- ۇقۇش-عا مۇشە ەلدەردىڭ اسكەرىن شاقىرعانىڭىزعا وكىنبەيسىز بە؟
- رەسەيگە قارىز بولىپ قالعان جوقپىز با؟
- كەيبىر رەسەي ساياساتكەرلەرى قازاق جەرىنىڭ تۇتاستىعىنا كوز الارتىپ، سولتۇستىك وبلىستارىمىزدى الىپ قويۋدى ايتىپ ءجۇر.
- "قاڭتار قاسىرەتىنە" قاتىسقانداردىڭ ءبارى لاڭكەستەر ەمەس قوي؟ ول جايىندا نە ايتاسىز؟
- ۋاقىتشا تەرگەۋ ورىندارىندا قاتىگەزدىك بولىپ جاتقانىن بىلەسىز بە؟
- تالدىقورعاندىق ازامات باتىرباەۆتىڭ دەنەسىن كۇيدىرىپ، ىستىق ۇتىك باسقانىنان حاباردارسىز با؟
- "قاڭتار قاسىرەتى" نەدەن تۋدى؟ وعان نە سەبەپ بولدى؟
- ءسىزدىڭ "اكە تۋرالى تولعاۋ" اتتى كىتابىڭىز بويىنشا ءبىر پروديۋسەرلىك كومپانيا فيلم تۇسىرۋگە كىرىسىپ كەتىپتى. وعان نە دەيسىز؟
- سوڭعى كەزدەرى وليگوپوليا تۋرالى ءجيى ايتاسىز. وليگوپوليا دەگەن نە؟
- شەتەل اسىپ، وفشورلارعا تىعىلعان قازاقتىڭ قارجىسى ەلگە قايتا ما؟
- تۇڭعىش پرەزيدەنت تۋرالى كونستيتۋتسياعا ەنگەن باپتار وزگەرە مە؟
مەن جولما-جول، سوزبە-ءسوز قايتالاپ وتىرعان جوقپىن، بىراق، مەملەكەت باسشىسى ق-ك توقاەۆقا تەلەجۋرناليستيكامىزدىڭ جاۋىنگەر قىزى جاينا سلامبەك قويعان باتىل دا، وتكىر سۇراقتاردىڭ مازمۇنى وسىلاي بولدى. مويىندايىقشى، بۇرىن ءدال وسىنداي سۇراقتار قويىلىپ، وعان اشىق ءارى شىنايى جاۋاپتار بولىپ پا ەدى؟

سونىمەن...
پرەزيدەنتتىڭ ۇلتتىق ارنا تىلشىسىنە بەرگەن سۇحباتىن سوڭىنا دەيىن كورىپ، تىڭدادىم. دۇرىس. اشىق سۇحبات بولدى. جاينا سلامبەك كوپتىڭ كوكەيىندە جۇرگەن، ءارتۇرلى كۇمان تۋدىرىپ جۇرگەن سۇراقتاردى توتەسىنەن قويىپ وتىردى. پرەزيدەنت سونىڭ بارىنە بايىپپەن جاۋاپ بەردى.
الداعى ۋاقىتتا جۇزەگە اسۋعا ءتيىس رەفورمالار تۋرالى جانە ونى كۇزگە دەيىن سوزباي ناۋرىز ايىنداعى جولداۋىندا جاريالايتىنى دا كوڭىلگە قوندى. ويتكەنى ۋاقىت تىعىز.

شەتەل اسقان قارجىنى قايتارۋعا شىنداپ كىرىسكەنى بايقالدى پرەزيدەنتتىڭ. حالىق بولىپ قولداۋىمىز كەرەك.
ەڭبەكتى، ەڭبەكقورلىقتى يدەولوگياعا اينالدىرۋ كەرەك دەگەن ءسوزى اسىرەسە ۇنادى. ءتىل جايىندا دا شەگەلەپ تۇرىپ ايتتى.

وتىز جىل قايداعى جوققا امالسىزدان بولسا دا سەنىپ كەلگەن حالقىمىز وتىز كۇندە مۇلدە وزگەردى. وزگەرىس وتە كەرەك. بىراق وتىز جىلداعى كەلەڭسىزدىك اتاۋلىنىڭ وتىز كۇندە ورنىنا كەلە قالۋى دا قيىن ەكەنىن ەسكەرىپ، يگىلىكتى ىستەردى الداعى كۇندەردەن دە كۇتە بىلەيىك. قىسقاسى، بۇگىنگى سۇحباتىندا پرەزيدەنت جاڭا قازاقستاننىڭ كەلەشەگىن اڭعارتىپ سويلەدى. "بارەكەلدى!" دەيمىن ءوز باسىم.

داۋرەن قۋات

Abai.kz