوتەرىپ، سارى-كوك لەنتا تاعىپ، كۇللى الەمگە ءوزىمىزدىڭ بىرلىگىمىزدى كورسەتەمىز!

ءبىزدىڭ ءبىر ۇلكەن ماقساتىمىز- ەۋروپالىق ۇمتىلىسىمىز. ءبىز ەركىندىكتى قالايمىز جانە سول ءۇشىن كۇرەسۋگە دايارمىز! ءبىز بارلىعىمىز باقىتتى ءومىر سۇرگىمىز كەلەدى. ال باقىت اركەز كۇشتىلەردىڭ جانىندا. ءبىز ەشقاشان شەگىنىپ كورگەن جوقپىز جانە بۇل جولى دا شەگىنبەك ەمەسپىز.

ۋكراينانى جاقسى كورەيىك. ءبىز تىنىشپىز! ءبىز كۇشتىمىز! ءبىز بىرگەمىز!», - دەدى ۋكراينا باسشىسى.

زەلەنسكي ءوز ۇندەۋىندە 16 اقپاندا «بىرىگۋ كۇنى» دەپ جاريالاپ، ءدال سول كۇنى ۋكراين حالقىن بىرلىككە شاقىردى. سونىمەن قاتار اسكەريلەردى قارجىلاي دەمەۋ كولەمى ارتاتىنىن دا ايتتى.

مىنە، وسىنداي سوعىس الدىنداعى ساقتىق شارالارى جاسالىپ جاتقان ساتتە، قازاقستان ءۇنسىز وتىر. ءسىم تاراپىنان ناقتى ءبىر ساقتىق بويىنشا ۇندەۋ دە جاسالمادى. ۋكرايناعا بارۋ نەمەسە بارماۋ، ول جاقتا ۇرىس باستالسا قالاي ارەكەت ەتۋ كەرەك دەگەن نۇسقاۋلىقتار دا جوق. ۋكراينادا بيزنەس، وقۋ جانە باسقا دا ماسەلەلەر بويىنشا بىرنەشە مىڭ قازاقستاندىقتىڭ بارى ايتىلۋدا. قازاقستان ءسىم اۋعانستان كريزيسىنەن ساباق الماعان سىڭايلى.

Abai.kz