ۋكرايناداعى رەسەي اگرەسسياسىن توقتاتۋ ماقساتىندا الەمنىڭ دامىعان ەلدەرى ماسكەۋدى سانكتسيا قىسپاعىنا الۋدا. سانكتسيالار بىرلەسكەن فورماتتا نەمەسە جەكەلەگەن مەملەكەتتەر رەتىندە سالىنۋدا. 

رەسەي ءرۋبلى سانكتسيالار اسەرىنەن قۇلدىراپ بارادى. بۇل باتىستىق تاراپتىڭ رەسەي بانكتەرىنىڭ اكتيۆتەرىن بۇعاتتاپ، بىرقاتار رەسەيلىك بانكتى SWIFT-تەن اجىراتۋ تۋرالى شەشىم شىققان ساتتە ىسكە اسۋدا. بۇل قادام رەسەي نارىعىنداعى كوپتەگەن تولەم تۇرلەرىن توقتاتىپ تاستاۋى مۇمكىن، سانكتسيالار تەك ەنەرگەتيكا سالاسى بويىنشا عانا سالىنبادى.

رەسەي قارجى نارىعىندا ناعىز اجيوتاج باستالدى. سالىمشىلاردىڭ 30%-عا جۋىعى دەپوزيتتەرىن وزگە ەل ۆاليۋتاسىندا ۇستاعان. اقش-تىڭ سانكتسيالىق پاكەتىنە سبەربانك تە ەنگىزىلگەن ەدى. ال كەشەگى ەۋروپا ەلدەرىنىڭ بيرجاسىندا بانكتىڭ اكتسيالارى قۇلدىراپ، نولگە دەيىن ءتۇسىپ كەتكەن. اقش بانكتەرى سبەربانكپەن جاسالاتىن بارلىق اۋدارىم جانە تولەم قۇجاتتارىن 26 ناۋرىزعا دەيىن اياقتاۋى ءتيىس، ودان كەيىن بۇل بانكپەن بايلانىس تولىق ۇزىلەدى.

العاشقى جويقىن سانكتسيالار 22-23 اقپان كۇندەرى سالىنا باستادى. ول رەسەيدىڭ لۋگانسك جانە دونەتسك بۇلىكشىلەرىن جەكە مەملەكەت دەپ مويىنداعانىنان كەيىن، قارسى جاۋاپ رەتىندە ىسكە استى. ال 24 اقپان كۇنى رەسەي باسىپ كىرگەن ساتتە، باتىس ەلدەرىنىڭ جويقىن سانكتسيالارى كۇشەيە ءتۇستى. سول كۇنى اق، ەۋروپا مەن اقش رەسەيگە سانكتسيانى كۇشەيتتى.

اقش سانكتسيا سالعان رەسەيلىك بانك تۇتىنۋشىلارى Apple Pay مەن Google ءPayدى تولەماقىنى ىسكە اسىرۋ ماقساتىندا قولدانۋ قۇقىعىنان ايىرىلدى. سونىمەن بىرگە، اقش پەن ەۋروپا ەلدەرى رەسەيگە جوعارى تەحنولوگيالىق تاۋارلاردى جەتكىزۋ، ەنەرگەتيكا سالاسىنا ارنالعان قۇرىلعىلاردى بەرۋگە تىيىم سالدى. سونداي-اق، ەندىگى ۋاقىتتا باتىس رەسەيگە ۇشاق ساتپايدى. ال قازىرگى رەسەيدە بار ۇشاقتارعا تەحنيكالىق جوندەۋ قىزمەتتەرىن كورسەتپەيدى. بۇل الداعى ۋاقىتتا رەسەيدىڭ ازاماتتىق اۆياتسياسى ۇشاقتارىنىڭ تەڭ جارتىسىنان ايىرىلۋى مۇمكىن دەگەندى بىلدىرەدى.

ال دەمالىس كۇندەرى اقش پەن ەۋروپا سانكتسيالاردىڭ ءۇشىنشى لەگىن سالدى. بۇل جولى رەسەي ەكونوميكاسى ەسەڭگىرەپ قالدى دەسەك تە بولادى. سەبەبى سانكتسيا ەنگىزۋ بارىسىندا العاش رەت رەسەيلىك بانكتەردى SWIFT-تەن اجىراتۋ ايتىلدى. سونىمەن بىرگە، رەسەيدىڭ ورتالىق بانكىنىڭ اكتيۆتەرى بۇعاتتالدى. بۇل رەسەيدىڭ ەڭ قۋاتتى بانكى سانالادى.

رەسەي اسكەري قيمىلداردى باستاعان ساتتە-اق، رەسەي تۇرعىندارى جاپپاي ەسەپشوتتارىنان اقشا شەشە باستادى. ساراپشىلار الداعى ۋاقىتتا ءسوزسىز ينفلياتسيا كولەمى ارتاتىنىن ايتادى.

رەسەيدى ەكونوميكالىق قىسپاققا الۋ جالعاسىن تابادى. بۇل تۋرالى ەۋروپالىق وداق مەملەكەتتەرى مالىمدەدى. الداعى ۋاقىتتا ەۋروپا رەسەي گازىنان تولىق باس تارتۋعا نيەتتى، قازىردىڭ وزىندە «سولتۇستىك اعىم-2» گاز قۇبىرى ىسكە قوسىلمايتىنى بەلگىلى بولدى. اتالمىش جوباعا رەسەي 11 ملرد دوللار جۇمساعان بولاتىن.

رەسەيگە سانكتسيا سالۋدى ءتىپتى، 1815 جىلدان بەرى الەمدىڭ ساياساتتا بەيتاراپتىق پوزيتسياسىن ۇستانىپ كەلە جاتقان شۆەيتساريا دا قۇپتادى. شۆەيتساريا ەكى بىردەي جاھاندىق سوعىستىڭ وزىندە بەيتاراپ قالعان بولاتىن.

Abai.kz