سەيسەنبى كۇنى ەۋروپارلامەنت باسىم داۋىسپەن ۋكرايناعا ەۋرووداققا مۇشە بولۋ ءۇشىن ۇمىتكەر مەملەكەت دەگەن مارتەبە بەرۋ جونىندەگى رەزوليۋتسيانى قولدادى. الايدا ەو-عا مۇشە بولۋ ءۇشىن بەلگىلى ءبىر ەرەجەلەر ساقتالۋى قاجەتتىگى ايتىلعان.

ۋكراينا بيلىگى ەو-عا مۇشە بولىپ كىرۋ جونىندەگى ءوتىنىشىن جەدەل قابىلداۋىن سۇراعان.

رەزوليۋتسيادا رەسەي اسكەري كۇشتەرىنىڭ ۋكرايناعا باسىپ كىرۋى جانە بەلارۋس پرەزيدەنتى الەكساندر لۋكاشەنكونىڭ ارەكەتى ايىپتالعان. سونىمەن بىرگە الەم قاۋىمداستىعىن ۋكرايناعا گۋمانيتارلىق كومەك كورسەتىپ، بوسقىندارعا قول ۇشىن بەرۋگە شاقىرادى.

رەزوليۋتسيادا رەسەيدەن مۇناي جانە گاز الۋدى شەكتەۋدى، ەو-عا رەسەيگە ينۆەستيتسيا جاساۋدى توقتاتۋدى، سونىمەن بىرگە SWIFT جۇيەسىنەن ءوشىرۋ تالاپ ەتىلگەن. رەسەي مەن بەلارۋستىڭ جوعارى لاۋازىمدى شەنەۋنىكتەرىنە قارسى سانكتسيا سالۋعا قولداۋ كورسەتەدى.

ەۋروپا دەپۋتاتتارى ۋكراينا پرەزيدەنتى ۆلاديمير زەلەنسكي ۆيدەو ارقىلى بايلانىسقا شىققان كەزدە، ورىندارىنان تۇرىپ قول شاپالاقتادى. زەلەنسكي سوزىندە مىڭداعان ادامىن قۇربان ەتۋ ارقىلى رەسەي اگرەسسياسىنا قارسى تۇرىپ، ەۋرووداق ەلدەرىن ۋكرايناعا قولداۋ كورسەتۋ ماقساتىندا بىرىكتىرە الدى دەدى. پرەزيدەنت سوزىندە ۋكراينا ەۋروپالىق باعىتتى تاڭدايتىنىن، تەڭ قۇقىقتى ەۋروپالىق ۇلتتىڭ وكىلى بولىپ، ەۋرووداققا مۇشە بولعىسى كەلەتىنىن ايتتى.

نەگىزگى ەرەجە بويىنشا، ەو-عا مۇشە بولۋ كوپتەگەن جىلداردى قاجەت ەتەدى. كەيدە ون جىلعا سوزىلادى. بىرقاتار ەلدەر ۋكراينانى ەو-عا كىرۋدى تەزدەتۋدى قولدادى.

Abai.kz