جۋىردا «egov.press» پورتالىندا «قازاقستاننىڭ ۇقشۇ مەن ەاەو قۇرامىنان شىعۋىن» تالاپ ەتكەن ارنايى پەتيتسيا جاريالانىپتى.

ونىڭ ماتىنىندە:

«قازاقستان بيلىگىنەن ۇقشۇ مەن ەاەو قۇرامىنان شىعۋىن جانە رەسەيمەن ەكىاراداعى بارلىق ينتەگراتسيالىق پروتسەسستەردى توقتاتۋىن تالاپ ەتەمىز. رەسەيمەن ارا-قاتىناسىمىز تۇبەگەيلى ءۇزىلۋى قاۋپى بولسا دا، رەسەيمەن تەك ديپلوماتيالىق جانە ەكونوميكالىق الشاقتىقتى ساقتاۋ كەرەك. ويتپەگەن جاعدايدا، رەسەي سەكىلدى ءبىزدىڭ ەلىمىزدى دە وقشاۋلاۋ ساياساتى كۇتىپ تۇر.

سونىمەن قاتار، ەكىاراداعى ترەنسپورتتىق مۇلىكتى جوعارى كەدەندىك راسىمدەۋ ماسەلەسى بار. سونىڭ ىشىندە العاشقى تىركەلىم مەن زاڭسىز ۋتيلالىم ماسەلەسى دە وزەكتى. بۇل ەاەو مۇددەسى ءۇشىن جاسالىپ جاتىر»، - دەپ جازىلعان.

اتالعان پەتيتسياعا قازىردىڭ وزىندە 5 مىڭنان اسا ادام قول قويىپ، 200-دەن اسا پىكىر جازىلىپتى.

ەاەو-عا كىرەتىن قازاقستان، رەسەي، بەلورۋس، ارمەنيا مەن قىرعىزستان الەمدىك قاۋىمداستىقتىڭ ەكونوميكالىق سانكتسياسىنا ۇشىراپ جاتىر. ونىڭ سالقىنىن قازاقستان قازىردىڭ وزىندە سەزىنۋدە. رەسەي جاعىنىڭ «ەۋرازيا ەكونوميكالىق وداعى (ەاەو) ەلدەرىنىڭ بىرىنە سانكتسيا سالىنعان جاعدايدا وداق مۇشەلەرىنىڭ بىرلەسكەن جاۋاپ شارالارىن قولداناتىنى» جايلى ايتۋى، ەۋرو وداقتىڭ سانكتسياسىنا قارسى قازاقستاندى دا بىرلەسىپ قارسى تۇرۋعا شاقىرۋى بارىپ تۇرعان ارانداتۋ. بۇل رەسەي تاراپىنان ونسىز دا ەكونوميكاسى قۇلدىراپ، قالت-قۇلت ەتىپ وتىرعان قازاقستاندى ساياسي سوعىس الاڭىنا تارتۋ.

سوزدالەل: ەاەو تەك قانا ءبىر رەسەيدىڭ مۇددەسىنە قىزمەت ەتەتىن ۇيىم. «ورتاق پارلامەنت»، «ورتاق ۆاليۋتا ەنگىزۋ»، «سبەر تسيفرلى باعدارلاماسى» سياقتى باستامالارى جانە باسەكەگە قابىلەتى تومەن باسقا ەلدەردى دە وداققا قوسۋعا تىرىسۋى رەسەيدىڭ وداقتا ەكونوميكالىق ەمەس، ساياسي مۇددەسى باسىم ەكەنىن كورسەتەدى.

ماسەلەن قازاقستان 2015-2020 جىلداردىڭ ىشىندە ەاەو اياسىنداعى ساۋدادان 44 ملرد دوللار جوعالتقان. بۇل شامامەن 2020 جىلعى جالپى ىشكى ءونىمنىڭ (180 ملرد دوللار) تورتتەن ءبىر بولىگى دەگەن ءسوز.

قاعاز جۇزىندە ەۋرازيالىق ەكونوميكالىق وداقتان بەس ەلدىڭ كەز كەلگەنى قالاعان ۋاقىتىندا شىعا الادى. رەسمي حابار تۇسكەننەن كەيىن 12 اي ىشىندە بۇل پروتسەسس تولىق اياقتالۋعا ءتيىس. ول تۋرالى ەاەو تۋرالى شارتتىڭ 118-بابىندا وداقتان شىققىسى كەلگەن مەملەكەت «وسى وداق اياسىندا اتالمىش ەلدىڭ قاتىسۋىمەن تۋىنداعان قارجىلىق مىندەتتەمەلەردى رەتتەۋگە مىندەتتى» ەكەنى جازىلعان.

Abai.kz