ۋكراينا مەن رەسەيدىڭ اراسىنداعى سوعىسقا ءبىر جارىم ايدىڭ ءجۇزى بولدى. سوعىس پوزيتسيالىق سيپاتقا اۋىستى دەۋگە تولىق نەگىز بار. رەسەي اسكەرى كيەۆ پەن چەرنيگوۆ وبلىسىنان تولىق شىعىپ كەتتى. رەسەي تاراپى «كەلىسسوزدەردى جاقسارتۋ ءۇشىن، كيەۆ وبلىسىنان اسكەردى شىعارۋدى باستادىق»، دەيدى. ارينە، بۇل شىندىققا ساي كەلمەيدى. كيەۆتى 48 ساعاتتا الۋدى جوسپارلاعان اسكەردىڭ اراعا ءبىر جارىم اي سالىپ، اتالمىش ماقساتىنان باس تارتىپ، شىعىپ كەتۋىنە سەنۋ قيىن. بۇل ۋكراينا اسكەرىنىڭ قاتاڭ قارسىلىعى مەن رەسەي اسكەرىنىڭ جانارماي جانە ازىق-تۇلىك تاپشىلىعىنان زارداپ شەگۋى، ءبىرشاما اسكەري بولىمشەلەردىڭ ۇلكەن شىعىنعا ۇشىراۋىنان بولعانى انىق. 

رەسەي اسكەرى كيەۆ وبلىسىنان شىققان ساتتە اسكەري قىلمىستار جاساعانى ايتىلۋدا. بۋچا مەن بەرديانسك، يرپەن ماڭىندا قىرعىن سالىپ، بەيبىت تۇرعىنداردى جاپپاي اتىپ تاستاعانى الەمگە بەلگىلى بولدى. بۇگىندە بۇل قاندى قىرعىندى زەرتتەۋ، وعان حالىقارالىق قۇقىق تۇرعىسىنان باعا بەرىپ، كىنالىلەردى جازالاۋ ماسەلەسى دە كوتەرىلىپ وتىر. اتالمىش وقيعاعا بايلانىستى بۇۇ ادام قۇقىعى تۋرالى كەڭەستەن رەسەيدى شىعارىپ تاستاۋعا قاتىستى داۋىس بەرۋ ءوتىپ، رەسەي 2023 جىلعا دەيىن شەتتەتىلدى. رەسەي ول كەڭەسكە 2021-2023 جىلدار ارالىعىندا ءۇش جىلعا قابىلدانعان بولاتىن. داۋىس بەرۋدە رەسەي كەڭەستە قالسىن دەگەننىڭ ءبىرى قازاقستان ەدى...

رەسەيدىڭ ۋكرايناعا شابۋىلىنان ەكى ەلدىڭ دە ءىجو كورسەتكىشى ايتارلىقتاي تومەندەيدى دەيدى دۇنيەجۇزىلىك بانك. ارنايى ەسەپتەۋلەر بويىنشا ۋكراينانىڭ ءىجو كورسەتكىشى بيىل - 45 پايىزعا، رەسەيدىكى -11 پايىزعا، بەلارۋس ەلى -6,5 پايىزعا، قىرعىزستان -5 پايىزعا تومەندەيتىنى ايتىلۋدا. قازاقستان جوعارىدا ايتىلعان ەلدەر ىسپەتتى مينۋسقا كەتپەسە دە، بيىلعى ءىجو كورسەتكىشى 2,8 پايىز بولماق دەيدى، وتكەن جىلى بۇل كورسەتكىش 4 پايىزدى كورسەتكەن بولاتىن. ياعني، سانكتسيالاردىڭ سالقىنى ءبىزدى دە توڭدىراتىنى انىق.

ۋكرايناعا قارۋ بەرۋدى ەۋروپا مەن اقش كوبەيتتى. ناقتىلاپ ايتقاندا سلوۆاكيا س-300 جۇيەسىن تابىستادى. اۋستراليا Bushmaster بروندى كولىكتەرىن جىبەرسە، پولشا مەن چەحيا ت-72 تانكتەرىن اتتاندىردى. ۋكرايناعا تانككە قارسى قۇرىلعىلار مەن اۋە كەڭىستىگىن قورعاۋ جۇيەلەرى دە جىبەرىلىپ جاتىر. ۇلىبريتانيا ءوز كەزەگىندە ۋكراينا جاعالاۋىن قورعاۋعا ارنالعان زىمىران كەشەندەرىن تابىستايدى. گەرمانيا اۋىر گاۋبيتسالار، ال اقش «ستينگەر» مەن «دجاۆەليندەر» سانىن ارتتىرماق. رەسەي «ۋكرايناعا قارۋ بەرۋ سوعىستى ۇزاققا سوزادى» دەپ مالىمدەپ، باتىس ەلدەرىن ايىپتادى.

ساراپشىلار رەسەيدىڭ ماقساتى ايقىندالعانىن ايتادى. رەسەي دونباسستى تولىق باسىپ الىپ، ءماريۋپولدى ۋىسىندا ۇستاپ، سول ارقىلى كەلىسسوزدەر جۇرگىزۋدى ويلاستىرسا كەرەك. الايدا ۋكراينا اسكەرى دە شەشۋشى شايقاسقا دايىندالىپ جاتىر. باسقىنشى اسكەرى مەن ۋكراينا جاۋىنگەرلەرى اراسىنداعى كەسكىلەسكەن ۇرىستار وسى اپتادا باستالۋى مۇمكىن.

اسحات قاسەنعالي

Abai.kz