بۇرىنعى پرەزيدەنتتىڭ قۇداسى، ەلدەگى ءىرى كاسىپكەر قايرات بورانباەۆتى الماتىدا قارجى مونيتورينگى اگەنتتىگىنىڭ قىزمەتكەرلەرى ۇستادى.

قايرات بورانباەۆتىڭ ۇستىنەن قانداي ءىس قوزعالعانى ءالى بەلگىسىز. رەسمي ورگاندار بۇل تۋرالى مالىمدەمە جاساعان جوق.

«بورانباەۆتى الماتىدا قارجى مونيتورينگى اگەنتتىگىنىڭ (ققا) قىزمەتكەرلەرى ۇستادى. ونىڭ ىسىنە قاتىستى الماتى دەپارتامەنتى ەمەس، استاناداعى قارجى مونيتورينگى اگەنتتىگىنىڭ باس كەڭسەسىنىڭ ادامدارى جۇمىس ىستەپ جاتىر. قازىر بورانباەۆ ۋاقىتشا ۇستاۋ يزولياتورىنا قامالدى. جاقىن كۇندەرى الماتىدا تەرگەۋ جۇمىستارى وتكىزىلەدى»، – دەلىنگەن حابارلامادا.

بورانباەۆ ەلدەگى ەڭ ءىرى بايلاردىڭ ءبىرى. ول «Forbes Kazakhstan» رەيتينگىندە 590 ميلليون دوللار بايلىعىمەن 14-ءشى ورىندا تۇر.

قايرات بورانباەۆ – «قايرات» فۋتبول كلۋبىنىڭ يەسى، قازاقستان رەسپۋبليكاسى پاراليمپيادا كوميتەتىنىڭ پرەزيدەنتى، ۇلتتىق وليمپيادالىق كوميتەتتىڭ (ۇوك) پاراليمپيادالىق سپورتتى دامىتۋ جونىندەگى ۆيتسە-پرەزيدەنتى، ۋەفا ادال ويىن جانە الەۋمەتتىك جاۋاپكەرشىلىك كوميتەتىنىڭ مۇشەسى.

سونىمەن قاتار ول «Fitnation» فيتنەس كلۋبىنىڭ، «راحات پالاس»، «Comfort Hotel Astana» قوناق ۇيلەرىنىڭ يەسى، «Esentai Mall»، «Esentai Tower» بيزنەس ورتالىعىن، «المالى» ساۋدا ورتالىعىن، لاتۆياداعى «Jurmala Golf Club & Hotel» قوناقۇيىن سەرىكتەسىمەن ءبولىسىپ باسقارادى. «McDonalds» تاماقتانۋ ورنىنىڭ قازاقستانداعى جانە رەسەيدەگى فرانچايزينگ يەسى.

بۇعان دەيىن،  13 ناۋرىزدا ەكس-پرەزيدەنتتىڭ ءىنىسى قايرات ساتىبالدى ۇستالعان ەدى. سىبايلاس جەمقورلىققا قارسى قىزمەت «قازاقتەلەكوم» اق-نىڭ لاۋازىمدىق وكىلەتتىكتەرىن اسىرا پايدالانۋ جانە قاراجاتىن اسا ءىرى مولشەردە ۇرلاۋ فاكتىلەرى بويىنشا قىلمىستىق ءىستى تەرگەۋدە. 15 ناۋرىزدا ونى ەكى ايعا قاماۋعا الدى.

Abai.kz