بۇگىن رەسەي پرەزيدەنتى پۋتين مەن قورعانىس ءمينيسترى شويگۋ كەزدەستى. شويگۋ ۋكرايناداعى سوعىسقا قاتىستى تولىق اقپارات بەرىپ، بايانداما جاسادى. رەسەي قورعانىس ءمينيسترى ماريۋپول قالاسىن تولىق باقىلاۋعا العانىن ايتتى. ول "ازوۆستال" زاۋىتىنا 2 مىڭ ۋكراين ساربازدارى مەن "ازوۆ" جاساقتارى بەكىنگەنىن مويىندادى. 

شويگۋ: "11 ناۋرىزدا قالانى قورشاۋعا العان ساتتە ۋكراينا جاساقتارى مەن ۇلتشىل جاساقتاردىڭ سانى 8100 ادامدى قۇرادى. قالانى ازات ەتۋ وپەراتسياسىندا  ءتورت مىڭنان استامى قازا تاپتى، 1478 ادام تۇتقىنعا ءتۇستى، قالعان ەكى مىڭنان استامى ازوۆستال زاۋىتىنا بەكىنىپ الدى. 

ۇلتشىلدار قارسىلىق كورسەتىپ، تۇرعىن ۇيلەرگە قارۋ جاسىردى. ولار ءبىرىنشى قاباتقا اۋىر اسكەري تەحنيكالار قويسا، جوعارى قاباتتارعا مەرگەندەردى جاسىردى. تۇرعىن ءۇيدىڭ جەرتولەلەرىنە بەيبىت تۇرعىنداردى كەپىلدىككە ۇستاپ، ولاردى قالقان رەتىندە قولداندى", - دەپ اقپارات بەردى.

پۋتين ءوز كەزەگىندە "ازوۆستال" زاۋىتىن شابۋىلداماي، ونى تولىق قورشاۋعا الىپ، شىبىن شىقپاستاي بەكىتىپ تاستاۋدى بۇيىردى. "ساربازدار مەن وفيتسەرلەردىڭ ءومىرى قۇندى" دەدى ول. رەسەي باسشىسى ماريۋپول قالاسىن باسىپ العانى ءۇشىن شويگۋگە العىس ايتىپ، جاۋىنگەرلەردى ماراپاتقا ۇسىنۋدى تاپسىردى.

"ازوۆستال" اۋماعىندا رەسەي باسقىنشىلىعىنان باس ساۋعالاپ، مىڭداعان بەيبىت تۇرعىن جاسىرىنعان. ولاردى بوساتۋ ماقساتىندا كيەۆ گۋمانيتارلىق ءدالىز اشۋدى ويلاستىرۋدا.

Abai.kz