اتا زاڭعا تۇزەتۋ ازىرلەگەن جۇمىس توبىنىڭ مۇشەسى، زاڭگەر ەرمەك ءابدىراسىلوۆ “جەردىڭ جانە قازبا بايلىقتىڭ قوجاسى – حالىق” دەگەن نورماعا توقتالىپ، بۇدان تۇسەتىن تابىستىڭ ەداۋىر بولىگىن حالىققا ۇلەستىرۋ ماسەلەسىنە تۇسىنىك بەردى دەپ حابارلايدى Dalanews.kz

“بۇل – مىندەتتى نورما، جەر، جەر قويناۋى، وسىمدىكتەر مەن جانۋارلار الەمىنە قاتىستى كونستيتۋتسيالىق ەرەجەنىڭ نەگىزگى ءبولىمى. مۇنىڭ بارلىعى ەلگە تيەسىلى، ءسوزسىز سولاي. وسىنداي نورمانى ەنگىزىپ وتىر. ەندى، حالىق، ءاربىر ادام ءوزى تابيعات بايلىقتارىنا يەلىك ەتىپ تاراتسا، حاوس مەن تارتىپسىزدىك بولادى.

ەڭ باستىسى، مەملەكەت ەلدىڭ مۇددەسىن كوزدەۋى ءتيىس”، – دەدى ءابدىراسىلوۆ ورتالىق كوممۋنيكاتسيالار قىزمەتىندە وتكەن بريفينگتە.

جۋرناليستەر الداعى ۋاقىتتا قازبا بايلىقتان تۇسەتىن تابىستىڭ ءبىر بولىگىن حالىق تاراتۋ ماسەلەسىن قوزعاپ، ونى ىسكە اسىرۋ مۇمكىندىگىن سۇرادى. ساراپشىنىڭ پىكىرىنشە، بۇل ماسەلەنى حالىق قالاۋلىلارى – دەپۋتاتتار كوتەرۋى ءتيىس.

“مەنىڭشە، ارنايى زاڭدار بولادى. سوندا كونستيتۋتسيانىڭ مىندەتتى نورماسى، ياعني، “جەر مەن تابيعي رەسۋرستارى ەلگە تيەسىلى” دەگەن تالاپتىڭ نەگىزىندە باسقا ماسەلەلەردى بارىنشا ايقىندايتىن نورمالار قابىلدانادى. ءدال قازىر سولاي بولادى دەپ ايتۋ قيىن. ونى پارلامەنتتەگى حالىقتىڭ وكىلدەرى شەشەدى دەپ ويلايمىن. ارينە، پرەزيدەنت پەن ۇكىمەت تە اتسالىسادى. ءسويتىپ، بىرلەسىپ شەشىلەدى”، – دەپ اتاپ كورسەتتى ءابدىراسىلوۆ.

مەملەكەت باسشىسى “جەر مەن تابيعي رەسۋرستاردىڭ قوجاسى – حالىق” دەگەن نورمانى اتا زاڭدا ءبىرجولا بەكىتۋدى ۇسىنعان.

“نەگىزگى زاڭنىڭ 6-بابىن مىناداي رەداكتسيادا بەرۋ ۇسىنىلادى: “جەر جانە ونىڭ قويناۋى، سۋ، وسىمدىكتەر جانە جانۋارلار الەمى، باسقا دا تابيعي رەسۋرستار حالىققا تيەسىلى. مەملەكەت حالىق اتىنان مەنشىك يەلىگىن جۇرگىزۋگە قۇقىلى”، – دەگەن ەدى توقاەۆ اقوردادا وتكەن جيىندا.

Abai.kz