قازاقستانداعى 160-قا جۋىق ەلدى مەكەندى سۋ باسىپ قالۋ قاۋپى بار. بۇل تۋرالى توتەنشە جاعدايلار ءمينيسترى يۋري يلين مالىمدەدى.

"اقمولا، اقتوبە، شىعىس قازاقستان، باتىس قازاقستان، قاراعاندى، قوستاناي، پاۆلودار جانە سولتۇستىك قازاقستان وبلىستارىنىڭ اۋماعىندا الدىمىزداعى اپتادا اۋا تەمپەراتۋراسى كوتەرىلەدى. اراسىندا تەمپەراتۋرا ازداپ تومەندەۋى مۇمكىن. بۇل قار ەرىپ، سەڭ جۇرۋگە ىقپال ەتەدى، سوندىقتان سۋ تاسقىنى قاۋپى بار. وسى وڭىرلەردەگى  157 ەلدى مەكەندى سۋ باسىپ كەتۋ قاۋپىن جاسىرمايمىز", - دەدى يلين.

ول باتىس قازاقستان وبلىسىندا وسىنداي 49 ەلدى مەكەن (28 166 ءۇي جانە 154 147 ادام), قوستاناي وبلىسىندا – 34 (733 ءۇي جانە 2506 ادام), اقمولا وبلىسىندا – 25 (967 ءۇي جانە 2975 ادام), شىعىس قازاقستان وبلىسىندا-19 (542 ءۇي جانە 1512 ادام), اقتوبە وبلىسىندا – 17 (751 ءۇي جانە 3808 ادام), سولتۇستىك قازاقستان-13 (311 ءۇي جانە 1413 ادام) بار ەكەنىن اتادى.

سونىمەن قاتار، تجم مالىمەتىنشە تۇركىستان وبلىسىنىڭ وڭتۇستىگىندە جانە تاۋلى اۋداندارى مەن تاۋ بوكتەرلەرىندە، سولتۇستىك-شىعىسىندا، وڭتۇستىگىندە، جامبىل وبلىسىنىڭ تاۋلى اۋداندارى مەن تاۋ بوكتەرىندە، الماتى وبلىسىنىڭ وڭتۇستىگىندە جانە تاۋلى اۋداندارىندا قار مەن جاڭبىر جاۋادى، وسىعان بايلانىستى جوعارىدا اتالعان وڭىرلەردىڭ تاۋلى اۋداندارىندا سۋ تاسقىنى، قار كوشكىنى ءجۇرۋى مۇمكىن.

"جالپى، جاۋىن-شاشىن جاۋعان كەزدە قىس مەزگىلىندەگىدەي توتەنشە جاعداي جۇمىستارى ءجۇرىپ جاتىر. كۇندە وبلىستىق جانە رەسپۋبليكالىق ماڭىزى بار جولدارعا شەكتەۋلەر قويىلىپ تۇرادى", - دەدى يلين.

Abai.kz