رەسەيگە سالىنعان سانكتسيالاردىڭ اسەرىنەن جۇزدەگەن كومپانيالار رەسەي نارىعىنان كەتۋدە. رەسەي ازاماتتارى اراسىندا دا "وزگە ەلدىڭ ازاماتتىعىن قالاي الۋعا بولادى" دەگەن سۇرانىس سانى ارتقان. الەۋمەتتىك جەلىدەگى جازابالارعا قاراپ، اسىرەسە قازاقستان مەن قىرعىزستان ازاماتتىعىن العىسى كەلەتىندەردىڭ كوپ ەكەنى بايقالادى. 

رەسەيلىكتەر ازاماتتىق الۋ ماسەلەسىندە ەۋروپا ەلدەرىنە باسىمدىق بەرمەگەن. ول جاعى تۇسىنىكتى دە. ەۋروپا حالقىنىڭ كوزقاراسى، رەسەيگە سالىنعان تىيىمدار ماسەلەسى بار.

الەۋمەتتىك جەلىدە قازاقستان مەن قىرعىزستانعا قونىس اۋدارۋعا قاتىستى ارنايى توپتار، قاۋىمداستىقتار، ارنالار اشىلعان. وندا قۇجات جيناۋ، پاتەر جالداۋ، جۇمىس ىزدەۋ، ءتىل ۇيرەنۋ، مەكتەپ پەن ۋنيۆەرسيتەتتە وقۋ جاعدايى، ءدارى-دارمەك، ازىق-تۇلىك باعاسى جانە باسقالار تالقىلانىپ، كەڭەس بەرىلەدى.

رەسەيلىكتەر قازاقستاندا ءتيىمدى قولدانۋعا بولاتىن ونلاين سەرۆيستەردى يگەرۋ ۇستىندە. كولىكتى جالعا الۋ نەمەسە تاكسي شاقىرۋ بويىنشا Yandex, Uber, Indriver, Anytime, تاماققا تاپسىرىس بەرۋ بويىنشا Chocofood, Glovo, Wolt, ياندەكس.ەدا، ماركەتتەن تاماق جەتكىزۋ بويىنشا arbuz, magnum go قوسىمشالارىن جۇكتەۋ جانە يگەرۋ سانى ارتقان. اتالمىش قوسىمشالاردىڭ باسىم بولىگى رەسەيدە دە جۇمىس ىستەيدى، سوندىقتان رەسەيلىكتەر ءۇشىن قوسىمشالاردى قولدانۋ قيىندىق تۋىنداتپايدى. سونىمەن قاتار krisha.kz, kolesa.kz جانە hh.kz قوسىمشالارىن دا جۇكتەۋ سانى ارتقان.

رەسەيلىك ازاماتتار قىرعىزستان مەن قازاقستاندى تىلدىك جاعىنان ءتيىمدى سانايتىنىن جاسىرمايدى. سونىمەن قاتار قازاقستان مەن قىرعىزستان رەسەيمەن بىرگە ەۋرازيالىق وداق جانە ۇقشۇ-عا مۇشە. سوندىقتان قونىس اۋدارعىسى كەلەتىن رەسەيلىكتەر رەسەيدەن ءبىرجولاتا كەتۋدى قالامايتىنى كورىنىپ تۇر. ولاردىڭ باسىم بولىگى ەكونوميكالىق جاعدايعا بايلانىستى كەتۋدى ۇيعارسا، كەيبىرى پۋتين رەجيمىندە ءومىر سۇرگىسى كەلمەيتىنىن ايتادى.

قازاقستانعا قانشا رەسەيلىكتىڭ قونىس اۋدارۋ مۇمكىن ەكەندىگى جايلى ناقتى اقپاراتتار جوق. قازاق قوعامى بۇل قۇبىلىسقا الاڭداۋشىلىق بىلدىرۋدە. ولار تىڭ يگەرۋ كەزەڭىندەگىدەي تاعى دا قازاق تىلىنە سوققى جاسالۋى مۇمكىن دەپ ەسەپتەيدى. قوعام بەلسەندىلەرى قانداستاردان باسقالارعا ازاماتتىق بەرۋدى بەس جىلعا توقتاتۋ كەرەك دەپ سانايدى.

اسحات قاسەنعالي

Abai.kz