مەملەكەت جانە قوعام قايراتكەرى زامانبەك نۇرقادىلوۆتىڭ ۇلى قايرات نۇرقادىلوۆ باس پروكۋراتۋراعا ارىز جازىپ، اكەسىنە جاسالعان قاستاندىققا قاتىستى قىلمىستىق ءىستى قايتا قاراۋدى سۇراعانىن حابارلاعانبىز. باس پروكۋراتۋرا جاۋاپ بەرىپتى. بۇگىن قايرات نۇرقادىلوۆ nege.kz رەداكتسياسىنا حابارلاسىپ، باس پروكۋراتۋرادان جاۋاپ العانىن، جاۋاپقا كوڭىلى تولمايتىنىن مالىمدەدى.

– اكەڭىز زامانبەك نۇرقادىلوۆتىڭ ولىمىنە قاتىستى قىلمىستىق ءىستى قايتا قاراۋ ءۇشىن پروكۋراتۋراعا ارىز ءتۇسىردىڭىز. ولار ارىزدى قاراۋ ۋاقىتىن 20 ساۋىرگە دەيىن سوزعان ەدى. مىنە، بۇگىن 25 ءساۋىر بولدى. قانداي دا ءبىر جاۋاپ كەلدى مە؟ ءىستى قايتا قارايتىن بولدى ما؟

– ماعان رەسمي تۇردە «ءىستى قايتا قارامايمىز» دەگەن جاۋاپ كەلدى. «سۋيتسيد جاساعان، باسقا دەۋگە نەگىز جوق» دەيدى. مەن سىزدەرگە ماعان جىبەرگەن جاۋابىن بەرەمىن.

– ءىستى قايتا قاراۋعا نەگىز جوق بولسا، وندا ارىزدى قاراۋ ۋاقىتىن نە سەبەپتى سوزدى دەپ ويلايسىز؟

– مەن ولارمەن كەزدەستىم دەپ ايتتىم عوي. بارلىعىن ءتۇسىندىردىم. باس پروكۋراتۋرادان كەلگەندەرگە «ءىستى قايتا قاراڭدارشى، دۇرىس شەشىم قابىلداڭدارشى» دەپ ايتتىم.

ولار راسىمەن دە ءىستى ارحيۆتەن الدى، قارادى. قاراعاننان كەيىن ۋاقىت كەرەك ەكەن. 7 ۇلكەن تومدى قاراپ شىعىپتى. سونىڭ ناتيجەسىندە: «ءىس سول كەزدە دۇرىس تەرگەلگەن، سۋيتسيد بولعان», – دەپ جاۋاپ بەردى.

– قىلمىستىق ءىستىڭ قايتا قارالماۋىنا مۇددەلىلەر بار ما?

– ول جاعىن بىلمەدىم. پروكۋراتۋرادا، تەرگەۋشىلەرىنىڭ اراسىندا دا تاجىريبەلى ماماندار بار عوي. بىراق ءىستى نەگە قايتا قاراعىلارى كەلمەگەنى ماعان جۇمباق.

– ەندى قانداي ارەكەت جاسايسىز؟

– جۋرناليستەر ارقىلى قوعامنان كومەك سۇرايمىن.

قايرات نۇرقادىلوۆ وسىلاي دەيدى. قاداعالاۋشى ورگاننان تومەندەگىدەي جاۋاپ كەلگەن:

باس پروكۋراتۋرانىڭ جاۋابى.

«...جوعارىدا كورسەتىلگەن سوت ساراپتاماسى مەن باسقا دا دالەلدەر سۋيتسيدكە قاتىستى قورىتىندىمەن ساي كەلەدى. كەشەندى سوت پسيحولوگو-پسيحياتريالىق ساراپتاما (№918, 12.01.2006, ولگەن سوڭ) دا وسىنى كورسەتەدى. وسىعان ساي، سول كەزەڭدە ز.نۇرقادىلوۆتىڭ جۇيكە كۇيزەلىسىندە بولعانى سۋيتسيدكە اپارعان سەبەپتەردىڭ ءبىرى بولۋى مۇمكىن.

سونداي-اق ءسىزدىڭ اكەڭىزدى وزىنە قول جۇمساۋعا جەتكىزگەن دەرەكتى انىقتاۋ مۇمكىن ەمەس. ويتكەنى قىلمىستىق قۇرام جوق بولعاندىقتان 16.11.2006 جىلى ءىس جابىلعان.

تەرگەۋ ورگانىنىڭ شەشىمىن بۇزۋعا نەگىز جوق. قىلمىستىق ءىس ماتەريالدارىمەن الماتى قالالىق پروكۋراتۋراسىنان كەز كەلگەن ۋاقىتتا تانىسا الاسىز».

«ەسكى قازاقستاندا» ساياسي تاپسىرىسپەن جاسالعان وسىنداي قانقۇيلى قاستاندىقتار جاڭا قازاقستانعا دا كولەڭكەسىن تۇسىرەتىنىن قازىرگى بيلىك ءالى دە تۇسىنبەگەن سياقتى...

Abai.kz