كەشە، 13 ناۋرىز كۇنى قر جەمۇورلىققا قارسى ءىس-قيمىل اگەنتتىگى ەكس-پرەزيدەنت نۇرسۇلتان نازارباەۆتىڭ نەمەرە ءىنىسى قايرات ساتىبالدىنى تۇتقىندادى.

انكوردىڭ ايتۋىنشا، قايرات ساتىبالدى «قازاقتەلەكوم» اق-نىڭ قوماقتى قارجىسىن قولدى قىلدى  جانە قىزمەتتىك وكىلەتتىگىن اسىرا پايدالاندى دەگەن كۇدىكپەن ۇستالعان. ول قازىر ۋاقىتشا تەرگەۋ يزولياتورىنا قامالعان.

رەسمي اقپاراتتا: «جەمقورلىققا قارسى كۇرەس قىزمەتى «قازاقتەلەكوم» اق-نىڭ قوماقتى قارجىسىن جىمقىرۋ جانە قىزمەتتىك وكىلەتتىگىن اسىرا پايدالانۋ» فاكتىسى بويىنشا قىلمىستىق ءىس تەرگەلۋدە. اتالعان قىلمىستاردى جۇزەگە اسىردى دەگەن كۇدىكپەن قايرات ساتابالدىۇلى ۇستالىپ، ۋاقىتشا تەرگەۋ يزولياتورىنا قامالدى»، - دەلىنگەن.

ۆەدومستۆونىڭ اقپاراتىنشا، ساتىبالدىنىڭ باسقا دا قىلمىستارعا قاتىسى بولۋى مۇمكىن. سونىڭ ىشىندە، مەملەكەت قاۋىپسىزدىگىنە نۇقسان كەلتىرۋ ىسىنە قاتىستىلىعى دا تەكسەرىلۋدە. «تەرگەۋ جۇرگىزىلىپ جاتىر. وزگە اقپاراتتار تەرگەۋ مۇددەسىنە ساي جاريالانبايدى»، - دەلىنگەن.

قايرات ساتىبالدى 1970 جىلى تۋعان. ءار جىلدارى ءتۇرلى لاۋازىمدى قىزمەتتەردىڭ باسشىلىعىندا بولدى. سونىڭ ىشىندە، قر ۇلتتىق قاۋىپسىزدىك كوميتەتىندە، بيلىكتەگى بۇرىنعى «نۇر وتان» پارتياسىنىڭ حاتشىلىعىندا، بيزنەستە باسشىلىق جاسادى. 2000 جىلدارى استانا قالاسى (قازىرگى – نۇر-سۇلتان) اكىمىنىڭ ورىنباسارى بولدى. «KazakhOil» كومپانياسىنىڭ ۆيتسە-پرەزيدەنتى، «قازاقستان تەمىر جولى» كومپانياسىنىڭ ءبىرىنشى ۆيتسە-پرەزيدەنتى بولعان.

ول 2018 جىلى قازاقستانداعى ەڭ ىقپالدى 50 كاسىپكەردىڭ قاتارىنا كىرگەن («Forbes» جۋرنالىنىڭ رەيتينگى). ونىڭ ەسىمى بىرنەشە مارتە وفشور قۇجاتتارىندا اتالعان.

Abai.kz