ءماجىلىستىڭ بۇرىنعى سپيكەرى نۇرلان نىعماتۋللين مەن الماتىنىڭ بۇرىنعى اكىمى، بۇرىنعى «Nur Otan» پارتياسى توراعاسىنىڭ ەكس-ءبىرىنشى ورىنباسارى باۋىرجان بايبەك «شارۋاشىلىق قىزمەتى» تەكسەرىلىپ جاتىر دەگەن اقپارات پايدا بولدى. بۇل تۋرالى «ۆىحود ك پراۆدە» Telegram-ارناسى حابارلادى.

«بۇگىن جەلىدە جازىپ جاتقانداي، «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك پەن ءماجىلىستىڭ ەكس-سپيكەرى نۇرلان نىعماتۋلليننىڭ دە «شارۋاشىلىق قىزمەتى» تەكسەرىلىپ جاتىر»، - دەلىنگەن حابارلامادا.

بۇعان دەيىن ءماجىلىستىڭ ەكس-سپيكەرى نۇرلان نىعماتۋليننىڭ ناۋرىزدىڭ ورتاسىندا، بۇرىنعى پرەزيدەنت نۇرسۇلتان نازارباەۆتىڭ نەمەرە ءىنىسى قايرات ساتىبالدى ۇستالعاننان كەيىن شەتەلگە كەتىپ قالدى دەگەن اقپارات شىققان بولاتىن.

اقپارات بويىنشا، نىعماتۋلين استانادان اتىراۋعا جەكە ۇشاعىمەن ۇشىپ، ودان ءارى قاراي Comlux كومپانياسىنىڭ ۇشاعىنا وتىرىپ، باكۋگە اتتانعان. وسىلايشا نىعماتۋللين ءوزىنىڭ ەلدەن كەتكەنىن جاسىرعىسى كەلگەن. ءارى ءازىربايجان استاناسى ارقىلى شەتەلگە باسقا قۇجاتپەن كەتكىسى كەلگەن بولۋى مۇمكىن.

Telegram ارنالاردا دا نىعماتۋليننىڭ ەلدەن قاشىپ كەتكەنى تۋرالى رەسمي راستالماعان اقپارات تاراعان بولاتىن. ايتا كەتەيىك، بيىل 1 اقپاندا پارلامەنتتىڭ تومەنگى پالاتاسىنىڭ توراعاسى قىزمەتىن اتقارعان نۇرلان نىعماتۋليننىڭ وكىلەتتىگى مەرزىمىنەن بۇرىن توقتاتىلدى.

59 جاستاعى نۇرلان نىعماتۋلين ماجىلىستە ءۇش رەت توراعالىق ەتتى. سوڭعى رەت 2021 جىلدىڭ قاڭتارىندا ءماجىلىس سپيكەرى بولىپ تاعايىندالدى. 2014 جىلدىڭ اقپانى مەن 2016 جىلدىڭ ماۋسىمى ارالىعىندا نىعماتۋلين پرەزيدەنت اكىمشىلىگىنىڭ باسشىسى بولدى. ول 2014 جىلدىڭ قازان ايىندا قازاقستاننىڭ مەملەكەتتىك حاتشىسى مىندەتىن ۋاقىتشا اتقاردى.

ماجىلىسكە كەلگەنگە دەيىن نىعماتۋلين 1999-2002 جىلدارى ەلوردا اكىمىنىڭ ورىنباسارى، كولىك جانە كوممۋنيكاتسيا ۆيتسە-ءمينيسترى (2002-2004), شامامەن ءتورت جىل قاراعاندى وبلىسىنىڭ اكىمى بولعان. نۇرلان نىعماتۋليننىڭ تۋعان باۋىرى ەرلان نىعماتۋلين 2021 جىلى Forbes جۋرنالىنداعى قازاقستاننىڭ ەڭ ىقپالدى 50 كاسىپكەرىنىڭ تىزىمىنە ەندى.

الماتى قالاسىنىڭ ەكس-اكىمى باۋىرجان بايبەك بۇرىنعى «Nur Otan» پارتياسىنىڭ توراعالىعى قىزمەتىنەن بيىل ەكىنشى اقپاندا بوساتىلدى.

بايبەك پارتيالىق جانە مەملەكەتتىك قىزمەتتە 20 جىل جۇمىس ىستەگەن. ول Facebook پاراقشاسىندا قىزمەتىنەن كەتۋىن «Nur Otan» الدىنا جاڭا كوزقاراستار مەن تاسىلدەردى تالاپ ەتەتىن مۇلدە جاڭا مىندەتتەر قويىلدى. سوندىقتان مەن پارتيا توراعاسى قاسىم-جومارت كەمەلۇلى توقاەۆقا اتقارىپ وتىرعان قىزمەتىمنەن بوساتۋ تۋرالى ءتيىستى ءوتىنىش بەردىم»، - دەپ تۇسىندىرگەن بولاتىن.

ايجان تەمىرحان

Abai.kz