وليمپيادا كەستەسىن كورىپ ەسكە ورالعان ەسكى اڭگىمە. 5 ملن 340 مىڭ حالقى بار نورۆەگيا 37 مەدالمەن وليمپيادا چەمپيونى. ءبىز تىپ-تىپيل!
1997 جىلى ستراتەگيالىق رەسۋرستار اگەنتتىگى اشىلعان. مەكەمەمىزگە كورشى. اپتاسىنا ءبىر رەت توراعاسىنا بارام. تانىمال تۇلعا. ەكونوميكا، مۇناي-گاز جالپى جەر استى بايلىقتارىمىزدى ەل يگىلىگنە ۇتىمدى پايدالانۋدى ءسوز ەتەمىز. "گوللاند اۋرۋى" تاقىرىبىن تارقاتاتىنبىز. قازاقستان گوللانديا ەلى تاپ بولعان ەكونوميكالىق كريزيسكە ۇرىنباي، جەدەل دامۋ جولدارىن ىزدەستىرگەن كەز. شۆەتسيادان دا وزىپ كەتەمىز دەپ قيالدانىپ جۇرگەن بالالىق ارمان. جاس رەفورماتور مينيستر وسى باعىتتا پارلامەنتكە ۇسىنباق زاڭدارىن دايىنداپ جاتقان. كەرەك قاعازداردى سۇراپ الىپ، ءبىلىپ-تۇيگەنىمدى ەفيردە ايتامىن. قازاقستان ەۆروپانىڭ ەڭ مىقتى ەلدەرىندەي وركەندەيتىنىنە وتە سەنىمدى ەدىك...

استاناعا كەتەر كەزدە باس سۇققام. قوراپ تولى كابينەتىندە كوشكە دايىندالىپ جاتقان... بىراق بۇل اگەنتتىك جاڭا ەلورداعا جەتپەدى. ۇلى كوشتىڭ شاڭىندا جۇتىلىپ قالعان ىزگى نيەتتى باستامانى سوسىن ەشكىم ەسىنە المادى...
"الدىمەن ەكونوميكا، سودان سوڭ ساياسات" دەگەندە، ەڭ ءبىرىنشى مىندەت وسى كەستەدەگى نورۆەگيا، شۆەتسيا، نيدەرلاندى مەملەكەتتەرىندەي ەل ەكونوميكاسىن جولعا قويۋ بولاتىن.

جالپى ساياسي ەرىك-جىگەر بولسا، “گوللاند اۋرۋىنان” ارىلىپ شىعۋعا ءالى دە كەش ەمەس. سامۇرىق قازىنا ءال-اۋقات قورى وسى مىندەتتى تولىق ورىنداۋعا مارتەبەسى دە قۇقىقتىق نەگىزدەرى جەتكىلىكتى.

ماحات سادىق

Abai.kz