پرەزيدەنتتىڭ جولداۋىن حالىققا جازىپ، بۇگە-شىگەسىنە دەيىن ءتۇسىندىرىپ جاتساڭ، “جاعىمپازدانىپ جاتسىڭ”، - دەيدى!
ەلدىڭ ءبارى ۇيدە تەلەديداردىڭ الدىندا وتىرمايدى، الەۋمەتتىك جەلىنى تۇسىنبەيتىندەر دە بار، جاسىراتىنى جوق… قازىرگى قوعامدا كۇن كورىستىڭ قامىمەن كوشە كەزىپ جۇرگەندەر دە جەتەرلىك!
اۋىل ايماقتاردى ارالاپ جۇرگەندە ءبىرازىن وسى فەيسبۋكقا تىركەلۋدى ۇيرەتتىم!

“ايگۇل حانىم، پرەزيدەنتىمىز نە دەدى؟ ەلدەگى احۋال نە بولادى؟ جاقسى جاعىنا وزگەرىس بولادى ما ءوزى؟”، - دەپ جازبالارىمدى كۇتىپ وتىراتىن وقىرماندارىم كوپ...

ءيا، پرەزيدەنتتى ماقتاۋ ءۇشىن ەمەس، سوناۋ ەل اراسى - اۋىل-ايماقتا وزىمە سەنىم ارتىپ، ءار جازبامدى اسىعا كۇتىپ وقىپ وتىراتىن حالىق ءۇشىن جازامىن! سوندىقتان، بۇل جازبالارىم - مەن ءۇشىن ۇلكەن جاۋاپكەرشىلىك!
راسىندا… حالىقتى ساياسي ساۋاتتاندىرۋ - ءبارىمىزدىڭ مىندەتىمىز!
اسىرەسە، ءبىز - قوعام بەلسەندىلەرى ەلدىڭ الدىنداعى جاۋاپكەرشىلىكتى ءجىتى سەزىنىپ، باستى ورىنعا قويۋدى ۇمىتپاۋىمىز كەرەك!
حالىقتىڭ ساۋاتى ارتىپ، كوپ بىلگەن سايىن، جەرگىلىكتى اكىم-قارالار بىلگەنىن، ويلارىنا كەلگەن “ويىندارى” مەن زاڭسىزدىقتارىن جاساي المايدى!
پرەزيدەنتتىڭ ءاربىر ءسوزىن - حالىقتىڭ قۇلاعىنا جەتكىزسەك، حالىقتىڭ دا جەرگىلىكتى بيلىككە قويار تالابى كۇشەيەدى!

اكىم-قارالاردىڭ جوعارىعا وتىرىك ەسەپ بەرەتىنىن - بارشاڭىز بىلەسىزدەر!
حالىق ماسەلەسىن ايتىپ، سان-ساققا سابىلىپ، شىرىلداپ جاتسا دا - تەندەرگە بايلانعان ءماسليحات دەپۋتاتتارى مىڭق ەتپەيدى. بۇل - وتىز جىلدىق “جۇگەنسىز جۇيەنىڭ” ناتيجەسى!

ەلدەگى مۇنداي “باتپان بىلىقتىڭ” ءبارىن ءبىلىپ، كوزبەن كورىپ وتىرىپ، ءتىپتى پرەزيدەنتتىڭ جولداۋىنا مەنسىنبەي… ءار تاپسىرما-تۇجىرىمىن مازاققا اينالدىرعاندارعا - اشىنىپ، وسى جازبانى اشىق جازعىم كەلدى!
ءوزىڭ جازبايسىڭ با، حالىققا تۇسىنىكتى ءارى جالپاق تىلدە جازىپ، جىلىكتەپ جەتكىزىپ وتىرعان ازاماتتارعا كەدەرگى جاساما!

بۇل ەل، قازاقستانىمىز - تەك پرەزيدەنتكە ەمەس، بارىمىزگە كەرەك!
سەنسەڭىز، مەملەكەت باسشىسى ق.توقاەۆ ءوزىنىڭ ارتىندا ەسكەرتكىشىن قالدىرىپ كەتكىسى كەلىپ وتىرعانى شامالى-اق، ول ءتىپتى ماداق-ماقتاۋدى دا قاجەت ەتپەيدى!
ارينە، ارامىزدا “ەسكى جۇيەنىڭ” كوز-سىنىقتارى بار، ولار “ەسكى اۋەنگە” ساپ - ماقتايدى دا، جاعىمپازدانادى دا! بىراق، ونىڭ ءبارىن ۋاقىت وتە تۇسىنەدى!
ال قازىر بۇرىنعى ودالاردىڭ ايتىلماۋى ءۇشىن، ءبارىمىز كۇرەسىپ، جۇمىلا جول بەرمەۋىمىز كەرەك!

پرەزيدەنتتىڭ دۇرىس شەشىمىن - دۇرىس، بۇرىس جەرىن - بۇرىس دەپ، ونى ەلدىڭ الدىندا اشىق ايتىپ وتىرۋ - ول جاعىمپازدىق ەمەس!
الايدا، سىن ايتۋ كەرەك ەكەن دەپ، جاسالىپ جاتقان ات توبەلىندەي اۋقىمدى جۇمىستاردى جوققا شىعارۋ - بۇل دۇرىس ەمەس! قازىر حالىقتىڭ دا - كوزى اشىق، كوكىرەگى وياۋ! اق پەن قارانى اجىراتا الادى…
حالىقتىڭ الەۋمەتتىك جەلىدەگى كوپ ۇندەۋلەرى مەن شاعىمدارى پرەزيدەنتتىڭ وزىنە ارنالادى!

ەندەشە، حالىقتىڭ ءۇنىن ەستىپ، سونىڭ وزەكتى دەگەن ءبىرازىن ءوز جولداۋىنا ەنگىزىپ، حالىقتىڭ سەنىمىنە يە بولۋ - ۇلكەن جۇمىس، زور مارتەبە! ال ەلدەگى جاعدايدى جانە پرەزيدەنتتىڭ قۇزىرلى جانە اتقارۋشى ورگاندارعا جۇكتەپ جاتقان تاپسىرمالارىن بوياماسىز ءارى بۇكپەسىز اتاپ ءوتىپ، جەكە كوزقاراس-پىكىرىمدى ەلگە جەتكىزۋ - مەنىڭ ازاماتتىق پارىزىم. ازاماتتىق قوعام دەگەنىمىز دە وسى!

جاڭا قازاقستاندى - جالعىز پرەزيدەنت ەمەس، ونى ءسىز بەن ءبىز بىرلەسە قۇرامىز!

ايگۇل ورىنبەك

Abai.kz