ۋكراينانىڭ توتەنشە جاعدايلار جونىندەگى مەملەكەتتىك قىزمەتى كيەۆتەگى تەلەمۇناراعا جاسالعان شابۋىلدان كەمى بەس ادام قازا تاۋىپ، بەس ادام زارداپ شەككەنىن مالىمدەدى.

شابۋىل سالدارىنان ۋكراينانىڭ تەلەارنالارى ىستەمەي قالدى. ولار حاباردى يۋتۋب كانالدارىندا جالعاستىرىپ جاتىر. جاقىن ارادا ۋكراينالىق تەلەارنالار قوسالقى اپپاراتقا قوسىلاتىنى حابارلاندى.

بۇگىن تۇستە رەسەي قورعانىس مينيسترلىگى "رەسەيگە قارسى اقپاراتتىق شابۋىلدى توقتاتۋ ءۇشىن" كيەۆكە شابۋىل جاسالاتىنىن ايتقان ەدى.

تەلەمۇنارا بابي يار شاتقالىندا ورنالاسقان. مۇندا كەزىندە ۋكراينانى نەمىس ساربازدارى باسىپ العان كەزدە، بەيبىت تۇرعىنداردى، ەۆرەيلەردى، سىعانداردى جانە سوۆەت تۇتقىندارىن جاپپاي اتىپ، جەرلەگەن.

تەلەمۇنارا بيىكتىگى 385 مەتر. وسىنىڭ الدىندا رەسەيدىڭ قورعانىس مينيسترلىگى كيەۆتەگى اسكەري نىساندارعا شابۋىل جاسايتىنىن، رەسەيگە قارسى اقپاراتتىق سوعىس ءجۇرىپ جاتىر دەپ حابارلاعان.

Abai.kz