قاڭتار قىرعىنىندا تۇتقىندالعانداردىڭ ءبىرى – ۇقك بۇرىنعى باسشىسى كارىم ءماسىموۆ. وعان مەملەكەتتىك توڭكەرىس جاساماق بولدى، بيلىكتى كۇشپەن تارتىپ الۋدى جوسپارلادى دەگەن ايىپ تاعىلدى. بۇگىندە ونىڭ ءىسى اسا قۇپيا ساناتىندا تەرگەلۋدە. 

كارىم ءماسىموۆتىڭ ءىسى بويىنشا پروكۋراتۋرا بىرنەشە مارتە مالىمدەمە جاسادى. ونىڭ قازاقستانداعى دۇنيە-مۇلكى تاركىلەندى، ال شەتەلدەگى زاڭسىز شىعارىلعان قاراجاتىن كەرى قايتارۋ جۇمىستارى جۇرگىزىلۋدە.

كۇنى كەشە عانا كارىم ماسىموۆكە قاتىستى تاعى ءبىر اقپارات شىقتى. ونىڭ «دەنساۋلىعى سىر بەردى» دەگەن اقپاراتتى «karimmassimov.com» سايتى جاريالادى.

«كارىم ءماسىموۆ كوپتەگەن سوزىلمالى اۋرۋلارمەن اۋىرادى، ونىڭ ىشىندە 2021 جىلدىڭ كوكتەمىندە انىقتالعان اۋىر سوزىلمالى جۇرەكتىڭ يشەميالىق اۋرۋى بار. ونىڭ دەنساۋلىعىنا بايلانىستى دياگنوز گۋمانيتارلىق نەگىزدە قاماۋدان دەرەۋ بوساتۋدى تالاپ ەتەدى.

كارىم ءماسىموۆتىڭ دارىگەرلەرى ءماسىموۆتى جۇرەكتىڭ اۋىر سوزىلمالى يشەميالىق اۋرۋىنا، سونداي-اق، ولىمگە قاۋىپ توندىرەتىن باسقا دا اۋرۋلارعا بايلانىستى دەرەۋ بوساتۋ قاجەتتىگىن جازباشا راستادى. دارىگەرلەر بۇل ماسەلە بويىنشا تولىق اقپارات بەرۋگە دايىن.

بارلىق قۇجاتتار ءتيىستى تارتىپتە مەملەكەتتىك ورگاندارعا تاپسىرىلدى. سونىمەن قاتار، بۇل ماسەلە بويىنشا حالىقارالىق ورگاندار مەن شەتەل ۇكىمەتتەرى حاباردار ەتىلدى»، - دەلىنگەن اقپاراتتا. بۇل اقپارات جايلى رەسمي ورگاندار ءالى مالىمدەمە جاسامادى.

ماسىموۆكە بىرنەشە ايىپ تاعىلىپ وتىر. تەرگەۋ-جەدەل توبى قىلمىستىق ءىستى كەلەسى باپتار بويىنشا تەرگەپ جاتقانىن تۇسىندىرگەن ەدى.

366-باپتىڭ 4-بولىگى – پارا الۋ (12 جىلعا دەيىن باس بوستاندىعىنان ايىرۋ جازاسىن قاراستىرادى).

362-باپتىڭ 4-بولىگىنىڭ 3-تارماعى – بيلىكتى نەمەسە قىزمەتتىك وكىلەتتىكتەردى اسىرا پايدالانۋ (10 جىلعا دەيىن باس بوستاندىعىنان ايىرۋدى كوزدەيدى).

175-باپتىڭ 1-بولىگى – مەملەكەتكە وپاسىزدىق جاساۋ (قازاقستان رەسپۋبليكاسىنىڭ ازاماتتىعىنان ايىرۋ مۇمكىندىگىمەن 15 جىلعا دەيىن باس بوستاندىعىنان ايىرۋدى كوزدەيدى).

179-باپتىڭ 3-بولىگى – بيلىكتى باسىپ الۋعا نەمەسە ۇستاپ قالۋعا نە قازاقستان رەسپۋبليكاسىنىڭ كونستيتۋتسيالىق قۇرىلىسىن كۇشتەپ وزگەرتۋگە ۇگىت-ناسيحات جاساۋ نەمەسە جاريا تۇردە شاقىرۋ (قازاقستان رەسپۋبليكاسى ازاماتتىعىنان ايىرۋ مۇمكىندىگىمەن 17 جىلعا دەيىن باس بوستاندىعىنان ايىرۋدى كوزدەيدى).

218-باپتىڭ 3-بولىگىنىڭ 3-تارماعى – قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋ (جەتى جىلعا دەيىن باس بوستاندىعىنان ايىرۋ جازاسىن قاراستىرادى).

Abai.kz