ءماجىلىس توراعاسى ەرلان قوشانوۆ قاڭتار وقيعاسى كەزىندە بيلىك تاراپىنان نەلىكتەن وق اتىلعانىن ءتۇسىندىردى.

ونىڭ ايتۋىنشا، انتيتەرروريستىك وپەراتسيا جۇرگىزۋ تۋرالى شەشىم قاۋىپسىز كەڭەسى وتىرىسىندا قابىلدانعان.

«ءبىز مۇنى دۇرىس ءتۇسىنۋىمىز كەرەك. ويتكەنى بۇل تەرروريستىك شابۋىل بولدى. «وق اتۋ»،  «انتيتەرروريستىك وپەراتسيا» دەگەن قاۋىپسىزدىك كەڭەسىنىڭ قۇقىعىنا كىرەدى. سول بويىنشا شەشىم قابىلداندى.

اسكەريلەردىڭ، قۇقىق قورعاۋ ورگاندارىنىڭ ومىرىنە، مەملەكەتتىڭ كونستيتۋتسيالىق قۇرىلىمىنا قاۋىپ تونگەن جاعدايدا جانە ادامداردىڭ ءومىرى مەن دەنساۋلىعىنا قاۋىپ تونگەن كەزدە وق اتۋعا رۇقسات بار»، - دەدى قوشانوۆ.

قوشانوۆ ءوزى دە انتيتەرروريستىك وپەراتسيانى قولداعانىن ايتتى.

«ءبىز نەگە قولداماۋىمىز كەرەك؟ بۇكىل قازاقستان كۋا، سول كەزدە مەملەكەتتىڭ تاعدىرى قىل ۇستىندە تۇردى. اسىرەسە، الماتى، تالدىقورعان، تاراز قالالارى. وسى شەشىم قابىلدانباعاندا، جاعداي باسقاشا بولاتىن ەدى. مەن بيلىكتىڭ وكىلى رەتىندە بار جاۋاپكەرشىلىكتى الىپ، سىزدەرگە ايتىپ تۇرمىن. بيلىك قاڭتار وقيعاسىنان كەيىن بارلىق شىندىقتى ايتىپ وتىر. ەشبىر جاسىرىپ قالعان ماسەلە جوق»، - دەدى سپيكەر.

«تەرگەۋ نەگە ۇزاققا سوزىلدى»؟ ،-دەگەن سۇراققا سپيكەر وقيعادان كەيىن كوپ ۋاقىت وتپەگەنىن العا تارتتى.

«ەكى اي عانا ءوتتى. بۇل وتە اۋقىمدى تەرراكت. مىڭداعان ادام قاتىستى. مۇنىڭ ءبارىن دالەلدەۋ كەرەك. قانداي دا ءبىر ادامدى كىنالاۋ ءۇشىن دالەلدەر كەرەك. سوندىقتان، بۇل وتە ۇلكەن جۇمىس. مەنىڭ ويىمشا بۇل تەز بىتەتىن نارسە ەمەس»، - دەپ نورۆەگيالىق قىلمىسكەر برەيۆيكتىڭ قىلمىسىن دالەلدەۋ ءۇشىن جارتى جىل ۋاقىت كەتكەنىن مىسالعا الدى.

«سوندىقتان بۇل قازىرگى ۋاقىتتا پروكۋراتۋرامەن قۇقىق قورعاۋ ورگاندارى اينالىسىپ جاتقان وتە ۇلكەن كۇردەلى ماسەلە»، -دەدى قوشانوۆ.

Abai.kz