رەسەي مەن جاپونيا اراسى سوڭعى ءبىر اي ىشىندە شيەلەنىسكەن قاقتىعىسقا ۇلاستى. وعان باستى سەبەپ رەسەيدىڭ كۋريل ارالدارى بويىنشا كەلىسسوزدەردەن شىعىپ كەتۋى بولىپ تۇر. رەسەي كۋريل ارالدارى ماسەلەسىن تالقىلاۋدان باس تارتتى. رەسەي كونستيتۋتسياسى وزگەرگەن سوڭ، رەسەي ءوزىنىڭ تەرريتورياسىنا قاتىستى تالقىلاۋلاردى وتكىزۋگە زاڭ جۇزىندە تىيىم سالعان بولاتىن. 

ۋكرايناعا باسىپ كىرگەن رەسەيگە توكيو سانكتسيا سالۋدى قولداپ، ازيا قۇرلىعىندا سانكتسيا سالۋدان كوش باستادى. وعان رەسەيدىڭ كيەۆكە اگرەسسياسىمەن قاتار، ماسكەۋدىڭ كۋريلدى تالقىلاۋدان باس تارتقانى دا اسەر ەتتى. 2014 جىلى رەسەي قىرىمدى تارتىپ العان ساتتە توكيو ماسكەۋدى قاتاڭ ايىپتادى، الايدا سانكتسيا سالۋدا بەلسەندىلىك تانىتپادى. بۇل جولى كەرىسىنشە، سەبەبى رەسەي توكيونىڭ كەلىسسوزگە قاتىستى بەتىن قايتارىپ تاستادى.

جاپونيا ەندىگى تاڭدا كۋريلگە قاتىستى «وككۋپاتسيا» تەرمينىن قولدانا باستادى. سوڭعى رەت ول تەرميندى 2003 جىلى قولدانعان بولاتىن. سودان بەرى «كۋريل ارالدارى جاپونياعا تيەسىلى» سوزتىركەسىن قولدانىپ كەلگەن. ال «وككۋپاتسيا» تەرمينىن قولدانۋ توكيونىڭ رەسەيگە دەگەن كوزقاراسىنىڭ تىم سۋىپ كەتكەنىن كورسەتەدى. اسكەري ساراپشىلار «وككۋپاتسيا» دەگەن تەرميندى «جاۋ قولىنداعى جەردى ازات ەتۋ» دەپ تۇسىنسە دە بولادى دەيدى.

رەسەي جاپونيانىڭ تيتىعىنا تيگەن تاعى ءبىر ارەكەتكە باردى. ول كۋريلدە ءىرى اسكەري جاتتىعۋ باستادى. جاتتىعۋعا 3 مىڭنان استام سارباز قاتىسۋدا. توكيو ءسىم رەسەيگە قاتىستى سانكتسيالىق قىسىمدى كۇشەيتۋ كەرەكتىگىن مالىمدەدى جانە تەڭىز اسكەري كۇشتەرىنىڭ جاتتىعۋىن وتكىزۋدى جوسپارلاپ وتىر.

2018 جىلى رەسەي باسشىسى ۆلاديمير پۋتين جاپونياعا ەش شارتسىز بەيبىت كەلىسىم جاساۋدى ۇسىنعان بولاتىن. سول ارقىلى كۋريل ماسەلەسىن تالقىلاۋدى دوعارۋ كەرەكتىگىن مەڭزەگەن ەدى، الايدا جاپونيا باس تارتتى.

Abai.kz