سەپاراتيستىك لۋگانسك جانە دونەتسك وبلىستارىن رەسەي مويىندادى. ارتىنشا سيريا مەن مويىندالماعان ابحازيا، وڭتۇستىك وسەتيا دا مويىنداپ وتىر. ماسكەۋ وزگە ەلدەردىڭ قانداي شەشىم قابىلدايتىنىن كۇتۋدە. 

قازاقستاننىڭ سىرتقى ىستەر ءمينيسترى مۇحتار تىلەۋبەردى "لحر مەن ءدحردى مويىنداۋ ماسەلەسى كۇن تارتىبىندە جوق ەكەنىن، قازاقستان حالىقارالىق قۇقىق پەن بۇۇ جارعىسىنا ساي ارەكەت ەتەتىنىن" ايتتى. بۇل رەسەيلىك شوۆينيستەردىڭ اشۋىنا ءتيدى.

Russia Today رەداكتورى مارگاريتا سيمونيان بۇل سوزدەرگە اشۋلانىپ، بىلاي دەپتى: "ءبىز ولاردى نە ءۇشىن قۇتقاردىق؟". ال ءوزىنىڭ  الەۋمەتتىك جەلىدەگى تاعى  ءبىر جازباسىندا ول: "ەڭ جامان ادام - ول العىس ايتا المايتىن ءادامۇ ولار ءبىر ساتتە ساتقىندىققا بارا الادى", - دەپ قورىتىندى جاساپتى.  

سيمونيان قازاقستانعا قاتىستى ءبىرىنشى رەت مالىمدەمە جاساپ وتىرعان جوق. "قاسىرەتتى قاڭتار" وقيعاسىندا ول ۇقشۇ بىتىمگەرلىك كۇشتەرىن جىبەرۋ ءۇشىن قازاقستانعا كەلەسى تالاپتاردى قويۋعا ءتيىسپىز دەگەن ەدى: "قىرىمدى مويىنداۋ، كيريلليتسانى قالدىرۋ، قىرعىزستانداعى سياقتى ورىس ءتىلىن ەكىنشى مەملەكەتتىك ءتىل ەتۋ، قوجايىنعا وتىرىك ايتپاي، ورىس ءتىلى مەكتەپتەرىن جايىنا قالدىرۋ، رەسەيگە قارسى ۇەۇ-داردى قۋىپ شىعۋ، ۇلتشىلداردى قولداۋدى توقتاتۋ". ارينە، ونىڭ بۇل ساندىراعى رەسەيلىك شوۆينيستەردى ءبىر جەلپىندىرىپ قويدى.

قازاقستان بيلىگى ارينە مۇنداي اقپاراتتىق شابۋىلدارعا نازار اۋدارماي، مەملەكەتتىك مۇددە تۇرعىسىنان دۇرىس دەپ تاپقان، ۇلتتىق مۇددەگە ساي قىزمەتتى اتقارۋى ءتيىس.

Abai.kz