باق-تا گەنەرال-مايور سەرىك كۇدەباەۆتىڭ قر ىشكى ىستەر ورگاندارىنان كەتكەنى تۋرالى اقپارات تارادى. ىشكى ىستەر مينيسترلىگىنىڭ ءباسپاسوز قىزمەتىنىڭ مالىمەتىنە سايكەس، كۇدەباەۆ ءوز ەركىمەن قىزمەتتەن كەتكەن. 

سەرىك كۇدەباەۆ الماتى وبلىستىق پوليتسيا دەپارتامەنتىنىڭ باستىعى قىزمەتىن اتقارىپ كەلدى.

“الايدا 26 قاڭتاردا كريمينالدىق جاعدايدى ەسكەرە كەلە كادر الەۋەتىن نىعايتۋ، قىلمىسپەن كۇرەستى كۇشەيتۋ، ازاماتتاردىڭ قاۋىپسىزدىگىن ءتيىمدى قامتاماسىز ەتۋ ءۇشىن پرەزيدەنت اكىمشىلىگىمەن كەلىسە وتىرىپ، ىشكى ىستەر ءمينيسترىنىڭ بۇيرىعىمەن ارىستانعالي زاپپاروۆ الماتى وبلىستىق پوليتسيا دەپارتامەنتىنىڭ باستىعى بولىپ تاعايىندالدى. قاڭتار وقيعاسىنان كەيىن الماتى جانە جامبىل وبلىستارى پوليتسياسىنىڭ باسشىلىعى قىزمەتتەرىنەن شەتتەتىلدى”، – دەدى ىشكى ىستەر مينيسترلىگىنىڭ ءباسپاسوز قىزمەتى.

سەرىك كۇدەباەۆ الماتى وبلىستىق پوليتسياسىن 2020 جىلدىڭ 29 قاڭتارىنان باستاپ باسقاردى.

ول 1965 جىلى تۋعان، ىشكى ىستەر ورگاندارىندا 1990 جىلدان باستاپ قىزمەت ەتەدى. باسشىلىق لاۋازىمداردا جۇمىس تاجىريبەسى مول.

2009-2013 جىلدارى الماتى وبلىسىنىڭ پوليتسيا دەپارتامەنتى باستىعىنىڭ ءبىرىنشى ورىنباسارى، ودان كەيىن باستىعى بولىپ جۇمىس ىستەدى.

2013 جىلدىڭ قازان ايىنان باستاپ الماتى قالاسىنىڭ پوليتسيا دەپارتامەنتىن باسقاردى.

Abai.kz